زندگی پر اشعار

وہیں پہ جھاڑ کے اٹھتے ہیں پھر متاع حیات

کہ زندگی کو جہاں جس کے نام کرتے ہیں

ہماری زندگی تو مختصر سی اک کہانی تھی

بھلا ہو موت کا جس نے بنا رکھا ہے افسانہ

زندگی شاید اسی کا نام ہے

دوریاں مجبوریاں تنہائیاں

زندگی فردوس گم گشتہ کو پا سکتی نہیں

موت ہی آتی ہے یہ منزل دکھانے کے لیے

کوئی وقت بتلا کہ تجھ سے ملوں

مری دوڑتی بھاگتی زندگی

زندگی ہے اپنے قبضے میں نہ اپنے بس میں موت

آدمی مجبور ہے اور کس قدر مجبور ہے

کتنی بھی پیاری ہو ہر اک شے سے جی اکتا جاتا ہے

وقت کے ساتھ تو چمکیلے زیور بھی کالے پڑ جاتے ہیں

زندگی زندہ دلی کا ہے نام

مردہ دل خاک جیا کرتے ہیں

زندگی تجھ سے بھی کیا خوب تعلق ہے مرا

جیسے سوکھے ہوئے پتے سے ہوا کا رشتہ

بڑا گھاٹے کا سودا ہے صداؔ یہ سانس لینا بھی

بڑھے ہے عمر جیوں جیوں زندگی کم ہوتی جاتی ہے

زندگی مائل فریاد و فغاں آج بھی ہے

کل بھی تھا سینے پہ اک سنگ گراں آج بھی ہے

زندگی وادی و صحرا کا سفر ہے کیوں ہے

اتنی ویران مری راہگزر ہے کیوں ہے

منیرؔ اس خوب صورت زندگی کو

ہمیشہ ایک سا ہونا نہیں ہے

موت کہتے ہیں جس کو اے ساغرؔ

زندگی کی کوئی کڑی ہوگی

زندگی اب تجھے سنواریں کیا

کوششیں ساری بے اثر شاید

ہم کیسے زندہ ہیں اب تک

ہم کو بھی حیرت ہوتی ہے

کہانی ہے تو اتنی ہے فریب خواب ہستی کی

کہ آنکھیں بند ہوں اور آدمی افسانہ ہو جائے

کچھ دن سے زندگی مجھے پہچانتی نہیں

یوں دیکھتی ہے جیسے مجھے جانتی نہیں

موت کا بھی علاج ہو شاید

زندگی کا کوئی علاج نہیں

کس طرح جمع کیجئے اب اپنے آپ کو

کاغذ بکھر رہے ہیں پرانی کتاب کے

مرا تجربہ ہے کہ اس زندگی میں

پریشانیاں ہی پریشانیاں ہیں

درد بڑھ کر دوا نہ ہو جائے

زندگی بے مزا نہ ہو جائے

مصیبت اور لمبی زندگانی

بزرگوں کی دعا نے مار ڈالا

زندگی کی ضرورتوں کا یہاں

حسرتوں میں شمار ہوتا ہے

زندگی نام اسی موج مے ناب کا ہے

مے کدے سے جو اٹھے دار و رسن تک پہنچے

زندگی اور زندگی کی یادگار

پردہ اور پردے پہ کچھ پرچھائیاں

بندھن سا اک بندھا تھا رگ و پے سے جسم میں

مرنے کے بعد ہاتھ سے موتی بکھر گئے

کبھی سایہ ہے کبھی دھوپ مقدر میرا

ہوتا رہتا ہے یوں ہی قرض برابر میرا

یہ مانا زندگی ہے چار دن کی

بہت ہوتے ہیں یارو چار دن بھی

تیز ہوا نے مجھ سے پوچھا

ریت پہ کیا لکھتے رہتے ہو

کتنا سوچا تھا دل لگائیں گے

سوچتے سوچتے حیات ہوئی

مری زندگی تو گزری ترے ہجر کے سہارے

مری موت کو بھی پیارے کوئی چاہیئے بہانہ

درد الفت کا نہ ہو تو زندگی کا کیا مزا

آہ و زاری زندگی ہے بے قراری زندگی

ہم غم زدہ ہیں لائیں کہاں سے خوشی کے گیت

دیں گے وہی جو پائیں گے اس زندگی سے ہم

زندگی کس طرح بسر ہوگی

دل نہیں لگ رہا محبت میں

یہ زندگی بھی عجب کاروبار ہے کہ مجھے

خوشی ہے پانے کی کوئی نہ رنج کھونے کا

کم سے کم موت سے ایسی مجھے امید نہیں

زندگی تو نے تو دھوکے پہ دیا ہے دھوکہ

تم محبت کو کھیل کہتے ہو

ہم نے برباد زندگی کر لی

کچھ اس طرح سے گزاری ہے زندگی جیسے

تمام عمر کسی دوسرے کے گھر میں رہا

ایک مشت خاک اور وہ بھی ہوا کی زد میں ہے

زندگی کی بے بسی کا استعارہ دیکھنا

دھوکہ ہے اک فریب ہے منزل کا ہر خیال

سچ پوچھئے تو سارا سفر واپسی کا ہے

زندگی خواب دیکھتی ہے مگر

زندگی زندگی ہے خواب نہیں

تندیٔ سیل وقت میں یہ بھی ہے کوئی زندگی

صبح ہوئی تو جی اٹھے، رات ہوئی تو مر گئے

اس زاویے سے دیکھیے آئینۂ حیات

جس زاویے سے میں نے لگایا ہے دھوپ میں

بہت قریب رہی ہے یہ زندگی ہم سے

بہت عزیز سہی اعتبار کچھ بھی نہیں

خدایا اپنے کن کی لاج رکھ لے

ترا شہکار ضائع ہو رہا ہے

مجھے یہ ڈر ہے دل زندہ تو نہ مر جائے

کہ زندگانی عبارت ہے تیرے جینے سے

زندگی اور ہیں کتنے ترے چہرے یہ بتا

تجھ سے اک عمر کی حالانکہ شناسائی ہے

جو انہیں وفا کی سوجھی تو نہ زیست نے وفا کی

ابھی آ کے وہ نہ بیٹھے کہ ہم اٹھ گئے جہاں سے

زندگی پرچھائیاں اپنی لیے

آئنوں کے درمیاں سے آئی ہے