نستعلیق وہ خوبصورت رسم الخط ہے جس میں اردو لکھی جاتی ہے، جو چودھویں اور پندرہویں صدی میں ایران میں بنایا گیا تھا۔ ’نسخ‘ وہ رسم الخط ہے، جس میں عام طور پر عربی لکھی جاتی ہے۔ اور ’تعلیق‘ ایک فارسی رسم الخط ہے۔ دونوں مل کے ’نستعلیق‘ بن گئے۔ اردو میں باسلیقہ اور مہذب لوگوں کو بھی ’نستعلیق‘ کہا جاتا ہے۔ یعنی بہت نفیس اور صاف طبیعت کا مالک۔

" ہم زلف" کسے کہتے ہیں؟ یہ ایک رشتہ ہے جس کے لئے عام طور پر لفظ "ساڑھو" استعمال ہوتا ہے۔ یعنی ایک بہن کا شوہر اور دوسری بہن کے شوہر کا "ہم زلف" ہوا۔ کیا آپ جانتے ہیں کہ کچھ ایسا ہی شاعرانہ سا نام ایک اور رشتے کا بھی  ہے۔ " ساس کو "خوش دامن" کہا جاتا ہے۔
شوہر کے لئے ایک لفظ "خٙصم" بھی عام بول چال میں آتا ہے، جو کچھ زیادہ مہذب نہیں سمجھا جاتا اور اکثر اس کا تلفظ  "خٙصٙم" کیا جاتا ہے اور پنچابی میں یہ"کھسم" بولا جاتا ہے۔
دلچسپ بات یہ ہے کہ عربی میں خصم (ص پر جزم) کا مطلب ہے دُشمن، جس سے نکلا ہوا لفظ خُصُومت (دشمنی) اُردو میں بھی استعمال ہوتا ہے۔ اور اسی معنی میں اردو اشعار میں بھی مل جاتا ہے۔ جان کے دشمن کے لئے "خصمِ جاں" مصحفی کے اس شعر میں آیا ہے 

ہوا خصمِ جاں مصحفیؔ وہ تو تیرا
نہ انساں کو انسان سے بیر ہووے

ایک ضرب المثل ہے "ہاتھ کنگن کو آرسی کیا'' اس کا مطلب تو بعد میں سمجھیں گے، لیکن کیا آپ جانتے ہیں کہ آرسی بڑی سی انگوٹھی ہوتی تھی، جو پچھلے زمانے میں عورتیں اپنے ہاتھ کے انگوٹھے میں پہنا کرتی تھیں۔ اس میں نگوں کے بیچ  ایک گول آئینہ لگا ہوتا تھا۔ عورتیں اس  میں دیکھ کر اپنا سنگھار درست کر لیا  کرتی تھیں۔
آرسی پر بہت سے شعر ہیں 
 آئینہ سامنے نہ سہی آرسی تو ہے
تم اپنے مسکرانے کا انداز دیکھنا
ہاتھ کنگن کو آرسی کیا'' اس کا مطلب ہے  کہ ہاتھ میں  پہنے ہوئے کنگن کو دیکھنے کے لئے آرسی کی ضرورت نہیں ہے کیونکہ وہ تو نظروں  کے سامنے ہی ہے۔  یہ  ضرب المثل ایسے موقع پر بولی جاتی ہے  جب کوئی بات ظاہر اور بالکل سامنے کی ہو، جس کو بیان کرنے کی ضرورت ہی نہ ہو۔
یہ کہاوت بھی بہت مشہور ہے 
" ہاتھ کنگن کو آرسی کیا، پڑھے لکھے کو فارسی کیا"

شادیوں میں ایک رسم بھی ہوتی ہے جو "آرسی مصحف کہلاتی ہے ۔" جس میں دولہا اور دلہن  کو آمنے سامنے بٹھا کر ان کے سر پر ایک دوشالہ یا دوپٹہ ڈال دیا جاتا ہے اور بیچ میں آٙئینہ رکھ دیتے ہیں، دونوں ایک  دوسرے کی شکل قرآن کی ایک سورة پڑھ کر دیکھتے ہیں۔ مصحف قرآن شریف کو کہتے ہیں۔