Sher on Tamanna

hazāroñ ḳhvāhisheñ aisī ki har ḳhvāhish pe dam nikle

bahut nikle mire armān lekin phir bhī kam nikle

hazaron KHwahishen aisi ki har KHwahish pe dam nikle

bahut nikle mere arman lekin phir bhi kam nikle

insāñ kī ḳhvāhishoñ kī koī intihā nahīñ

do gaz zamīñ bhī chāhiye do gaz kafan ke baad

insan ki KHwahishon ki koi intiha nahin

do gaz zamin bhi chahiye do gaz kafan ke baad

aarzū hai ki tū yahāñ aa.e

aur phir umr bhar na jaa.e kahīñ

aarzu hai ki tu yahan aae

aur phir umr bhar na jae kahin

gañvā.ī kis kī tamannā meñ zindagī maiñ ne

vo kaun hai jise dekhā nahīñ kabhī maiñ ne

ganwai kis ki tamanna mein zindagi main ne

wo kaun hai jise dekha nahin kabhi main ne

āġhāz-e-mohabbat kā anjām bas itnā hai

jab dil meñ tamannā thī ab dil hī tamannā hai

aaghaz-e-mohabbat ka anjam bas itna hai

jab dil mein tamanna thi ab dil hi tamanna hai

hamārī hī tamannā kyuuñ karo tum

tumhārī hī tamannā kyuuñ kareñ ham

hamari hi tamanna kyun karo tum

tumhaari hi tamanna kyun karen hum

sab ḳhvāhisheñ puurī hoñ 'farāz' aisā nahīñ hai

jaise ka.ī ash.ār mukammal nahīñ hote

sab KHwahishen puri hon 'faraaz' aisa nahin hai

jaise kai ashaar mukammal nahin hote

āshiqī sabr-talab aur tamannā betāb

dil kā kyā rañg karūñ ḳhūn-e-jigar hote tak

aashiqi sabr-talab aur tamanna betab

dil ka kya rang karun KHun-e-jigar hote tak

ḳhvāb, ummīd, tamannā.eñ, ta.alluq, rishte

jaan le lete haiñ āḳhir ye sahāre saare

KHwab, ummid, tamannaen, talluq, rishte

jaan le lete hain aaKHir ye sahaare sare

tujh se kis tarah maiñ iz.hār-e-tamannā kartā

lafz sūjhā to ma.ānī ne baġhāvat kar dī

tujh se kis tarah main izhaar-e-tamanna karta

lafz sujha to maani ne baghawat kar di

āgahī karb vafā sabr tamannā ehsās

mere hī siine meñ utre haiñ ye ḳhanjar saare

aagahi karb wafa sabr tamanna ehsas

mere hi sine mein utre hain ye KHanjar sare

tamannāoñ meñ uljhāyā gayā huuñ

khilaune de ke bahlāyā gayā huuñ

tamannaon mein uljhaya gaya hun

khilaune de ke bahlaya gaya hun

baaqī hai ab bhī tark-e-tamannā kī aarzū

kyūñkar kahūñ ki koī tamannā nahīñ mujhe

baqi hai ab bhi tark-e-tamanna ki aarzu

kyunkar kahun ki koi tamanna nahin mujhe

kaTtī hai aarzū ke sahāre pe zindagī

kaise kahūñ kisī kī tamannā na chāhiye

kaTti hai aarzu ke sahaare pe zindagi

kaise kahun kisi ki tamanna na chahiye

aarzū vasl kī rakhtī hai pareshāñ kyā kyā

kyā batā.ūñ ki mere dil meñ hai armāñ kyā kyā

aarzu wasl ki rakhti hai pareshan kya kya

kya bataun ki mere dil mein hai arman kya kya

zindagī kyā jo basar ho chain se

dil meñ thoḌī sī tamannā chāhiye

zindagi kya jo basar ho chain se

dil mein thoDi si tamanna chahiye

maiñ aa gayā huuñ vahāñ tak tirī tamannā meñ

jahāñ se koī bhī imkān-e-vāpsī na rahe

main aa gaya hun wahan tak teri tamanna mein

jahan se koi bhi imkan-e-wapsi na rahe

dil meñ vo bhiiḌ hai ki zarā bhī nahīñ jagah

aap aa.iye magar koī armāñ nikāl ke

dil mein wo bhiD hai ki zara bhi nahin jagah

aap aaiye magar koi arman nikal ke

armān vasl kā mirī nazroñ se taaḌ ke

pahle hī se vo baiTh ga.e muñh bigāḌ ke

arman wasl ka meri nazron se taD ke

pahle hi se wo baiTh gae munh bigaD ke

ba.ad marne ke bhī chhoḌī na rifāqat merī

merī turbat se lagī baiThī hai hasrat merī

baad marne ke bhi chhoDi na rifaqat meri

meri turbat se lagi baiThi hai hasrat meri

tamannā tirī hai agar hai tamannā

tirī aarzū hai agar aarzū hai

tamanna teri hai agar hai tamanna

teri aarzu hai agar aarzu hai

ham na māneñge ḳhamoshī hai tamannā kā mizāj

haañ bharī bazm meñ vo bol na paa.ī hogī

hum na manenge KHamoshi hai tamanna ka mizaj

han bhari bazm mein wo bol na pai hogi

ḳhvāhishoñ ne Dubo diyā dil ko

varna ye bahr-e-be-karāñ hotā

KHwahishon ne Dubo diya dil ko

warna ye bahr-e-be-karan hota

ham aaj rāh-e-tamannā meñ jī ko haar aa.e

na dard-o-ġham kā bharosā rahā na duniyā kā

hum aaj rah-e-tamanna mein ji ko haar aae

na dard-o-gham ka bharosa raha na duniya ka

mire saare badan par dūriyoñ kī ḳhaak bikhrī hai

tumhāre saath mil kar ḳhud ko dhonā chāhtā huuñ maiñ

mere sare badan par duriyon ki KHak bikhri hai

tumhaare sath mil kar KHud ko dhona chahta hun main

ek bhī ḳhvāhish ke hāthoñ meñ na mehñdī lag sakī

mere jazboñ meñ na dūlhā ban sakā ab tak koī

ek bhi KHwahish ke hathon mein na mehndi lag saki

mere jazbon mein na dulha ban saka ab tak koi

yaar pahlū meñ hai tanhā.ī hai kah do nikle

aaj kyuuñ dil meñ chhupī baiThī hai hasrat merī

yar pahlu mein hai tanhai hai kah do nikle

aaj kyun dil mein chhupi baiThi hai hasrat meri

ye iltijā duā ye tamannā fuzūl hai

sūkhī nadī ke paas samundar na jā.egā

ye iltija dua ye tamanna fuzul hai

sukhi nadi ke pas samundar na jaega

jiine vāloñ se kaho koī tamannā DhūñDeñ

ham to āsūda-e-manzil haiñ hamārā kyā hai

jine walon se kaho koi tamanna DhunDen

hum to aasuda-e-manzil hain hamara kya hai

mirī hastī hai mirī tarz-e-tamannā ai dost

ḳhud maiñ fariyād huuñ merī koī fariyād nahīñ

meri hasti hai meri tarz-e-tamanna ai dost

KHud main fariyaad hun meri koi fariyaad nahin

ishq hai jī kā ziyāñ ishq meñ rakkhā kyā hai

dil-e-barbād batā terī tamannā kyā hai

ishq hai ji ka ziyan ishq mein rakkha kya hai

dil-e-barbaad bata teri tamanna kya hai

dil ne tamannā kī thī jis kī barsoñ tak

aise zaḳhm ko achchhā kar ke baiTh ga.e

dil ne tamanna ki thi jis ki barson tak

aise zaKHm ko achchha kar ke baiTh gae

masāf-e-zīst meñ vo ran paḌā hai aaj ke din

na maiñ tumhārī tamannā huuñ aur na tum mere

masaf-e-zist mein wo ran paDa hai aaj ke din

na main tumhaari tamanna hun aur na tum mere