Sher on Sahra

bahār aa.e to merā salām kah denā

mujhe to aaj talab kar liyā hai sahrā ne

bahaar aae to mera salam kah dena

mujhe to aaj talab kar liya hai sahra ne

sahrā ko bahut naaz hai vīrānī pe apnī

vāqif nahīñ shāyad mire ujḌe hue ghar se

sahra ko bahut naz hai virani pe apni

waqif nahin shayad mere ujDe hue ghar se

dekhnā hai tujhe sahrā to pareshāñ kyuuñ hai

kuchh dinoñ ke liye mujh se mirī āñkheñ le jā

dekhna hai tujhe sahra to pareshan kyun hai

kuchh dinon ke liye mujh se meri aankhen le ja

vus.at-e-sahrā bhī muñh apnā chhupā kar niklī

saarī duniyā mire kamre ke barābar niklī

wusat-e-sahra bhi munh apna chhupa kar nikli

sari duniya mere kamre ke barabar nikli

ishq ne mansab likhe jis din mirī taqdīr meñ

daaġh kī naqadī milī sahrā milā jāgīr meñ

ishq ne mansab likhe jis din meri taqdir mein

dagh ki naqadi mili sahra mila jagir mein

rakkhī huī hai donoñ kī buniyād ret par

sahrā-e-be-karāñ ko samundar likheñge ham

rakkhi hui hai donon ki buniyaad ret par

sahra-e-be-karan ko samundar likhenge hum

kis ne sahrā meñ mire vāste rakkhī hai ye chhāñv

dhuup roke hai mirā chāhne vaalā kaisā

kis ne sahra mein mere waste rakkhi hai ye chhanw

dhup roke hai mera chahne wala kaisa

ho sake kyā apnī vahshat kā ilaaj

mere kūche meñ bhī sahrā chāhiye

ho sake kya apni wahshat ka ilaj

mere kuche mein bhi sahra chahiye

ab us pe chāñd sitāre bhī rashk karte haiñ

vo ik diyā jo kabhī dasht meñ bujhāyā gayā

ab us pe chand sitare bhi rashk karte hain

wo ek diya jo kabhi dasht mein bujhaya gaya

na ham vahshat meñ apne ghar se nikle

na sahrā apnī vīrānī se niklā

na hum wahshat mein apne ghar se nikle

na sahra apni virani se nikla

maiñ to rahtā huuñ dasht meñ masrūf

qais kartā hai kām-kāj mirā

main to rahta hun dasht mein masruf

qais karta hai kaam-kaj mera

majnūñ se ye kahnā ki mire shahar meñ aa jaa.e

vahshat ke liye ek bayābān abhī hai

majnun se ye kahna ki mere shahar mein aa jae

wahshat ke liye ek bayaban abhi hai

vahshī raqs chamakte ḳhanjar surḳh alaav

jangal jangal kāñTe-dār qabīle phuul

wahshi raqs chamakte KHanjar surKH alaw

jangal jangal kanTe-dar qabile phul

mere 'anāsir ḳhaak na hoñ bas rang baneñ

aur jangal sahrā dariyā par barse rang

mere 'anasir KHak na hon bas rang banen

aur jangal sahra dariya par barse rang