Sher on Raasta

kyuuñ chalte chalte ruk ga.e vīrān rāsto

tanhā huuñ aaj maiñ zarā ghar tak to saath do

kyun chalte chalte ruk gae viran rasto

tanha hun aaj main zara ghar tak to sath do

yahāñ kisī ko koī rāsta nahīñ detā

mujhe girā ke agar tum sambhal sako to chalo

yahan kisi ko koi rasta nahin deta

mujhe gira ke agar tum sambhal sako to chalo

'faiz' thī raah sar-ba-sar manzil

ham jahāñ pahuñche kāmyāb aa.e

'faiz' thi rah sar-ba-sar manzil

hum jahan pahunche kaamyab aae

kaash vo rāste meñ mil jaa.e

mujh ko muñh pher kar guzarnā hai

kash wo raste mein mil jae

mujh ko munh pher kar guzarna hai

vo kyā manzil jahāñ se rāste aage nikal jaa.eñ

so ab phir ik safar kā silsila karnā paḌegā

wo kya manzil jahan se raste aage nikal jaen

so ab phir ek safar ka silsila karna paDega

yuuñ terī rahguzar se dīvāna-vār guzre

kāñdhe pe apne rakh ke apnā mazār guzre

yun teri rahguzar se diwana-war guzre

kandhe pe apne rakh ke apna mazar guzre

safar kā ek nayā silsila banānā hai

ab āsmān talak rāsta banānā hai

safar ka ek naya silsila banana hai

ab aasman talak rasta banana hai

ham aap ko dekhte the pahle

ab aap kī raah dekhte haiñ

hum aap ko dekhte the pahle

ab aap ki rah dekhte hain

kaTī huī hai zamīñ koh se samundar tak

milā hai ghaao ye dariyā ko rāsta de kar

kaTi hui hai zamin koh se samundar tak

mila hai ghao ye dariya ko rasta de kar

tū kabhī is shahr se ho kar guzar

rāstoñ ke jaal meñ uljhā huuñ maiñ

tu kabhi is shahr se ho kar guzar

raston ke jal mein uljha hun main

koī rasta kahīñ jaa.e to jāneñ

badalne ke liye raste bahut haiñ

koi rasta kahin jae to jaanen

badalne ke liye raste bahut hain

phir usī qabr ke barābar se

zinda rahne kā rāsta niklā

phir usi qabr ke barabar se

zinda rahne ka rasta nikla

jo rukāvaT thī hamārī raah kī

rāsta niklā usī dīvār se

jo rukawaT thi hamari rah ki

rasta nikla usi diwar se

yaqīnan rahbar-e-manzil kahīñ par rāstā bhūlā

vagarna qāfile ke qāfile gum ho nahīñ sakte

yaqinan rahbar-e-manzil kahin par rasta bhula

wagarna qafile ke qafile gum ho nahin sakte

musāfir tirā zikr karte rahe

mahaktā rahā rāsta der tak

musafir tera zikr karte rahe

mahakta raha rasta der tak

maiñ ḳhud hī apne ta.āqub meñ phir rahā huuñ abhī

uThā ke tū merī rāhoñ se rāstā le jā

main KHud hi apne taaqub mein phir raha hun abhi

uTha ke tu meri rahon se rasta le ja

ajab nahīñ ki ye dariyā nazar kā dhokā ho

ajab nahīñ ki koī rāsta nikal aa.e

ajab nahin ki ye dariya nazar ka dhoka ho

ajab nahin ki koi rasta nikal aae

dilchasp ho ga.ī tire chalne se rahguzar

uTh uTh ke gard-e-rāh lipaTtī hai raah se

dilchasp ho gai tere chalne se rahguzar

uTh uTh ke gard-e-rah lipaTti hai rah se

jahāñ tak paañv mere jā sake haiñ

vahīñ tak rāsta Thahrā huā hai

jahan tak panw mere ja sake hain

wahin tak rasta Thahra hua hai

vo jis muñDer pe chhoḌ aayā apnī āñkheñ maiñ

charāġh hotā to lau bhuul kar chalā jaatā

wo jis munDer pe chhoD aaya apni aankhen main

charagh hota to lau bhul kar chala jata

maiñ us kī dhun meñ na.e rāste pe jā niklī

dayār-e-jāñ se mirī roz jo guzartā rahā

main us ki dhun mein nae raste pe ja nikli

dayar-e-jaan se meri roz jo guzarta raha

rasta bhī hamī log the raahī bhī hamīñ the

aur apnī masāfat kī gavāhī bhī hamīñ the

rasta bhi hami log the rahi bhi hamin the

aur apni masafat ki gawahi bhi hamin the