Sher on Zindagi

vahīñ pe jhaaḌ ke uThte haiñ phir matā’-e-hayāt

ki zindagī ko jahāñ jis ke naam karte haiñ

wahin pe jhaD ke uThte hain phir mata’-e-hayat

ki zindagi ko jahan jis ke nam karte hain

hamārī zindagī to muḳhtasar sī ik kahānī thī

bhalā ho maut kā jis ne banā rakkhā hai afsāna

hamari zindagi to muKHtasar si ek kahani thi

bhala ho maut ka jis ne bana rakkha hai afsana

zindagī shāyad isī kā naam hai

dūriyāñ majbūriyāñ tanhā.iyāñ

zindagi shayad isi ka nam hai

duriyan majburiyan tanhaiyan

zindagī firdaus-e-gum-gashta ko pā saktī nahīñ

maut hī aatī hai ye manzil dikhāne ke liye

zindagi firdaus-e-gum-gashta ko pa sakti nahin

maut hi aati hai ye manzil dikhane ke liye

koī vaqt batlā ki tujh se milūñ

mirī dauḌtī bhāgtī zindagī

koi waqt batla ki tujh se milun

meri dauDti bhagti zindagi

zindagī hai apne qabze meñ na apne bas meñ maut

aadmī majbūr hai aur kis qadar majbūr hai

zindagi hai apne qabze mein na apne bas mein maut

aadmi majbur hai aur kis qadar majbur hai

zindagī zinda-dilī kā hai naam

murda-dil ḳhaak jiyā karte haiñ

zindagi zinda-dili ka hai nam

murda-dil KHak jiya karte hain

zindagī tujh se bhī kyā ḳhuub ta.alluq hai mirā

jaise sūkhe hue patte se havā kā rishta

zindagi tujh se bhi kya KHub talluq hai mera

jaise sukhe hue patte se hawa ka rishta

baḌā ghāTe kā saudā hai 'sadā' ye saañs lenā bhī

baḌhe hai umr jyūñ-jyūñ zindagī kam hotī jaatī hai

baDa ghaTe ka sauda hai 'sada' ye sans lena bhi

baDhe hai umr jyun-jyun zindagi kam hoti jati hai

zindagī mā.il-e-fariyād-o-fuġhāñ aaj bhī hai

kal bhī thā siine pe ik sañg-e-girāñ aaj bhī hai

zindagi mail-e-fariyaad-o-fughan aaj bhi hai

kal bhi tha sine pe ek sang-e-giran aaj bhi hai

zindagī vaadī o sahrā kā safar hai kyuuñ hai

itnī vīrān mirī rāh-guzar hai kyuuñ hai

zindagi wadi o sahra ka safar hai kyun hai

itni viran meri rah-guzar hai kyun hai

'munīr' is ḳhūbsūrat zindagī ko

hamesha ek sā honā nahīñ hai

'munir' is KHubsurat zindagi ko

hamesha ek sa hona nahin hai

maut kahte haiñ jis ko ai 'sāġhar'

zindagī kī koī kaḌī hogī

maut kahte hain jis ko ai 'saghar'

zindagi ki koi kaDi hogi

zindagī ab tujhe sañvāreñ kyā

koshisheñ saarī be-asar shāyad

zindagi ab tujhe sanwaren kya

koshishen sari be-asar shayad

ham kaise zinda haiñ ab tak

ham ko bhī hairat hotī hai

hum kaise zinda hain ab tak

hum ko bhi hairat hoti hai

kahānī hai to itnī hai fareb-e-ḳhvāb-e-hastī kī

ki āñkheñ band huuñ aur aadmī afsāna ho jaa.e

kahani hai to itni hai fareb-e-KHwab-e-hasti ki

ki aankhen band hun aur aadmi afsana ho jae

kuchh din se zindagī mujhe pahchāntī nahīñ

yuuñ dekhtī hai jaise mujhe jāntī nahīñ

kuchh din se zindagi mujhe pahchanti nahin

yun dekhti hai jaise mujhe jaanti nahin

maut kā bhī ilaaj ho shāyad

zindagī kā koī ilaaj nahīñ

maut ka bhi ilaj ho shayad

zindagi ka koi ilaj nahin

kis tarah jamā kījiye ab apne aap ko

kāġhaz bikhar rahe haiñ purānī kitāb ke

kis tarah jama kijiye ab apne aap ko

kaghaz bikhar rahe hain purani kitab ke

mirā tajraba hai ki is zindagī meñ

pareshāniyāñ hī pareshāniyāñ haiñ

mera tajraba hai ki is zindagi mein

pareshaniyan hi pareshaniyan hain

dard baḌh kar davā na ho jaa.e

zindagī be-mazā na ho jaa.e

dard baDh kar dawa na ho jae

zindagi be-maza na ho jae

musībat aur lambī zindagānī

buzurgoñ kī duā ne maar Daalā

musibat aur lambi zindagani

buzurgon ki dua ne mar Dala

zindagī kī zarūratoñ kā yahāñ

hasratoñ meñ shumār hotā hai

zindagi ki zaruraton ka yahan

hasraton mein shumar hota hai

zindagī naam isī mauj-e-mai-e-nāb kā hai

mai-kade se jo uThe dār-o-rasan tak pahuñche

zindagi nam isi mauj-e-mai-e-nab ka hai

mai-kade se jo uThe dar-o-rasan tak pahunche

zindagī aur zindagī kī yādgār

parda aur parde pe kuchh parchhā.iyāñ

zindagi aur zindagi ki yaadgar

parda aur parde pe kuchh parchhaiyan

bandhan sā ik bañdhā thā rag-o-pai se jism meñ

marne ke ba.ad haath se motī bikhar ga.e

bandhan sa ek bandha tha rag-o-pai se jism mein

marne ke baad hath se moti bikhar gae

kabhī saaya hai kabhī dhuup muqaddar merā

hotā rahtā hai yuuñ hī qarz barābar merā

kabhi saya hai kabhi dhup muqaddar mera

hota rahta hai yun hi qarz barabar mera

ye maanā zindagī hai chaar din kī

bahut hote haiñ yaaro chaar din bhī

ye mana zindagi hai chaar din ki

bahut hote hain yaro chaar din bhi

tez havā ne mujh se pūchhā

ret pe kyā likhte rahte ho

tez hawa ne mujh se puchha

ret pe kya likhte rahte ho

kitnā sochā thā dil lagā.eñge

sochte sochte hayāt huī

kitna socha tha dil lagaenge

sochte sochte hayat hui

mirī zindagī to guzrī tire hijr ke sahāre

mirī maut ko bhī pyāre koī chāhiye bahāna

meri zindagi to guzri tere hijr ke sahaare

meri maut ko bhi pyare koi chahiye bahana

dard ulfat kā na ho to zindagī kā kyā mazā

āh-o-zārī zindagī hai be-qarārī zindagī

dard ulfat ka na ho to zindagi ka kya maza

aah-o-zari zindagi hai be-qarari zindagi

ham ġham-zada haiñ laa.eñ kahāñ se ḳhushī ke giit

deñge vahī jo pā.eñge is zindagī se ham

hum gham-zada hain laen kahan se KHushi ke git

denge wahi jo paenge is zindagi se hum

zindagī kis tarah basar hogī

dil nahīñ lag rahā mohabbat meñ

zindagi kis tarah basar hogi

dil nahin lag raha mohabbat mein

ye zindagī bhī ajab kārobār hai ki mujhe

ḳhushī hai paane kī koī na rañj khone kā

ye zindagi bhi ajab karobar hai ki mujhe

KHushi hai pane ki koi na ranj khone ka

kam se kam maut se aisī mujhe ummīd nahīñ

zindagī tū ne to dhoke pe diyā hai dhoka

kam se kam maut se aisi mujhe ummid nahin

zindagi tu ne to dhoke pe diya hai dhoka

tum mohabbat ko khel kahte ho

ham ne barbād zindagī kar lī

tum mohabbat ko khel kahte ho

hum ne barbaad zindagi kar li

kuchh is tarah se guzārī hai zindagī jaise

tamām umr kisī dūsre ke ghar meñ rahā

kuchh is tarah se guzari hai zindagi jaise

tamam umr kisi dusre ke ghar mein raha

ek musht-e-ḳhāk aur vo bhī havā kī zad meñ hai

zindagī kī bebasī kā isti.āra dekhnā

ek musht-e-KHak aur wo bhi hawa ki zad mein hai

zindagi ki bebasi ka istiara dekhna

zindagī ḳhvāb dekhtī hai magar

zindagī zindagī hai ḳhvāb nahīñ

zindagi KHwab dekhti hai magar

zindagi zindagi hai KHwab nahin

tundī-e-sail-e-vaqt meñ ye bhī hai koī zindagī

sub.h huī to jī uThe, raat huī to mar ga.e

tundi-e-sail-e-waqt mein ye bhi hai koi zindagi

subh hui to ji uThe, raat hui to mar gae

us zāviye se dekhiye ā.īna-e-hayāt

jis zāviye se maiñ ne lagāyā hai dhuup meñ

us zawiye se dekhiye aaina-e-hayat

jis zawiye se main ne lagaya hai dhup mein

bahut qarīb rahī hai ye zindagī ham se

bahut aziiz sahī e'tibār kuchh bhī nahīñ

bahut qarib rahi hai ye zindagi hum se

bahut aziz sahi e'tibar kuchh bhi nahin

ḳhudā-yā apne kun kī laaj rakh le

tirā shahkār zaa.e' ho rahā hai

KHuda-ya apne kun ki laj rakh le

tera shahkar zae' ho raha hai

mujhe ye Dar hai dil-e-zinda tū na mar jaa.e

ki zindagānī ibārat hai tere jiine se

mujhe ye Dar hai dil-e-zinda tu na mar jae

ki zindagani ibarat hai tere jine se

zindagī aur haiñ kitne tire chehre ye batā

tujh se ik umr kī hālāñki shanāsā.ī hai

zindagi aur hain kitne tere chehre ye bata

tujh se ek umr ki haalanki shanasai hai

jo unheñ vafā kī sūjhī to na ziist ne vafā kī

abhī aa ke vo na baiThe ki ham uTh ga.e jahāñ se

jo unhen wafa ki sujhi to na zist ne wafa ki

abhi aa ke wo na baiThe ki hum uTh gae jahan se

zindagī parchhā.iyāñ apnī liye

ā.inoñ ke darmiyāñ se aa.ī hai

zindagi parchhaiyan apni liye

aainon ke darmiyan se aai hai

yuuñ zindagī guzār rahā huuñ tire baġhair

jaise koī gunāh kiye jā rahā huuñ maiñ

yun zindagi guzar raha hun tere baghair

jaise koi gunah kiye ja raha hun main

ġharaz ki kaaT diye zindagī ke din ai dost

vo terī yaad meñ hoñ yā tujhe bhulāne meñ

gharaz ki kaT diye zindagi ke din ai dost

wo teri yaad mein hon ya tujhe bhulane mein