Sher on Mechanical Life

gharoñ pe naam the nāmoñ ke saath ohde the

bahut talāsh kiyā koī aadmī na milā

gharon pe nam the namon ke sath ohde the

bahut talash kiya koi aadmi na mila

hai ajiib shahr kī zindagī na safar rahā na qayām hai

kahīñ kārobār sī dopahar kahīñ bad-mizāj sī shaam hai

hai ajib shahr ki zindagi na safar raha na qayam hai

kahin karobar si dopahar kahin bad-mizaj si sham hai

girjā meñ mandiroñ meñ azānoñ meñ baT gayā

hote hī sub.h aadmī ḳhānoñ meñ baT gayā

girja mein mandiron mein azanon mein baT gaya

hote hi subh aadmi KHanon mein baT gaya

sub.h hote hī nikal aate haiñ bāzār meñ log

gaThriyāñ sar pe uThā.e hue īmanoñ kī

subh hote hi nikal aate hain bazar mein log

gaThriyan sar pe uThae hue imanon ki

ham tohfe meñ ghaḌiyāñ to de dete haiñ

ik duuje ko vaqt nahīñ de paate haiñ

hum tohfe mein ghaDiyan to de dete hain

ek duje ko waqt nahin de pate hain

nizām-e-zar meñ kisī aur kaam kā kyā ho

bas aadmī hai kamāne kā aur khāne kā

nizam-e-zar mein kisi aur kaam ka kya ho

bas aadmi hai kamane ka aur khane ka