Sher on Mahroomi

ye bhī ik rang hai shāyad mirī mahrūmī kā

koī hañs de to mohabbat kā gumāñ hotā hai

ye bhi ek rang hai shayad meri mahrumi ka

koi hans de to mohabbat ka guman hota hai

bas ek baar manāyā thā jashn-e-mahrūmī

phir us ke baad koī ibtilā nahīñ aa.ī

bas ek bar manaya tha jashn-e-mahrumi

phir us ke baad koi ibtila nahin aai

ik aabla thā so bhī gayā ḳhār-e-ġham se phaT

terī girah meñ kyā dil-e-andoh-gīñ rahā

ek aabla tha so bhi gaya KHar-e-gham se phaT

teri girah mein kya dil-e-andoh-gin raha

tum in lakīroñ meñ ik ḳhushī bhī talāsh kar lo to mo.ajiza hai

ki maiñ to bachpan se jāntā huuñ mirī hathelī kā naam dukh hai

tum in lakiron mein ek KHushi bhi talash kar lo to moajiza hai

ki main to bachpan se jaanta hun meri hatheli ka nam dukh hai

kisī bhī hashr se mahrūm hī rahā vo bhī

mirī tarah kā jo kirdār thā kahānī meñ

kisi bhi hashr se mahrum hi raha wo bhi

meri tarah ka jo kirdar tha kahani mein

kabhī to baaḌh aa ke apne saath sab bahā ga.ī

kabhī kisān bārishoñ kī raah dekhtā rahā

kabhi to baDh aa ke apne sath sab baha gai

kabhi kisan barishon ki rah dekhta raha

fursat ke vaqt ishq se mahrūm maiñ rahā

phir aisā vaqt aayā ki fursat nahīñ bachī

fursat ke waqt ishq se mahrum main raha

phir aisa waqt aaya ki fursat nahin bachi

logoñ kā ik hujūm thā matlab ke vāste

chāhe jo dil se ek bhī aisā nahīñ milā

logon ka ek hujum tha matlab ke waste

chahe jo dil se ek bhi aisa nahin mila

yaas mahrūmī tazabzub karb ḳhush-fahmī anā

itne sāmāñ the mirā tanhā makāñ chhoTā lagā

yas mahrumi tazabzub karb KHush-fahmi ana

itne saman the mera tanha makan chhoTa laga

shikva-e-be-chārgī 'maikash' kisī se kyoñ kareñ

'ishq to mahrūmī-e-dil ke sivā kuchh bhī nahīñ

shikwa-e-be-chaargi 'maikash' kisi se kyon karen

'ishq to mahrumi-e-dil ke siwa kuchh bhi nahin