کچے مکان جتنے تھے بارش میں بہہ گئے

ورنہ جو میرا دکھ تھا وہ دکھ عمر بھر کا تھا

لوگ نظروں کو بھی پڑھ لیتے ہیں

اپنی آنکھوں کو جھکائے رکھنا

نہ جانے لوگ ٹھہرتے ہیں وقت شام کہاں

ہمیں تو گھر میں بھی رکنے کا حوصلا نہ ہوا

اخترؔ گزرتے لمحوں کی آہٹ پہ یوں نہ چونک

اس ماتمی جلوس میں اک زندگی بھی ہے

وہ پیڑ تو نہیں تھا کہ اپنی جگہ رہے

ہم شاخ تو نہیں تھے مگر پھر بھی کٹ گئے

میں نے جو خواب ابھی دیکھا نہیں ہے اخترؔ

میرا ہر خواب اسی خواب کی تعبیر بھی ہے

کب دھوپ چلی شام ڈھلی کس کو خبر ہے

اک عمر سے میں اپنے ہی سائے میں کھڑا ہوں

وہ کم سخن تھا مگر ایسا کم سخن بھی نہ تھا

کہ سچ ہی بولتا تھا جب بھی بولتا تھا بہت

تھی تتلیوں کے تعاقب میں زندگی میری

وہ شہر کیا ہوا جس کی تھی ہر گلی میری

میلے کپڑوں کا اپنا رنگ بھی تھا

پھر بھی قسمت میں جگ ہنسائی تھی

وہ شاید کوئی سچی بات کہہ دے

اسے پھر بد گماں کرنا پڑا ہے

گزرتے وقت نے کیا کیا نہ چارہ سازی کی

وگرنہ زخم جو اس نے دیا تھا کاری تھا

چمن کے رنگ و بو نے اس قدر دھوکا دیا مجھ کو

کہ میں نے شوق گل بوسی میں کانٹوں پر زباں رکھ دی

کیا لوگ ہیں کہ دل کی گرہ کھولتے نہیں

آنکھوں سے دیکھتے ہیں مگر بولتے نہیں

الماری میں تصویریں رکھتا ہوں

اب بچپن اور بڑھاپا ایک ہوئے

روح کی گہرائی میں پاتا ہوں پیشانی کے زخم

صرف چاہا ہی نہیں میں نے اسے پوجا بھی ہے

دھوپ کی گرمی سے اینٹیں پک گئیں پھل پک گئے

اک ہمارا جسم تھا اختر جو کچا رہ گیا

ہمیں خبر ہے کوئی ہم سفر نہ تھا پھر بھی

یقیں کی منزلیں طے کیں گماں کے ہوتے ہوئے

کچھ اتنے ہو گئے مانوس سناٹوں سے ہم اخترؔ

گزرتی ہے گراں اپنی صدا بھی اب تو کانوں پر

اے جلتی رتو گواہ رہنا

ہم ننگے پاؤں چل رہے ہیں

یہی دن میں ڈھلے گی رات اخترؔ

یہی دن کا اجالا رات ہوگا

ہوا میں خوشبوئیں میری پہچان بن گئی تھیں

میں اپنی مٹی سے پھول بن کر ابھر رہا تھا

زلزلہ آیا تو دیواروں میں دب جاؤں گا

لوگ بھی کہتے ہیں یہ گھر بھی ڈراتا ہے مجھے

کسی سے مجھ کو گلہ کیا کہ کچھ کہوں اخترؔ

کہ میری ذات ہی خود راستے کا پتھر ہے

سیلاب امنڈ کے شہر کی گلیوں میں آ گئے

لیکن غریب شہر کا دامن نہ تر ہوا

پرانے خوابوں سے ریزہ ریزہ بدن ہوا ہے

یہ چاہتا ہوں کہ اب نیا کوئی خواب دیکھوں

جس قدر نیچے اترتا ہوں میں

جھیل بھی گہری ہوئی جاتی ہے

تمام حرف مرے لب پہ آ کے جم سے گئے

نہ جانے میں کہا کیا اور اس نے سمجھا کیا

مری گلی کے مکیں یہ مرے رفیق سفر

یہ لوگ وہ ہیں جو چہرے بدلتے رہتے ہیں

کسے خبر کہ گہر کیسے ہاتھ آتے ہیں

سمندروں سے بھی گہری ہے خامشی میری

میں اپنی ذات کی تشریح کرتا پھرتا تھا

نہ جانے پھر کہاں آواز کھو گئی میری

دیکھا ہے یہ پرچھائیں کی دنیا میں کہ اکثر

اپنے قد و قامت سے بھی کچھ لوگ بڑے ہیں

شاید اپنا ہی تعاقب ہے مجھے صدیوں سے

شاید اپنا ہی تصور لئے جاتا ہے مجھے

خواہشیں خون میں اتری ہیں صحیفوں کی طرح

ان کتابوں میں ترے ہاتھ کی تحریر بھی ہے

وہی مٹی ہے سب کے چہروں پر

آئنہ سب سے با خبر ہے یہاں

سر پہ طوفان بھی ہے سامنے گرداب بھی ہے

میری ہمت کہ وہی کچا گھڑا ہے دیکھو

بارہا ٹھٹھکا ہوں خود بھی اپنا سایہ دیکھ کر

لوگ بھی کترائے کیا کیا مجھ کو تنہا دیکھ کر

میں اب بھی رات گئے اس کی گونج سنتا ہوں

وہ حرف کم تھا بہت کم مگر صدا تھا بہت

یہ سرگزشت زمانہ یہ داستان حیات

ادھوری بات میں بھی رہ گئی کمی میری

کچھ مجھے بھی یہاں قرار نہیں

کچھ ترا غم بھی در بہ در ہے یہاں

یہ کیا کہ مجھ کو چھپایا ہے میری نظروں سے

کبھی تو مجھ کو مرے سامنے بھی لائے وہ

زمانہ اپنی عریانی پہ خوں روئے گا کب تک

ہمیں دیکھو کہ اپنے آپ کو اوڑھے ہوئے ہیں

نکل کر آ گئے ہیں جنگلوں میں

مکاں کو لا مکاں کرنا پڑا ہے

وہ بھی سچ کہتے ہیں اخترؔ لوگ بیگانے ہوئے

ہم بھی سچے ہیں کہ دنیا کا چلن ایسا نہ تھا

ٹکرا کے سر کو اپنا لہو آپ چاٹتے

اچھا ہوا کہ دشت میں دیوار و در نہ تھے

یہ کہیں عمر گزشتہ تو نہیں تم تو نہیں

کوئی پھرتا ہے سر شہر وفا آوارہ

زندگی مرگ طلب ترک طلب اخترؔ نہ تھی

پھر بھی اپنے تانے بانے میں مجھے الجھا گئی