ہم سیں مستوں کو بس ہے تیری نگاہ

صبح اٹھ کر خمار کی خاطر

میں اس کی چشم سے ایسا گرا ہوں

مرے رونے پہ ہنستا ہے مرا دل

گلشن دہر میں سو رنگ ہیں حاتمؔ اس کے

وہ کہیں گل ہے کہیں بو ہے کہیں بوٹا ہے

قیامت تک جدا ہووے نہ یارب

جنوں کے دست سے میرا گریباں

رات دن جاری ہیں کچھ پیدا نہیں ان کا کنار

میرے چشموں کا دو آبا مجمع البحرین ہے

نہیں ہے شکوہ اگر وہ نظر نہیں آتا

کسو نے دیکھی نہیں اپنی جان کی صورت

کوہ کن جاں کنی ہے مشکل کام

ورنہ بہتیرے ہیں پتھر پھوڑے

ناصح بغل میں آ کر دشمن ہوا ہمارا

جائے گا کب الٰہی مجلس سے خار دل کا

گدا کو گر قناعت ہو تو پھاٹا چیتھڑا بس ہے

وگرنہ حرص آگے تھان سو گز کا لنگوٹی ہے

جس کے منہ کی اتر گئی لوئی

غم نہیں اس کو کچھ کہو کوئی

رشتۂ عمر دراز اپنا میں کوتاہ کروں

آوے یہ تار اگر تیرے بکار دامن

تری محراب میں ابرو کی یہ خال

کدھر سے آ گیا مسجد میں ہندو

کیوں کر ان کالی بلاؤں سے بچے گا عاشق

خط سیہ خال سیہ زلف سیہ چشم سیاہ

عارض سے اس کے زلف میں کیوں کر ہے روشنی

ظلمات میں تو نام نہیں آفتاب کا

کیوں مزاحم ہے میرے آنے سے

کوئی ترا گھر نہیں یہ رستا ہے

کپڑے سفید دھو کے جو پہنے تو کیا ہوا

دھونا وہی جو دل کی سیاہی کو دھوئیے

پھڑکوں تو سر پھٹے ہے نہ پھڑکوں تو جی گھٹے

تنگ اس قدر دیا مجھے صیاد نے قفس

کبھو جو شیخ دکھاؤں میں اپنے بت کے تئیں

بہ رب کعبہ تجھے حسرت حرم نہ رہے

نہ میں نے کچھ کہا تجھ سے نہ تو نے مجھ سے کچھ پوچھا

یوں ہی دن رات ملتے مجھ کو تجھ کو میری جاں گزرا

ٹوٹے دل کو بنا دکھاوے

ایسا کوئی کاری گر نہ دیکھا

کس سے کہوں میں حال دل اپنا کہ تا سنے

اس شہر میں رہا بھی کوئی درد مند ہے

زاہد کو ہم نے دیکھ خرابات میں کہا

مسجد کو اپنی چھوڑ کہو تم یہاں کہاں

کیا مدرسے میں دہر کے الٹی ہوا بہی

واعظ نہی کو امر کہے امر کو نہی

کیسر میں اس طرح سے آلودہ ہے سراپا

سنتے تھے ہم سو دیکھا تو شاخ زعفراں ہے

دل عشاق پرندوں کی طرح اڑتے ہیں

اس بیابان میں کیا ایک بھی صیاد نہیں

دوستوں سے دشمنی اور دشمنوں سے دوستی

بے مروت بے وفا بے رحم یہ کیا ڈھنگ ہے

صبر بن اور کچھ نہ لو ہم راہ

کوچۂ عشق تنگ ہے یارو

خوبان جہاں ہوں جس سے تسخیر

ایسا کوئی ہم نے ہنر نہ دیکھا

مری باتوں سے اب آزردہ نہ ہونا ساقی

اس گھڑی عقل مری مجھ سے جدا پھرتی ہے

رونے تلک تو کس کو ہے فرصت یہاں سحاب

طوفاں ہوا بھی جو ٹک اک آب دیدہ ہوں

دیکھ کر ہر عضو ان کا دل ہو پانی بہہ چلا

کھول چھاتی بے تکلف جب نہائیں باغ میں

ہستی سے تا عدم ہے سفر دو قدم کی راہ

کیا چاہیئے ہے ہم کو سر انجام کے لیے

ہم بہت دیکھے فرنگستان کے حسن صبیح

چرب ہے سب پر بتان ہند کا رنگ ملیح

دل کی لہروں کا طول و عرض نہ پوچھ

کبھو دریا کبھو سفینہ ہے

وہ وحشی اس قدر بھڑکا ہے صورت سے مرے یارو

کہ اپنے دیکھ سائے کو مجھے ہم راہ جانے ہے

الٰہی تجھ سے اب کہتا ہے حاتمؔ اس زمانے میں

شرم رکھنا بھرم رکھنا دھرم رکھنا کرم رکھنا

اتنا میں انتظار کیا اس کی راہ میں

جو رفتہ رفتہ دل مرا بیمار ہو گیا

تیرے آنے سے یو خوشی ہے دل

جوں کہ بلبل بہار کی خاطر

کوئی ہے سرخ پوش کوئی زرد پوش ہے

آ دیکھ بزم میں کہ ہوئی ہے بہار جام

وصف انکھیوں کا لکھا ہم نے گل بادام پر

کر کے نرگس کو قلم اور چشم آہو کی دوات

رہن شراب خانہ کیا شیخ حیف ہے

جو پیرہن بنایا تھا احرام کے لیے

مستوں کا دل ہے شیشہ اور سنگ دل ہے ساقی

اچرج ہے جو نہ ٹوٹے پتھر سے آبگینہ

تری نگہ سے گئے کھل کواڑ چھاتی کے

حصار قلب کی گویا تھی فتح تیرے نام

بس نہیں چلتا جو اس دم ان کے اوپر گر پڑے

عاشق و معشوق کو جب ایک جا پاتا ہے چرخ

سنو ہندو مسلمانو کہ فیض عشق سے حاتمؔ

ہوا آزاد قید مذہب و مشرب سے اب فارغ

جا بھڑاتا ہے ہمیشہ مجھے خوں خواروں سے

دل بغل بیچ مرا دشمن جاں ہے گویا

فانوس تن میں دیکھ لے روشن ہیں جوں چراغ

جو داغ دل پہ عشق میں تیرے دیے ہیں ہم

حاجت چراغ کی ہے کب انجمن میں دل کے

مانند شمع روشن ہر ایک استخواں ہے

کبھو پہنچی نہ اس کے دل تلک رہ ہی میں تھک بیٹھی

بجا اس آہ بے تاثیر پر تاثیر ہنستی ہے

شمع ہر شام تیرے رونے پر

صبح دم تک چراغ ہنستا ہے