گل آتے ہیں ہستی میں عدم سے ہمہ تن گوش

بلبل کا یہ نالہ نہیں افسانہ ہے اس کا

کچھ نظر آتا نہیں اس کے تصور کے سوا

حسرت دیدار نے آنکھوں کو اندھا کر دیا

ٹھیک آئی تن پہ اپنے قبائے برہنگی

بانی لباس چھوٹے ہوئے یا بڑے ہوئے

سوائے رنج کچھ حاصل نہیں ہے اس خرابے میں

غنیمت جان جو آرام تو نے کوئی دم پایا

پا بہ گل بے خودیٔ شوق سے میں رہتا تھا

کوچۂ یار میں حالت مری دیوار کی تھی

ہمارا کعبۂ مقصود تیرا طاق ابرو ہے

تری چشم سیہ کو ہم نے آہوئے حرم پایا

آپ کی نازک کمر پر بوجھ پڑتا ہے بہت

بڑھ چلے ہیں حد سے گیسو کچھ انہیں کم کیجئے

دنیا و آخرت میں طلب گار ہیں ترے

حاصل تجھے سمجھتے ہیں دونوں جہاں میں ہم

عدم سے دہر میں آنا کسے گوارا تھا

کشاں کشاں مجھے لائی ہے آرزو تیری

کفر و اسلام کی کچھ قید نہیں اے آتشؔ

شیخ ہو یا کہ برہمن ہو پر انساں ہووے

جو دیکھتے تری زنجیر زلف کا عالم

اسیر ہونے کی آزاد آرزو کرتے

بندش الفاظ جڑنے سے نگوں کے کم نہیں

شاعری بھی کام ہے آتشؔ مرصع ساز کا

آدمی کیا وہ نہ سمجھے جو سخن کی قدر کو

نطق نے حیواں سے مشت خاک کو انساں کیا

میں وہ غم دوست ہوں جب کوئی تازہ غم ہوا پیدا

نہ نکلا ایک بھی میرے سوا امید واروں میں

یہ دل لگانے میں میں نے مزا اٹھایا ہے

ملا نہ دوست تو دشمن سے اتحاد کیا

چھٹ پٹا وقت ہے بہتا ہوا دریا ٹھہرا

صبح سے شام ہوئی دل نہ ہمارا ٹھہرا

دوستوں سے اس قدر صدمے اٹھائے جان پر

دل سے دشمن کی عداوت کا گلہ جاتا رہا

کوچۂ یار میں ہو روشنی اپنے دم کی

کعبہ و دیر کریں گبر و مسلماں آباد

وحشت دل نے کیا ہے وہ بیاباں پیدا

سیکڑوں کوس نہیں صورت انساں پیدا

یہ آرزو تھی تجھے گل کے روبرو کرتے

ہم اور بلبل بے تاب گفتگو کرتے

بستیاں ہی بستیاں ہیں گنبد افلاک میں

سیکڑوں فرسنگ مجنوں سے بیاباں رہ گیا

جو اعلی ظرف ہوتے ہیں ہمیشہ جھک کے ملتے ہیں

صراحی سرنگوں ہو کر بھرا کرتی ہے پیمانہ

ایسی اونچی بھی تو دیوار نہیں گھر کی ترے

رات اندھیری کوئی آوے گی نہ برسات میں کیا

اے صنم جس نے تجھے چاند سی صورت دی ہے

اسی اللہ نے مجھ کو بھی محبت دی ہے

پیام بر نہ میسر ہوا تو خوب ہوا

زبان غیر سے کیا شرح آرزو کرتے

عجب تیری ہے اے محبوب صورت

نظر سے گر گئے سب خوب صورت

آتش مست جو مل جائے تو پوچھوں اس سے

تو نے کیفیت اٹھائی ہے خرابات میں کیا

نہ پاک ہوگا کبھی حسن و عشق کا جھگڑا

وہ قصہ ہے یہ کہ جس کا کوئی گواہ نہیں

اس بلائے جاں سے آتشؔ دیکھیے کیوں کر بنے

دل سوا شیشے سے نازک دل سے نازک خوئے دوست

مہندی لگانے کا جو خیال آیا آپ کو

سوکھے ہوئے درخت حنا کے ہرے ہوئے

کسی کی محرم آب رواں کی یاد آئی

حباب کے جو برابر کبھی حباب آیا

کوئی بت خانہ کو جاتا ہے کوئی کعبہ کو

پھر رہے گبر و مسلماں ہیں تری گھات میں کیا

خدا دراز کرے عمر چرخ نیلی کی

یہ بیکسوں کے مزاروں کا شامیانہ ہے

بعد فرہاد کے پھر کوہ کنی میں نے کی

بعد مجنوں کے کیا میں نے بیاباں آباد

لباس کعبہ کا حاصل کیا شرف اس نے

جو کوئے یار میں کالی کوئی گھٹا آئی

کون سے دن ہاتھ میں آیا مرے دامان یار

کب زمین و آسماں کا فاصلہ جاتا رہا

یار کو میں نے مجھے یار نے سونے نہ دیا

رات بھر طالع بیدار نے سونے نہ دیا

قید مذہب کی گرفتاری سے چھٹ جاتا ہے

ہو نہ دیوانہ تو ہے عقل سے انساں خالی

قد میں تو کر چکا تھا وہ احمق برابری

مجبور سرو کو تری رفتار نے کیا

شیریں کے شیفتہ ہوئے پرویز و کوہ کن

شاعر ہوں میں یہ کہتا ہوں مضمون لڑ گیا

ہر شب شب برات ہے ہر روز روز عید

سوتا ہوں ہاتھ گردن مینا میں ڈال کے

مجھ میں اور شمع میں ہوتی تھی یہ باتیں شب ہجر

آج کی رات بچیں گے تو تو سحر دیکھیں گے

اٹھ گئی ہیں سامنے سے کیسی کیسی صورتیں

روئیے کس کے لیے کس کس کا ماتم کیجئے

فصل بہار آئی پیو صوفیو شراب

بس ہو چکی نماز مصلیٰ اٹھائیے

کوئی تو دوش سے بار سفر اتارے گا

ہزاروں راہزن امیدوار راہ میں ہے

آسمان اور زمیں کا ہے تفاوت ہر چند

اے صنم دور ہی سے چاند سا مکھڑا دکھلا

اے فلک کچھ تو اثر حسن عمل میں ہوتا

شیشہ اک روز تو واعظ کے بغل میں ہوتا

ترے ابروئے پیوستہ کا عالم میں فسانہ ہے

کسی استاد شاعر کا یہ بیت عاشقانہ ہے

نہ جب تک ہم پیالہ ہو کوئی میں مے نہیں پیتا

نہیں مہماں تو فاقہ ہے خلیل اللہ کے گھر میں

لگے منہ بھی چڑھانے دیتے دیتے گالیاں صاحب

زباں بگڑی تو بگڑی تھی خبر لیجے دہن بگڑا