Sher on Manzil

maiñ akelā hī chalā thā jānib-e-manzil magar

log saath aate ga.e aur kārvāñ bantā gayā

main akela hi chala tha jaanib-e-manzil magar

log sath aate gae aur karwan banta gaya

kisī ko ghar se nikalte hī mil ga.ī manzil

koī hamārī tarah umr bhar safar meñ rahā

kisi ko ghar se nikalte hi mil gai manzil

koi hamari tarah umr bhar safar mein raha

nahīñ nigāh meñ manzil to justujū hī sahī

nahīñ visāl mayassar to aarzū hī sahī

nahin nigah mein manzil to justuju hi sahi

nahin visal mayassar to aarzu hi sahi

uqābī ruuh jab bedār hotī hai javānoñ meñ

nazar aatī hai un ko apnī manzil āsmānoñ meñ

uqabi ruh jab bedar hoti hai jawanon mein

nazar aati hai un ko apni manzil aasmanon mein

jis din se chalā huuñ mirī manzil pe nazar hai

āñkhoñ ne kabhī miil kā patthar nahīñ dekhā

jis din se chala hun meri manzil pe nazar hai

aankhon ne kabhi mil ka patthar nahin dekha

'faiz' thī raah sar-ba-sar manzil

ham jahāñ pahuñche kāmyāb aa.e

'faiz' thi rah sar-ba-sar manzil

hum jahan pahunche kaamyab aae

sirf ik qadam uThā thā ġhalat rāh-e-shauq meñ

manzil tamām umr mujhe DhūñDhtī rahī

sirf ek qadam uTha tha ghalat rah-e-shauq mein

manzil tamam umr mujhe DhunDhti rahi

koī manzil ke qarīb aa ke bhaTak jaatā hai

koī manzil pe pahuñchtā hai bhaTak jaane se

koi manzil ke qarib aa ke bhaTak jata hai

koi manzil pe pahunchta hai bhaTak jaane se

us ne manzil pe lā ke chhoḌ diyā

umr bhar jis kā rāstā dekhā

us ne manzil pe la ke chhoD diya

umr bhar jis ka rasta dekha

nahīñ hotī hai rāh-e-ishq meñ āsān manzil

safar meñ bhī to sadiyoñ kī masāfat chāhiye hai

nahin hoti hai rah-e-ishq mein aasan manzil

safar mein bhi to sadiyon ki masafat chahiye hai

vo kyā manzil jahāñ se rāste aage nikal jaa.eñ

so ab phir ik safar kā silsila karnā paḌegā

wo kya manzil jahan se raste aage nikal jaen

so ab phir ek safar ka silsila karna paDega

mujhe aa gayā yaqīñ sā ki yahī hai merī manzil

sar-e-rāh jab kisī ne mujhe daf.atan pukārā

mujhe aa gaya yaqin sa ki yahi hai meri manzil

sar-e-rah jab kisi ne mujhe dafatan pukara

sab ko pahuñchā ke un kī manzil par

aap raste meñ rah gayā huuñ maiñ

sab ko pahuncha ke un ki manzil par

aap raste mein rah gaya hun main

ek manzil hai magar raah ka.ī haiñ 'az.har'

sochnā ye hai ki jāoge kidhar se pahle

ek manzil hai magar rah kai hain 'azhar'

sochna ye hai ki jaoge kidhar se pahle

koī manzil āḳhirī manzil nahīñ hotī 'fuzail'

zindagī bhī hai misāl-e-mauj-e-dariyā rāh-rau

koi manzil aaKHiri manzil nahin hoti 'fuzail'

zindagi bhi hai misal-e-mauj-e-dariya rah-rau

merī taqdīr meñ manzil nahīñ hai

ġhubār-e-kārvāñ hai aur maiñ huuñ

meri taqdir mein manzil nahin hai

ghubar-e-karwan hai aur main hun

manzil milī murād milī mudda.ā milā

sab kuchh mujhe milā jo tirā naqsh-e-pā milā

manzil mili murad mili muddaa mila

sab kuchh mujhe mila jo tera naqsh-e-pa mila

hasrat pe us musāfir-e-be-kas kī roiye

jo thak gayā ho baiTh ke manzil ke sāmne

hasrat pe us musafir-e-be-kas ki roiye

jo thak gaya ho baiTh ke manzil ke samne

ai jazba-e-dil gar maiñ chāhūñ har chiiz muqābil aa jaa.e

manzil ke liye do gaam chalūñ aur sāmne manzil aa jaa.e

ai jazba-e-dil gar main chahun har chiz muqabil aa jae

manzil ke liye do gam chalun aur samne manzil aa jae

mohabbat aap hī manzil hai apnī

na jaane husn kyuuñ itrā rahā hai

mohabbat aap hi manzil hai apni

na jaane husn kyun itra raha hai

manzil na milī to ġham nahīñ hai

apne ko to kho ke pā gayā huuñ

manzil na mili to gham nahin hai

apne ko to kho ke pa gaya hun

rāhbar rahzan na ban jaa.e kahīñ is soch meñ

chup khaḌā huuñ bhuul kar raste meñ manzil kā patā

rahbar rahzan na ban jae kahin is soch mein

chup khaDa hun bhul kar raste mein manzil ka pata

manzileñ gard ke mānind uḌī jaatī haiñ

vahī andāz-e-jahān-e-guzarāñ hai ki jo thā

manzilen gard ke manind uDi jati hain

wahi andaz-e-jahan-e-guzaran hai ki jo tha

mujh ko manzil bhī na pahchān sakī

maiñ ki jab gard-e-safar se niklā

mujh ko manzil bhi na pahchan saki

main ki jab gard-e-safar se nikla

chalā maiñ jānib-e-manzil to ye huā ma.alūm

yaqīñ gumān meñ gum hai gumāñ hai poshīda

chala main jaanib-e-manzil to ye hua malum

yaqin guman mein gum hai guman hai poshida

kis manzil-e-murād kī jānib ravāñ haiñ ham

ai rah-ravān-e-ḳhāk-basar pūchhte chalo

kis manzil-e-murad ki jaanib rawan hain hum

ai rah-rawan-e-KHak-basar puchhte chalo

na to ranj-o-ġham se hī rabt hai na hī āshnā-e-ḳhushī huuñ maiñ

mirī zindagī bhī ajiib hai ise manziloñ kā patā nahīñ

na to ranj-o-gham se hi rabt hai na hi aashna-e-KHushi hun main

meri zindagi bhi ajib hai ise manzilon ka pata nahin

ḳhud-baḳhud raah liye jaatī hai us kī jānib

ab kahāñ tak hai rasā.ī mujhe ma.alūm nahīñ

KHud-baKHud rah liye jati hai us ki jaanib

ab kahan tak hai rasai mujhe malum nahin

palaT aatā huuñ maiñ māyūs ho kar un maqāmoñ se

jahāñ se silsila nazdīk-tar hotā hai manzil kā

palaT aata hun main mayus ho kar un maqamon se

jahan se silsila nazdik-tar hota hai manzil ka