دلیل تابش ایماں ہے کفر کا احساس

چراغ شام سے پہلے جلا نہیں کرتے

مجھے تو قید محبت عزیز تھی لیکن

کسی نے مجھ کو گرفتار کر کے چھوڑ دیا

میرا عزم اتنا بلند ہے کہ پرائے شعلوں کا ڈر نہیں

مجھے خوف آتش گل سے ہے یہ کہیں چمن کو جلا نہ دے

بات جب ہے غم کے ماروں کو جلا دے اے شکیلؔ

تو یہ زندہ میتیں مٹی میں داب آیا تو کیا

رحمتوں سے نباہ میں گزری

عمر ساری گناہ میں گزری

یہ ادائے بے نیازی تجھے بے وفا مبارک

مگر ایسی بے رخی کیا کہ سلام تک نہ پہنچے

بے پیے شیخ فرشتہ تھا مگر

پی کے انسان ہوا جاتا ہے

کھل گیا ان کی آرزو میں یہ راز

زیست اپنی نہیں پرائی ہے

نئی صبح پر نظر ہے مگر آہ یہ بھی ڈر ہے

یہ سحر بھی رفتہ رفتہ کہیں شام تک نہ پہنچے

وہ ہم سے دور ہوتے جا رہے ہیں

بہت مغرور ہوتے جا رہے ہیں

ہم سے مے کش جو توبہ کر بیٹھیں

پھر یہ کار ثواب کون کرے

دل کی طرف شکیلؔ توجہ ضرور ہو

یہ گھر اجڑ گیا تو بسایا نہ جائے گا

غم کی دنیا رہے آباد شکیلؔ

مفلسی میں کوئی جاگیر تو ہے

بھیج دی تصویر اپنی ان کو یہ لکھ کر شکیلؔ

آپ کی مرضی ہے چاہے جس نظر سے دیکھیے

بدلتی جا رہی ہے دل کی دنیا

نئے دستور ہوتے جا رہے ہیں

غم عمر مختصر سے ابھی بے خبر ہیں کلیاں

نہ چمن میں پھینک دینا کسی پھول کو مسل کر

بے تعلق ترے آگے سے گزر جاتا ہے

یہ بھی اک حسن طلب ہے ترے دیوانے کا

اٹھا جو مینا بدست ساقی رہی نہ کچھ تاب ضبط باقی

تمام مے کش پکار اٹھے یہاں سے پہلے یہاں سے پہلے

جانے والے سے ملاقات نہ ہونے پائی

دل کی دل میں ہی رہی بات نہ ہونے پائی

خوش ہوں کہ مرا حسن طلب کام تو آیا

خالی ہی سہی میری طرف جام تو آیا

ہر چیز نہیں ہے مرکز پر اک ذرہ ادھر اک ذرہ ادھر

نفرت سے نہ دیکھو دشمن کو شاید وہ محبت کر بیٹھے

لمحہ لمحہ بار ہے تیرے بغیر

زندگی دشوار ہے تیرے بغیر

نہ پیمانے کھنکتے ہیں نہ دور جام چلتا ہے

نئی دنیا کے رندوں میں خدا کا نام چلتا ہے

سنا ہے زندگی ویرانیوں نے لوٹ لی مل کر

نہ جانے زندگی کے ناز برداروں پہ کیا گزری

نظر نواز نظاروں میں جی نہیں لگتا

وہ کیا گئے کہ بہاروں میں جی نہیں لگتا

پھر وہی جہد مسلسل پھر وہی فکر معاش

منزل جاناں سے کوئی کامیاب آیا تو کیا

یہ کس خطا پہ روٹھ گئی چشم التفات

یہ کب کا انتقام لیا مجھ غریب سے

تم پھر اسی ادا سے انگڑائی لے کے ہنس دو

آ جائے گا پلٹ کر گزرا ہوا زمانہ

کیا اثر تھا جذبۂ خاموش میں

خود وہ کھچ کر آ گئے آغوش میں

کافی ہے مرے دل کی تسلی کو یہی بات

آپ آ نہ سکے آپ کا پیغام تو آیا

شگفتگئ دل کارواں کو کیا سمجھے

وہ اک نگاہ جو الجھی ہوئی بہار میں ہے

ان کا ذکر ان کی تمنا ان کی یاد

وقت کتنا قیمتی ہے آج کل

مجھے دوست کہنے والے ذرا دوستی نبھا دے

یہ مطالبہ ہے حق کا کوئی التجا نہیں ہے

غم حیات بھی آغوش حسن یار میں ہے

یہ وہ خزاں ہے جو ڈوبی ہوئی بہار میں ہے

چاہئے خود پہ یقین کامل

حوصلہ کس کا بڑھاتا ہے کوئی

بزدلی ہوگی چراغوں کو دکھانا آنکھیں

ابر چھٹ جائے تو سورج سے ملانا آنکھیں

کیسے کہہ دوں کہ ملاقات نہیں ہوتی ہے

روز ملتے ہیں مگر بات نہیں ہوتی ہے

کیا حسیں خواب محبت نے دکھایا تھا ہمیں

کھل گئی آنکھ تو تعبیر پہ رونا آیا

وہی کارواں، وہی راستے وہی زندگی وہی مرحلے

مگر اپنے اپنے مقام پر کبھی تم نہیں کبھی ہم نہیں

سب کرشمات تصور ہیں شکیلؔ

ورنہ آتا ہے نہ جاتا ہے کوئی

مجھے چھوڑ دے میرے حال پر ترا کیا بھروسہ ہے چارہ گر

یہ تری نوازش مختصر میرا درد اور بڑھا نہ دے

شاید مری نگاہ میں ہے عظمت وجود

قطرے سے کہہ رہا ہوں کہ دریا سے بچ کے چل

جب ہوا ذکر زمانے میں محبت کا شکیلؔ

مجھ کو اپنے دل ناکام پہ رونا آیا

چھپے ہیں لاکھ حق کے مرحلے گم نام ہونٹوں پر

اسی کی بات چل جاتی ہے جس کا نام چلتا ہے

لمحات یاد یار کو صرف دعا نہ کر

آتے ہیں زندگی میں یہ عالم کبھی کبھی

رند خراب نوش کی بے ادبی تو دیکھیے

نیت مے کشی نہ کی ہاتھ میں جام لے لیا

شکیلؔ اس درجہ مایوسی شروع عشق میں کیسی

ابھی تو اور ہونا ہے خراب آہستہ آہستہ

صدق و صفائے قلب سے محروم ہے حیات

کرتے ہیں بندگی بھی جہنم کے ڈر سے ہم

مری زندگی پہ نہ مسکرا مجھے زندگی کا الم نہیں

جسے تیرے غم سے ہو واسطہ وہ خزاں بہار سے کم نہیں

زہے نصیب کہ دنیا نے تیرے غم نے مجھے

مسرتوں کا طلب گار کر کے چھوڑ دیا