مرے لبوں کا تبسم تو سب نے دیکھ لیا

جو دل پہ بیت رہی ہے وہ کوئی کیا جانے

کوئی سمجھائے یہ کیا رنگ ہے میخانے کا

آنکھ ساقی کی اٹھے نام ہو پیمانے کا

چشم ساقی مجھے ہر گام پہ یاد آتی ہے

راستا بھول نہ جاؤں کہیں میخانے کا

کون جانے کہ اک تبسم سے

کتنے مفہوم غم نکلتے ہیں

اقبالؔ ہمارا جوش طلب کیا جانے کدھر لے جائے گا

نکلے ہیں تلاش منزل میں اور راہ گزر معلوم نہیں

دیکھ کر بھی انہیں نہ دیکھ سکے

رہ گیا شوق انتظار اپنا

عصمت توبہ کو ٹھکرانے کا موسم آ گیا

آ گیا پی کر بہک جانے کا موسم آ گیا

ایک انداز تبسم میں ہے گم سارا چمن

یہ خبر کس کو کلی کی جان کس مشکل میں ہے

یہ بے خودئ نظر ہے کہ انتہائی طلب

ترے ہی ساتھ لیے تیرا انتظار چلے

ایک دھوکا ہے فقط اس کی رفاقت کیا ہے

جو مرے دل میں رہے اور مجھے جانے بھی نہیں

ان کی انجمن بھی ہے دار بھی رسن بھی ہے

دیکھنا ہے دیوانے اب کہاں ٹھہرتے ہیں

در محبوب ہے اپنا تو کنارا اقبالؔ

بے سہارا ہوئے تو ڈوب کے جانا ہوگا

جام و مینا میں پھول کھلنے لگے

اڑ کے پہنچا کہاں تبسم بھی

کس قدر بدلا ہوا ہے اب نظام مے کدہ

اس سے پہلے چھو نہیں سکتے تھے پیمانے کو ہم

عجیب کوئے رقابت ہے کوئے جاناں بھی

ہمارا سایہ بھی دیوار و در نے لوٹ لیا

لائق پرسش نہ تھے لیکن چلا جب دور جام

واقف آداب مے خانہ ہمیں مانے گئے

اتنا قریب وہ کہ رگ جاں سے بھی قریب

یا دور اس قدر کہ خیال و گماں سے دور

کس قدر بدلا ہوا ہے اب نظام مے کدہ

اس سے پہلے چھو نہیں سکتے تھے پیمانے کو ہم

کم نگاہی سے مری سمت سر بزم نہ دیکھ

سلسلہ ٹوٹ نہ جائے کہیں افسانے کا

کبھی بے بات شکایت کبھی بے وجہ سکوت

وہ تو بس ترک محبت کا بہانہ چاہے

کم نگاہی سے مری سمت سر بزم نہ دیکھ

سلسلہ ٹوٹ نہ جائے کہیں افسانے کا

ہم کو تجدید ملاقات سے کب ہے انکار

لیکن اب پہلے انہیں ہاتھ بڑھانا ہوگا

یاران سفر ہیں تیز قدم اے کشمکش دل کیا ہوگا

رکتا ہوں تو بچھڑا جاتا ہوں چلتا ہوں تو چلنا مشکل ہے

کہیں بے ترک کدورت بھی ملے ہیں دو دل

در بنانا ہے تو دیوار کو ڈھانا ہوگا

ہاتھ الجھنے لگے جیب و داماں سے کیوں

اے جنوں کیا بہاروں کے دن آ گئے

ممکن ہو تو اک لمحے کو ذرا تکلیف تبسم کر لیجے

ہم میں سے ابھی تک کتنوں کو مفہوم سحر معلوم نہیں