Sher on Intezar

maanā ki terī diid ke qābil nahīñ huuñ maiñ

tū merā shauq dekh mirā intizār dekh

mana ki teri did ke qabil nahin hun main

tu mera shauq dekh mera intizar dekh

ye na thī hamārī qismat ki visāl-e-yār hotā

agar aur jiite rahte yahī intizār hotā

ye na thi hamari qismat ki visal-e-yar hota

agar aur jite rahte yahi intizar hota

ik raat vo gayā thā jahāñ baat rok ke

ab tak rukā huā huuñ vahīñ raat rok ke

ek raat wo gaya tha jahan baat rok ke

ab tak ruka hua hun wahin raat rok ke

guloñ meñ rañg bhare bād-e-nau-bahār chale

chale bhī aao ki gulshan kā kārobār chale

gulon mein rang bhare baad-e-nau-bahaar chale

chale bhi aao ki gulshan ka karobar chale

ye kaisā nashsha hai maiñ kis ajab ḳhumār meñ huuñ

tū aa ke jā bhī chukā hai maiñ intizār meñ huuñ

ye kaisa nashsha hai main kis ajab KHumar mein hun

tu aa ke ja bhi chuka hai main intizar mein hun

kab Thahregā dard ai dil kab raat basar hogī

sunte the vo ā.eñge sunte the sahar hogī

kab Thahrega dard ai dil kab raat basar hogi

sunte the wo aaenge sunte the sahar hogi

na koī va.ada na koī yaqīñ na koī umiid

magar hameñ to tirā intizār karnā thā

na koi wada na koi yaqin na koi umid

magar hamein to tera intizar karna tha

tere aane kī kyā umiid magar

kaise kah duuñ ki intizār nahīñ

tere aane ki kya umid magar

kaise kah dun ki intizar nahin

vo aa rahe haiñ vo aate haiñ aa rahe hoñge

shab-e-firāq ye kah kar guzār dī ham ne

wo aa rahe hain wo aate hain aa rahe honge

shab-e-firaq ye kah kar guzar di hum ne

mujhe ḳhabar thī mirā intizār ghar meñ rahā

ye hādsa thā ki maiñ umr bhar safar meñ rahā

mujhe KHabar thi mera intizar ghar mein raha

ye hadsa tha ki main umr bhar safar mein raha

jān-levā thiiñ ḳhvāhisheñ varna

vasl se intizār achchhā thā

jaan-lewa thin KHwahishen warna

wasl se intizar achchha tha

vo na aa.egā hameñ ma.alūm thā is shaam bhī

intizār us kā magar kuchh soch kar karte rahe

wo na aaega hamein malum tha is sham bhi

intizar us ka magar kuchh soch kar karte rahe

ġhazab kiyā tire va.ade pe e'tibār kiyā

tamām raat qayāmat kā intizār kiyā

ghazab kiya tere wade pe e'tibar kiya

tamam raat qayamat ka intizar kiya

jis kī āñkhoñ meñ kaTī thiiñ sadiyāñ

us ne sadiyoñ kī judā.ī dī hai

jis ki aankhon mein kaTi thin sadiyan

us ne sadiyon ki judai di hai

sau chāñd bhī chamkeñge to kyā baat banegī

tum aa.e to is raat kī auqāt banegī

sau chand bhi chamkenge to kya baat banegi

tum aae to is raat ki auqat banegi

jāntā hai ki vo na ā.eñge

phir bhī masrūf-e-intizār hai dil

jaanta hai ki wo na aaenge

phir bhi masruf-e-intizar hai dil

vo chāñd kah ke gayā thā ki aaj niklegā

to intizār meñ baiThā huā huuñ shaam se maiñ

wo chand kah ke gaya tha ki aaj niklega

to intizar mein baiTha hua hun sham se main

mujh ko ye aarzū vo uThā.eñ naqāb ḳhud

un ko ye intizār taqāzā kare koī

mujh ko ye aarzu wo uThaen naqab KHud

un ko ye intizar taqaza kare koi

is ummīd pe roz charāġh jalāte haiñ

aane vaale barsoñ ba.ad bhī aate haiñ

is ummid pe roz charagh jalate hain

aane wale barson baad bhi aate hain

kaun aa.egā yahāñ koī na aayā hogā

merā darvāza havāoñ ne hilāyā hogā

kaun aaega yahan koi na aaya hoga

mera darwaza hawaon ne hilaya hoga

aap kā e'tibār kaun kare

roz kā intizār kaun kare

aap ka e'tibar kaun kare

roz ka intizar kaun kare

ik umr kaT ga.ī hai tire intizār meñ

aise bhī haiñ ki kaT na sakī jin se ek raat

ek umr kaT gai hai tere intizar mein

aise bhi hain ki kaT na saki jin se ek raat

hameñ bhī aaj hī karnā thā intizār us kā

use bhī aaj hī sab vaade bhuul jaane the

hamein bhi aaj hi karna tha intizar us ka

use bhi aaj hi sab wade bhul jaane the

kahīñ vo aa ke miTā deñ na intizār kā lutf

kahīñ qubūl na ho jaa.e iltijā merī

kahin wo aa ke miTa den na intizar ka lutf

kahin qubul na ho jae iltija meri

shab-e-intizār kī kashmakash meñ na pūchh kaise sahar huī

kabhī ik charāġh jalā diyā kabhī ik charāġh bujhā diyā

shab-e-intizar ki kashmakash mein na puchh kaise sahar hui

kabhi ek charagh jala diya kabhi ek charagh bujha diya

be-ḳhudī le ga.ī kahāñ ham ko

der se intizār hai apnā

be-KHudi le gai kahan hum ko

der se intizar hai apna

ab in hudūd meñ laayā hai intizār mujhe

vo aa bhī jaa.eñ to aa.e na e'tibār mujhe

ab in hudud mein laya hai intizar mujhe

wo aa bhi jaen to aae na e'tibar mujhe

ye daaġh daaġh ujālā ye shab-gazīda sahar

vo intizār thā jis kā ye vo sahar to nahīñ

ye dagh dagh ujala ye shab-gazida sahar

wo intizar tha jis ka ye wo sahar to nahin

maiñ lauTne ke irāde se jā rahā huuñ magar

safar safar hai mirā intizār mat karnā

main lauTne ke irade se ja raha hun magar

safar safar hai mera intizar mat karna

jise na aane kī qasmeñ maiñ de ke aayā huuñ

usī ke qadmoñ kī aahaT kā intizār bhī hai

jise na aane ki qasmen main de ke aaya hun

usi ke qadmon ki aahaT ka intizar bhi hai

bāġh-e-bahisht se mujhe hukm-e-safar diyā thā kyuuñ

kār-e-jahāñ darāz hai ab mirā intizār kar

bagh-e-bahisht se mujhe hukm-e-safar diya tha kyun

kar-e-jahan daraaz hai ab mera intizar kar

ab kaun muntazir hai hamāre liye vahāñ

shaam aa ga.ī hai lauT ke ghar jaa.eñ ham to kyā

ab kaun muntazir hai hamare liye wahan

sham aa gai hai lauT ke ghar jaen hum to kya

koī ishāra dilāsā na koī va.ada magar

jab aa.ī shaam tirā intizār karne lage

koi ishaara dilasa na koi wada magar

jab aai sham tera intizar karne lage

maiñ ne samjhā thā ki lauT aate haiñ jaane vaale

tū ne jā kar to judā.ī mirī qismat kar dī

main ne samjha tha ki lauT aate hain jaane wale

tu ne ja kar to judai meri qismat kar di

aane meñ sadā der lagāte hī rahe tum

jaate rahe ham jaan se aate hī rahe tum

aane mein sada der lagate hi rahe tum

jate rahe hum jaan se aate hi rahe tum

tamām jism ko āñkheñ banā ke raah tako

tamām khel mohabbat meñ intizār kā hai

tamam jism ko aankhen bana ke rah tako

tamam khel mohabbat mein intizar ka hai

hai ḳhushī intizār kī har dam

maiñ ye kyuuñ pūchhūñ kab mileñge aap

hai KHushi intizar ki har dam

main ye kyun puchhun kab milenge aap

koī aayā na aa.egā lekin

kyā kareñ gar na intizār kareñ

koi aaya na aaega lekin

kya karen gar na intizar karen

muddat se ḳhvāb meñ bhī nahīñ niiñd kā ḳhayāl

hairat meñ huuñ ye kis kā mujhe intizār hai

muddat se KHwab mein bhi nahin nind ka KHayal

hairat mein hun ye kis ka mujhe intizar hai

bārhā terā intizār kiyā

apne ḳhvāboñ meñ ik dulhan kī tarah

barha tera intizar kiya

apne KHwabon mein ek dulhan ki tarah

ye intizār nahīñ sham.a hai rifāqat kī

is intizār se tanhā.ī ḳhūb-sūrat hai

ye intizar nahin shama hai rifaqat ki

is intizar se tanhai KHub-surat hai

aadhī se ziyāda shab-e-ġham kaaT chukā huuñ

ab bhī agar aa jaao to ye raat baḌī hai

aadhi se ziyaada shab-e-gham kaT chuka hun

ab bhi agar aa jao to ye raat baDi hai

maut kā intizār baaqī hai

aap kā intizār thā na rahā

maut ka intizar baqi hai

aap ka intizar tha na raha

darvāza khulā hai ki koī lauT na jaa.e

aur us ke liye jo kabhī aayā na gayā ho

darwaza khula hai ki koi lauT na jae

aur us ke liye jo kabhi aaya na gaya ho

un ke aane ke ba.ad bhī 'jālib'

der tak un kā intizār rahā

un ke aane ke baad bhi 'jalib'

der tak un ka intizar raha

kamāl-e-ishq to dekho vo aa ga.e lekin

vahī hai shauq vahī intizār baaqī hai

kamal-e-ishq to dekho wo aa gae lekin

wahi hai shauq wahi intizar baqi hai

tere vaade ko kabhī jhuuT nahīñ samjhūñgā

aaj kī raat bhī darvāza khulā rakkhūñgā

tere wade ko kabhi jhuT nahin samjhunga

aaj ki raat bhi darwaza khula rakkhunga

baḌe tābāñ baḌe raushan sitāre TuuT jaate haiñ

sahar kī raah taknā tā sahar āsāñ nahīñ hotā

baDe taban baDe raushan sitare TuT jate hain

sahar ki rah takna ta sahar aasan nahin hota

tamām umr tirā intizār ham ne kiyā

is intizār meñ kis kis se pyaar ham ne kiyā

tamam umr tera intizar hum ne kiya

is intizar mein kis kis se pyar hum ne kiya

o jaane vaale aa ki tire intizār meñ

raste ko ghar banā.e zamāne guzar ga.e

o jaane wale aa ki tere intizar mein

raste ko ghar banae zamane guzar gae