Sher on Bechaini

mere dil ne dekhā hai yuuñ bhī un ko uljhan meñ

baar baar kamre meñ baar baar āñgan meñ

mere dil ne dekha hai yun bhi un ko uljhan mein

bar bar kamre mein bar bar aangan mein

aah qāsid to ab talak na phirā

dil dhaḌaktā hai kyā huā hogā

aah qasid to ab talak na phira

dil dhaDakta hai kya hua hoga

bechain is qadar thā ki soyā na raat bhar

palkoñ se likh rahā thā tirā naam chāñd par

bechain is qadar tha ki soya na raat bhar

palkon se likh raha tha tera nam chand par

aa ki tujh bin is tarah ai dost ghabrātā huuñ maiñ

jaise har shai meñ kisī shai kī kamī paatā huuñ maiñ

aa ki tujh bin is tarah ai dost ghabraata hun main

jaise har shai mein kisi shai ki kami pata hun main

ishq meñ be-tābiyāñ hotī haiñ lekin ai 'hasan'

jis qadar bechain tum ho us qadar koī na ho

ishq mein be-tabiyan hoti hain lekin ai 'hasan'

jis qadar bechain tum ho us qadar koi na ho

hameñ bhī niiñd aa jā.egī ham bhī so hī jā.eñge

abhī kuchh be-qarārī hai sitāro tum to so jaao

hamein bhi nind aa jaegi hum bhi so hi jaenge

abhi kuchh be-qarari hai sitaro tum to so jao

lagtā nahīñ hai dil mirā ujḌe dayār meñ

kis kī banī hai ālam-e-nā-pā.edār meñ

lagta nahin hai dil mera ujDe dayar mein

kis ki bani hai aalam-e-na-paedar mein

ham ko na mil sakā to faqat ik sukūn-e-dil

ai zindagī vagarna zamāne meñ kyā na thā

hum ko na mil saka to faqat ek sukun-e-dil

ai zindagi wagarna zamane mein kya na tha

ro.e baġhair chāra na rone kī taab hai

kyā chiiz uf ye kaifiyat-e-iztirāb hai

roe baghair chaara na rone ki tab hai

kya chiz uf ye kaifiyat-e-iztirab hai

bichhaḌ ga.e to ye dil umr bhar lagegā nahīñ

lagegā lagne lagā hai magar lagegā nahīñ

bichhaD gae to ye dil umr bhar lagega nahin

lagega lagne laga hai magar lagega nahin

kisī pahlū nahīñ chain aatā hai ushshāq ko tere

taḌapte haiñ fuġhāñ karte haiñ aur karvaT badalte haiñ

kisi pahlu nahin chain aata hai ushshaq ko tere

taDapte hain fughan karte hain aur karwaT badalte hain

na kar 'saudā' tū shikva ham se dil kī be-qarārī kā

mohabbat kis ko detī hai miyāñ ārām duniyā meñ

na kar 'sauda' tu shikwa hum se dil ki be-qarari ka

mohabbat kis ko deti hai miyan aaram duniya mein

bhole ban kar haal na pūchh bahte haiñ ashk to bahne do

jis se baḌhe bechainī dil kī aisī tasallī rahne do

bhole ban kar haal na puchh bahte hain ashk to bahne do

jis se baDhe bechaini dil ki aisi tasalli rahne do

batā.eñ kyā ki bechainī baḌhāte haiñ vahī aa kar

bahut bechain ham jin ke liye ma.alūm hote haiñ

bataen kya ki bechaini baDhate hain wahi aa kar

bahut bechain hum jin ke liye malum hote hain

kuchh mohabbat ko na thā chain se rakhnā manzūr

aur kuchh un kī ināyāt ne jiine na diyā

kuchh mohabbat ko na tha chain se rakhna manzur

aur kuchh un ki inayat ne jine na diya

dil ko ḳhudā kī yaad tale bhī dabā chukā

kam-baḳht phir bhī chain na paa.e to kyā karūñ

dil ko KHuda ki yaad tale bhi daba chuka

kam-baKHt phir bhi chain na pae to kya karun

tujh ko pā kar bhī na kam ho sakī be-tābī-e-dil

itnā āsān tire ishq kā ġham thā hī nahīñ

tujh ko pa kar bhi na kam ho saki be-tabi-e-dil

itna aasan tere ishq ka gham tha hi nahin