chhoḌne maiñ nahīñ jaatā use darvāze tak

lauT aatā huuñ ki ab kaun use jaatā dekhe

chhoDne main nahin jata use darwaze tak

lauT aata hun ki ab kaun use jata dekhe

guzarne hī na dī vo raat maiñ ne

ghaḌī par rakh diyā thā haath maiñ ne

guzarne hi na di wo raat main ne

ghaDi par rakh diya tha hath main ne

ye samajh ke maanā hai sach tumhārī bātoñ ko

itne ḳhūb-sūrat lab jhuuT kaise boleñge

ye samajh ke mana hai sach tumhaari baaton ko

itne KHub-surat lab jhuT kaise bolenge

sab kī tarah tū ne bhī mire aib nikāle

tū ne bhī ḳhudāyā mirī niyyat nahīñ dekhī

sab ki tarah tu ne bhi mere aib nikale

tu ne bhi KHudaya meri niyyat nahin dekhi

hamāre pesh-e-nazar manzileñ kuchh aur bhī thiiñ

ye hādsa hai ki ham tere paas aa pahuñche

hamare pesh-e-nazar manzilen kuchh aur bhi thin

ye hadsa hai ki hum tere pas aa pahunche

hausla hai to safīnoñ ke alam lahrāo

bahte dariyā to chaleñge isī raftār ke saath

hausla hai to safinon ke alam lahrao

bahte dariya to chalenge isi raftar ke sath

hazār chehre haiñ maujūd aadmī ġhā.eb

ye kis ḳharābe meñ duniyā ne lā ke chhoḌ diyā

hazar chehre hain maujud aadmi ghaeb

ye kis KHarabe mein duniya ne la ke chhoD diya

aañkh rakhte ho to us aañkh kī tahrīr paḌho

muñh se iqrār na karnā to hai aadat us kī

aankh rakhte ho to us aankh ki tahrir paDho

munh se iqrar na karna to hai aadat us ki

yuuñ tirī yaad meñ din raat magan rahtā huuñ

dil dhḌaknā tire qadmoñ kī sadā lagtā hai

yun teri yaad mein din raat magan rahta hun

dil dhDakna tere qadmon ki sada lagta hai

jab us kī zulf meñ pahlā safed baal aayā

tab us ko pahlī mulāqāt kā ḳhayāl aayā

jab us ki zulf mein pahla safed baal aaya

tab us ko pahli mulaqat ka KHayal aaya

niiñd aa.e to achānak tirī aahaT sun luuñ

jaag uTThūñ to badan se tirī ḳhushbū aa.e

nind aae to achanak teri aahaT sun lun

jag uTThun to badan se teri KHushbu aae

shauq-e-safar be-sabab aur safar be-talab

us kī taraf chal diye jis ne pukārā na thā

shauq-e-safar be-sabab aur safar be-talab

us ki taraf chal diye jis ne pukara na tha

ab to insān kī azmat bhī koī chiiz nahīñ

log patthar ko ḳhudā maan liyā karte the

ab to insan ki azmat bhi koi chiz nahin

log patthar ko KHuda man liya karte the

vāqi.a kuchh bhī ho sach kahne meñ rusvā.ī hai

kyuuñ na ḳhāmosh rahūñ ahl-e-nazar kahlā.ūñ

waqia kuchh bhi ho sach kahne mein ruswai hai

kyun na KHamosh rahun ahl-e-nazar kahlaun

maiñ tirā kuchh bhī nahīñ huuñ magar itnā to batā

dekh kar mujh ko tire zehn meñ aatā kyā hai

main tera kuchh bhi nahin hun magar itna to bata

dekh kar mujh ko tere zehn mein aata kya hai

khulī fazā meñ agar laḌkhaḌā ke chal na sakeñ

to zahr piinā hai behtar sharāb piine se

khuli faza mein agar laDkhaDa ke chal na saken

to zahr pina hai behtar sharab pine se

javāz koī agar merī bandagī kā nahīñ

maiñ pūchhtā huuñ tujhe kyā milā ḳhudā ho kar

jawaz koi agar meri bandagi ka nahin

main puchhta hun tujhe kya mila KHuda ho kar

jahāñ meñ manzil-e-maqsūd DhūñDne vaale

ye kā.enāt kī tasvīr hī ḳhayālī hai

jahan mein manzil-e-maqsud DhunDne wale

ye kaenat ki taswir hi KHayali hai

das baje raat ko so jaate haiñ ḳhabreñ sun kar

aañkh khultī hai to aḳhbār talab karte haiñ

das baje raat ko so jate hain KHabren sun kar

aankh khulti hai to aKHbar talab karte hain

tumhārī aarzū meñ maiñ ne apnī aarzū kī thī

ḳhud apnī justujū kā aap hāsil ho gayā huuñ maiñ

tumhaari aarzu mein main ne apni aarzu ki thi

KHud apni justuju ka aap hasil ho gaya hun main

terī qurbat meñ guzāre hue kuchh lamhe haiñ

dil ko tanhā.ī kā ehsās dilāne vaale

teri qurbat mein guzare hue kuchh lamhe hain

dil ko tanhai ka ehsas dilane wale

sitāre is qadar dekhe ki āñkheñ bujh ga.iiñ apnī

mohabbat is qadar kar lī mohabbat chhoḌ dī ham ne

sitare is qadar dekhe ki aankhen bujh gain apni

mohabbat is qadar kar li mohabbat chhoD di hum ne

jis ko jaanā hī nahīñ us ko ḳhudā kyuuñ māneñ

aur jise jaan chuke hoñ vo ḳhudā kaise ho

jis ko jaana hi nahin us ko KHuda kyun manen

aur jise jaan chuke hon wo KHuda kaise ho

shāyad log isī raunaq ko garmi-e-mahfil kahte haiñ

ḳhud hī aag lagā dete haiñ ham apnī tanhā.ī ko

shayad log isi raunaq ko garmi-e-mahfil kahte hain

KHud hi aag laga dete hain hum apni tanhai ko

ab apne chehre par do patthar se sajā.e phirtā huuñ

aañsū le kar bech diyā hai āñkhoñ kī bīnā.ī ko

ab apne chehre par do patthar se sajae phirta hun

aansu le kar bech diya hai aankhon ki binai ko

paas rah kar bhī na pahchān sakā tū mujh ko

duur se dekh ke ab haath hilātā kyā hai

pas rah kar bhi na pahchan saka tu mujh ko

dur se dekh ke ab hath hilata kya hai

dil o nigāh kā ye fāsla bhī kyuuñ rah jaa.e

agar tū aa.e to maiñ dil ko aañkh meñ rakh luuñ

dil o nigah ka ye fasla bhi kyun rah jae

agar tu aae to main dil ko aankh mein rakh lun

tumhārī aañkh meñ kaifiyyat-e-ḳhumār to hai

sharāb kā na sahī niiñd kā asar hī sahī

tumhaari aankh mein kaifiyyat-e-KHumar to hai

sharab ka na sahi nind ka asar hi sahi

ek lamhe meñ kaTā hai muddatoñ kā fāsla

maiñ abhī aayā huuñ tasvīreñ purānī dekh kar

ek lamhe mein kaTa hai muddaton ka fasla

main abhi aaya hun taswiren purani dekh kar

dil sā vahshī kabhī qaabū meñ na aayā yaaro

haar kar baiTh ga.e jaal bichhāne vaale

dil sa wahshi kabhi qabu mein na aaya yaro

haar kar baiTh gae jal bichhane wale

ab mirā dard mirī jaan huā jaatā hai

ai mire chāragaro ab mujhe achchhā na karo

ab mera dard meri jaan hua jata hai

ai mere chaaragaro ab mujhe achchha na karo

aaj tak us kī mohabbat kā nasha taarī hai

phuul baaqī nahīñ ḳhushbū kā safar jaarī hai

aaj tak us ki mohabbat ka nasha tari hai

phul baqi nahin KHushbu ka safar jari hai

dil par bhī aao ek nazar Dālte chaleñ

shāyad chhupe hue hoñ yahīñ din bahār ke

dil par bhi aao ek nazar Dalte chalen

shayad chhupe hue hon yahin din bahaar ke

niiñd aatī hai agar jaltī huī āñkhoñ meñ

koī dīvāne kī zanjīr hilā detā hai

nind aati hai agar jalti hui aankhon mein

koi diwane ki zanjir hila deta hai

jalte haiñ ik charāġh kī lau se ka.ī charāġh

duniyā tire ḳhayāl se raushan huī to hai

jalte hain ek charagh ki lau se kai charagh

duniya tere KHayal se raushan hui to hai

rahne diyā na us ne kisī kaam kā mujhe

aur ḳhaak meñ bhī mujh ko milā kar nahīñ gayā

rahne diya na us ne kisi kaam ka mujhe

aur KHak mein bhi mujh ko mila kar nahin gaya

tīrgī hī tīrgī hadd-e-nazar tak tīrgī

kaash maiñ ḳhud hī sulag uTThūñ añdherī raat meñ

tirgi hi tirgi hadd-e-nazar tak tirgi

kash main KHud hi sulag uTThun andheri raat mein

ārzūoñ ne ka.ī phuul chune the lekin

zindagī ḳhār-badāmāñ hai ise kyā kahiye

aarzuon ne kai phul chune the lekin

zindagi KHar-badaman hai ise kya kahiye

chhup chhup ke kahāñ tak tire dīdār mileñge

ai parda-nashīñ ab sar-e-bāzār mileñge

chhup chhup ke kahan tak tere didar milenge

ai parda-nashin ab sar-e-bazar milenge

zarā sā ġham huā aur ro diye ham

baḌī nāzuk tabī.at ho ga.ī hai

zara sa gham hua aur ro diye hum

baDi nazuk tabiat ho gai hai

tujh meñ kas-bal hai to duniyā ko bahā kar le jā

chaa.e kī pyālī meñ tūfān uThātā kyā hai

tujh mein kas-bal hai to duniya ko baha kar le ja

chae ki pyali mein tufan uThata kya hai

udaas chhoḌ ga.e kashtiyoñ ko sāhil par

gilā kareñ bhī to kyā paar utarne vāloñ se

udas chhoD gae kashtiyon ko sahil par

gila karen bhi to kya par utarne walon se

manzil hai kaThin dil bahut ārām-talab hai

kyuuñ yaad mujhe aate ho ai bhūlne vaalo

manzil hai kaThin dil bahut aaram-talab hai

kyun yaad mujhe aate ho ai bhulne walo

dil pe ai dost qayāmat sī guzar jaatī hai

tum nigāh-e-ġhalat-andāz se dekhā na karo

dil pe ai dost qayamat si guzar jati hai

tum nigah-e-ghalat-andaz se dekha na karo

yaar hote to mujhe muñh pe burā kah dete

bazm meñ merā gilā sab ne kiyā mere ba.ad

yar hote to mujhe munh pe bura kah dete

bazm mein mera gila sab ne kiya mere baad

safar bhī duur kā hai aur kahīñ nahīñ jaanā

ab ibtidā ise kahiye ki intihā kahiye

safar bhi dur ka hai aur kahin nahin jaana

ab ibtida ise kahiye ki intiha kahiye

ḳhāmushī hī meñ sahī par kabhī iz.hār to kar

is qadar zabt se siina tirā phaT jā.egā

KHamushi hi mein sahi par kabhi izhaar to kar

is qadar zabt se sina tera phaT jaega

ye alag baat zabāñ saath na de pā.egī

dil kā jo haal hai kahnā to paḌegā tujh se

ye alag baat zaban sath na de paegi

dil ka jo haal hai kahna to paDega tujh se

bigḌī huī is shahr kī hālat bhī bahut hai

jā.ūñ bhī kahāñ is se mohabbat bhī bahut hai

bigDi hui is shahr ki haalat bhi bahut hai

jaun bhi kahan is se mohabbat bhi bahut hai

kal thī ye fikr use haal sunā.eñ kaise

aaj ye sochte haiñ us ko sunā kyuuñ aa.e

kal thi ye fikr use haal sunaen kaise

aaj ye sochte hain us ko suna kyun aae