purane doston se ab murawwat chhoD di humne

purāne dostoñ se ab muravvat chhoḌ dī ham ne

mu'azziz ho ga.e ham bhī sharāfat chhoḌ dī ham ne

mayassar aa chukī hai sar-bulandī muḌ ke kyuuñ dekheñ

imāmat mil ga.ī ham ko to ummat chhoḌ dī ham ne

kise mā'lūm kyā hogā ma.aal ā.inda nasloñ kā

javāñ ho kar buzurgoñ kī rivāyat chhoḌ dī ham ne

ye mulk apnā hai aur is mulk kī sarkār apnī hai

milī hai naukrī jab se baġhāvat chhoḌ dī ham ne

hai utnā vāqi'a us se na milne kī qasam khā lī

ta.assuf is qadar goyā vazārat chhoḌ dī ham ne

kareñ kyā ye balā apne liye ḳhud muntaḳhab kī hai

gilā baaqī rahā lekin shikāyat chhoḌ dī ham ne

sitāre is qadar dekhe ki āñkheñ bujh ga.iiñ apnī

mohabbat is qadar kar lī mohabbat chhoḌ dī ham ne

jo sochā hai 'azīzoñ kī samajh meñ aa nahīñ saktā

sharārat ab ke ye kī hai sharārat chhoḌ dī ham ne

ulajh paḌte agar to ham meñ tum meñ farq kyā rahtā

yahī dīvār baaqī thī salāmat chhoḌ dī ham ne

gunahgāroñ meñ shāmil mudda'ī bhī aur mulzim bhī

tirā insāf dekhā aur 'adālat chhoḌ dī ham ne

purane doston se ab murawwat chhoD di hum ne

mu'azziz ho gae hum bhi sharafat chhoD di hum ne

mayassar aa chuki hai sar-bulandi muD ke kyun dekhen

imamat mil gai hum ko to ummat chhoD di hum ne

kise ma'lum kya hoga maal aainda naslon ka

jawan ho kar buzurgon ki riwayat chhoD di hum ne

ye mulk apna hai aur is mulk ki sarkar apni hai

mili hai naukri jab se baghawat chhoD di hum ne

hai utna waqi'a us se na milne ki qasam kha li

tassuf is qadar goya wazarat chhoD di hum ne

karen kya ye bala apne liye KHud muntaKHab ki hai

gila baqi raha lekin shikayat chhoD di hum ne

sitare is qadar dekhe ki aankhen bujh gain apni

mohabbat is qadar kar li mohabbat chhoD di hum ne

jo socha hai 'azizon ki samajh mein aa nahin sakta

shararat ab ke ye ki hai shararat chhoD di hum ne

ulajh paDte agar to hum mein tum mein farq kya rahta

yahi diwar baqi thi salamat chhoD di hum ne

gunahgaron mein shamil mudda'i bhi aur mulzim bhi

tera insaf dekha aur 'adalat chhoD di hum ne