aql har baat pe hairan hai ise kya kahiye

aql har baat pe hairāñ hai ise kyā kahiye

dil bahr haal pareshāñ hai ise kyā kahiye

bulbuleñ tāqat-e-guftār se mahrūm huiiñ

ab ye ā.īn-e-gulistāñ hai ise kyā kahiye

log kahte haiñ ki gulshan meñ bahār aa.ī hai

bū-e-gul phir bhī pareshāñ hai ise kyā kahiye

rahnumā duur bahut duur nikal aa.e haiñ

qāfila raah meñ hairāñ hai ise kyā kahiye

ārzūoñ ne ka.ī phuul chune the lekin

zindagī ḳhār-badāmāñ hai ise kyā kahiye

apne maazī kī hikāyāt bahut ḳhuub sahī

ab na.e daur kā sāmāñ hai ise kyā kahiye

sochte the ki sahar nūr-badāmāñ hogī

tīrgī phir bhī numāyāñ hai ise kyā kahiye

ehtimām-e-sahar-e-nau to kareñge lekin

dil abhī be-sar-o-sāmāñ hai ise kyā kahiye

maiñ ne kis haal meñ dekhā hai chaman ko 'shahzād'

aur dil ab bhī ġhazal-ḳhvāñ hai ise kyā kahiye

aql har baat pe hairan hai ise kya kahiye

dil bahr haal pareshan hai ise kya kahiye

bulbulen taqat-e-guftar se mahrum huin

ab ye aain-e-gulistan hai ise kya kahiye

log kahte hain ki gulshan mein bahaar aai hai

bu-e-gul phir bhi pareshan hai ise kya kahiye

rahnuma dur bahut dur nikal aae hain

qafila rah mein hairan hai ise kya kahiye

aarzuon ne kai phul chune the lekin

zindagi KHar-badaman hai ise kya kahiye

apne mazi ki hikayat bahut KHub sahi

ab nae daur ka saman hai ise kya kahiye

sochte the ki sahar nur-badaman hogi

tirgi phir bhi numayan hai ise kya kahiye

ehtimam-e-sahar-e-nau to karenge lekin

dil abhi be-sar-o-saman hai ise kya kahiye

main ne kis haal mein dekha hai chaman ko 'shahzad'

aur dil ab bhi ghazal-KHwan hai ise kya kahiye