apni taswir ko aankhon se lagata kya hai

apnī tasvīr ko āñkhoñ se lagātā kyā hai

ik nazar merī taraf bhī tirā jaatā kyā hai

merī rusvā.ī meñ vo bhī haiñ barābar ke sharīk

mere qisse mire yāroñ ko sunātā kyā hai

paas rah kar bhī na pahchān sakā tū mujh ko

duur se dekh ke ab haath hilātā kyā hai

zehn ke pardoñ pe manzil ke hayūle na banā

ġhaur se dekhtā jā raah meñ aatā kyā hai

zaḳhm-e-dil jurm nahīñ toḌ bhī de mohr-e-sukūt

jo tujhe jānte haiñ un se chhupātā kyā hai

safar-e-shauq meñ kyuuñ kāñpte haiñ paañv tire

aañkh rakhtā hai to phir aañkh churātā kyā hai

umr bhar apne garebāñ se ulajhne vaale

tū mujhe mere hī saa.e se Darātā kyā hai

chāñdnī dekh ke chehre ko chhupāne vaale

dhuup meñ baiTh ke ab baal sukhātā kyā hai

mar ga.e pyaas ke maare to uThā abr-e-karam

bujh ga.ī bazm to ab sham.a jalātā kyā hai

maiñ tirā kuchh bhī nahīñ huuñ magar itnā to batā

dekh kar mujh ko tire zehn meñ aatā kyā hai

terā ehsās zarā sā tirī hastī pāyāb

to samundar kī tarah shor machātā kyā hai

tujh meñ kas-bal hai to duniyā ko bahā kar le jā

chaa.e kī pyālī meñ tūfān uThātā kyā hai

terī āvāz kā jaadū na chalegā un par

jāgne vāloñ ko 'shahzād' jagātā kyā hai

apni taswir ko aankhon se lagata kya hai

ek nazar meri taraf bhi tera jata kya hai

meri ruswai mein wo bhi hain barabar ke sharik

mere qisse mere yaron ko sunata kya hai

pas rah kar bhi na pahchan saka tu mujh ko

dur se dekh ke ab hath hilata kya hai

zehn ke pardon pe manzil ke hayule na bana

ghaur se dekhta ja rah mein aata kya hai

zaKHm-e-dil jurm nahin toD bhi de mohr-e-sukut

jo tujhe jaante hain un se chhupata kya hai

safar-e-shauq mein kyun kanpte hain panw tere

aankh rakhta hai to phir aankh churaata kya hai

umr bhar apne gareban se ulajhne wale

tu mujhe mere hi sae se Daraata kya hai

chandni dekh ke chehre ko chhupane wale

dhup mein baiTh ke ab baal sukhata kya hai

mar gae pyas ke mare to uTha abr-e-karam

bujh gai bazm to ab shama jalata kya hai

main tera kuchh bhi nahin hun magar itna to bata

dekh kar mujh ko tere zehn mein aata kya hai

tera ehsas zara sa teri hasti payab

to samundar ki tarah shor machata kya hai

tujh mein kas-bal hai to duniya ko baha kar le ja

chae ki pyali mein tufan uThata kya hai

teri aawaz ka jadu na chalega un par

jagne walon ko 'shahzad' jagata kya hai