waqia koi na jannat mein hua mere baad

vāqi.a koī na jannat meñ huā mere ba.ad

āsmānoñ pe akelā hai ḳhudā mere ba.ad

phir dikhātā hai mujhe jannat-e-firdaus ke ḳhvāb

kyā farishtoñ meñ tirā jī na lagā mere ba.ad

kuchh nahīñ hai tirī duniyā meñ hayūloñ ke sivā

mujh se pahle bhī vahī thā jo huā mere ba.ad

ḳhāk-e-sahrā-e-junūñ narm hai resham kī tarah

aabla hai na koī ābla-pā mere ba.ad

mere anjām pe hañsne kī tamannā na karo

kam hī badlegī gulistāñ kī havā mere ba.ad

ḳhatm afsāna huā baat samajh meñ aa.ī

saarī duniyā ne mujhe jaan liyā mere ba.ad

yaar hote to mujhe muñh pe burā kah dete

bazm meñ merā gilā sab ne kiyā mere ba.ad

huuñ par-e-kāh-e-shab-o-roz magar sochtā huuñ

kis ke ghar jā.egā sailāb-e-balā mere ba.ad

is zamīñ meñ vo koī aur ġhazal bhī kahtā

lekin afsos ki 'ġhālib' na huā mere ba.ad

waqia koi na jannat mein hua mere baad

aasmanon pe akela hai KHuda mere baad

phir dikhata hai mujhe jannat-e-firdaus ke KHwab

kya farishton mein tera ji na laga mere baad

kuchh nahin hai teri duniya mein hayulon ke siwa

mujh se pahle bhi wahi tha jo hua mere baad

KHak-e-sahra-e-junun narm hai resham ki tarah

aabla hai na koi aabla-pa mere baad

mere anjam pe hansne ki tamanna na karo

kam hi badlegi gulistan ki hawa mere baad

KHatm afsana hua baat samajh mein aai

sari duniya ne mujhe jaan liya mere baad

yar hote to mujhe munh pe bura kah dete

bazm mein mera gila sab ne kiya mere baad

hun par-e-kah-e-shab-o-roz magar sochta hun

kis ke ghar jaega sailab-e-bala mere baad

is zamin mein wo koi aur ghazal bhi kahta

lekin afsos ki 'ghaalib' na hua mere baad