main jo rota hun to kahte ho ki aisa na karo

maiñ jo rotā huuñ to kahte ho ki aisā na karo

tum agar merī jagah ho to bhalā kyā na karo

ab to ai dil havas-e-sāġhar-o-mīnā na karo

chhoḌ bhī do ye taqāzā ye taqāzā na karo

dil pe ai dost qayāmat sī guzar jaatī hai

tum nigāh-e-ġhalat-andāz se dekhā na karo

phir bhī āñkheñ unheñ har baat batā detī haiñ

dil to kahtā hai kisī baat kā charchā na karo

ab mirā dard mirī jaan huā jaatā hai

ai mire chāragaro ab mujhe achchhā na karo

ye sar-e-bazm mirī samt ishāre kaise

maiñ tamāshā to nahīñ merā tamāshā na karo

mil hī jaatī hai kabhī yaas meñ taskīn mujhe

ai umīdo mujhe aise meñ to chheḌā na karo

us ne 'shahzād' tirī baat ko Thukrā hī diyā

maiñ na kahtā thā ki iz.hār-e-tamannā na karo

main jo rota hun to kahte ho ki aisa na karo

tum agar meri jagah ho to bhala kya na karo

ab to ai dil hawas-e-saghar-o-mina na karo

chhoD bhi do ye taqaza ye taqaza na karo

dil pe ai dost qayamat si guzar jati hai

tum nigah-e-ghalat-andaz se dekha na karo

phir bhi aankhen unhen har baat bata deti hain

dil to kahta hai kisi baat ka charcha na karo

ab mera dard meri jaan hua jata hai

ai mere chaaragaro ab mujhe achchha na karo

ye sar-e-bazm meri samt ishaare kaise

main tamasha to nahin mera tamasha na karo

mil hi jati hai kabhi yas mein taskin mujhe

ai umido mujhe aise mein to chheDa na karo

us ne 'shahzad' teri baat ko Thukra hi diya

main na kahta tha ki izhaar-e-tamanna na karo