کیوں آج اس کا ذکر مجھے خوش نہ کر سکا

کیوں آج اس کا نام مرا دل دکھا گیا

ہے آج یہ گلہ کہ اکیلا ہے شہریارؔ

ترسو گے کل ہجوم میں تنہائی کے لئے

لوگ سر پھوڑ کر بھی دیکھ چکے

غم کی دیوار ٹوٹتی ہی نہیں

تو کہاں ہے تجھ سے اک نسبت تھی میری ذات کو

کب سے پلکوں پر اٹھائے پھر رہا ہوں رات کو

بے نام سے اک خوف سے دل کیوں ہے پریشاں

جب طے ہے کہ کچھ وقت سے پہلے نہیں ہوگا

زخموں کو رفو کر لیں دل شاد کریں پھر سے

خوابوں کی کوئی دنیا آباد کریں پھر سے

ہے کوئی جو بتائے شب کے مسافروں کو

کتنا سفر ہوا ہے کتنا سفر رہا ہے

نذرانہ تیرے حسن کو کیا دیں کہ اپنے پاس

لے دے کے ایک دل ہے سو ٹوٹا ہوا سا ہے

شہر امید حقیقت میں نہیں بن سکتا

تو چلو اس کو تصور ہی میں تعمیر کریں

خجل چراغوں سے اہل وفا کو ہونا ہے

کہ سرفراز یہاں پھر ہوا کو ہونا ہے

امید سے کم چشم خریدار میں آئے

ہم لوگ ذرا دیر سے بازار میں آئے

دل میں رکھتا ہے نہ پلکوں پہ بٹھاتا ہے مجھے

پھر بھی اک شخص میں کیا کیا نظر آتا ہے مجھے

پہلے نہائی اوس میں پھر آنسوؤں میں رات

یوں بوند بوند اتری ہمارے گھروں میں رات

جاگتا ہوں میں ایک اکیلا دنیا سوتی ہے

کتنی وحشت ہجر کی لمبی رات میں ہوتی ہے

عمر کا باقی سفر کرنا ہے اس شرط کے ساتھ

دھوپ دیکھیں تو اسے سائے سے تعبیر کریں

گلاب ٹہنی سے ٹوٹا زمین پر نہ گرا

کرشمے تیز ہوا کے سمجھ سے باہر ہیں

ہم پڑھ رہے تھے خواب کے پرزوں کو جوڑ کے

آندھی نے یہ طلسم بھی رکھ ڈالا توڑ کے

ہم جدا ہو گئے آغاز سفر سے پہلے

جانے کس سمت ہمیں راہ وفا لے جاتی

ہر طرف اپنے کو بکھرا پاؤ گے

آئنوں کو توڑ کے پچھتاؤ گے

اب تو لے دے کے یہی کام ہے ان آنکھوں کا

جن کو دیکھا نہیں ان خوابوں کی تعبیر کریں

جستجو جس کی تھی اس کو تو نہ پایا ہم نے

اس بہانے سے مگر دیکھ لی دنیا ہم نے

ایک ہی مٹی سے ہم دونوں بنے ہیں لیکن

تجھ میں اور مجھ میں مگر فاصلہ یوں کتنا ہے

جہاں میں ہونے کو اے دوست یوں تو سب ہوگا

ترے لبوں پہ مرے لب ہوں ایسا کب ہوگا

کون سی بات ہے جو اس میں نہیں

اس کو دیکھے مری نظر سے کوئی

حسین ابن علی کربلا کو جاتے ہیں

مگر یہ لوگ ابھی تک گھروں کے اندر ہیں

شدید پیاس تھی پھر بھی چھوا نہ پانی کو

میں دیکھتا رہا دریا تری روانی کو

آنکھ کی یہ ایک حسرت تھی کہ بس پوری ہوئی

آنسوؤں میں بھیگ جانے کی ہوس پوری ہوئی

یا تیرے علاوہ بھی کسی شے کی طلب ہے

یا اپنی محبت پہ بھروسا نہیں ہم کو

آندھیاں آتی تھیں لیکن کبھی ایسا نہ ہوا

خوف کے مارے جدا شاخ سے پتا نہ ہوا

یہ اک شجر کہ جس پہ نہ کانٹا نہ پھول ہے

سائے میں اس کے بیٹھ کے رونا فضول ہے

پل بھر میں کیسے لوگ بدل جاتے ہیں یہاں

دیکھو کہ یہ مفید ہے بینائی کے لئے

میں اکیلا سہی مگر کب تک

ننگی پرچھائیوں کے بیچ رہوں

غم کی دولت بڑی مشکل سے ملا کرتی ہے

سونپ دو ہم کو اگر تم سے نگہ بانی نہ ہو

رات کو دن سے ملانے کی ہوس تھی ہم کو

کام اچھا نہ تھا انجام بھی اچھا نہ ہوا

جمع کرتے رہے جو اپنے کو ذرہ ذرہ

وہ یہ کیا جانیں بکھرنے میں سکوں کتنا ہے

یا میں سوچوں کچھ بھی نہ اس کے بارے میں

یا ایسا ہو دنیا اور بدل جائے

اک صرف ہمیں مے کو آنکھوں سے پلاتے ہیں

کہنے کو تو دنیا میں مے خانے ہزاروں ہیں

مرے سورج آ! مرے جسم پہ اپنا سایہ کر

بڑی تیز ہوا ہے سردی آج غضب کی ہے

اب رات کی دیوار کو ڈھانا ہے ضروری

یہ کام مگر مجھ سے اکیلے نہیں ہوگا

ہر ملاقات کا انجام جدائی کیوں ہے

اب تو ہر وقت یہی بات ستاتی ہے ہمیں

ان دنوں میں بھی ہوں کچھ کار جہاں میں مصروف

بات تجھ میں بھی نہیں رہ گئی پہلے والی

سینے میں جلن آنکھوں میں طوفان سا کیوں ہے

اس شہر میں ہر شخص پریشان سا کیوں ہے

عجیب سانحہ مجھ پر گزر گیا یارو

میں اپنے سائے سے کل رات ڈر گیا یارو

بچھڑے لوگوں سے ملاقات کبھی پھر ہوگی

دل میں امید تو کافی ہے یقیں کچھ کم ہے

نہ خوش گمان ہو اس پر تو اے دل سادہ

سبھی کو دیکھ کے وہ شخص مسکراتا ہے

یہ کیا ہے محبت میں تو ایسا نہیں ہوتا

میں تجھ سے جدا ہو کے بھی تنہا نہیں ہوتا

آنکھوں کو سب کی نیند بھی دی خواب بھی دیے

ہم کو شمار کرتی رہی دشمنوں میں رات

کہاں تک وقت کے دریا کو ہم ٹھہرا ہوا دیکھیں

یہ حسرت ہے کہ ان آنکھوں سے کچھ ہوتا ہوا دیکھیں

جو ہونے والا ہے اب اس کی فکر کیا کیجے

جو ہو چکا ہے اسی پر یقیں نہیں آتا

عمر کا لمبا حصہ کر کے دانائی کے نام

ہم بھی اب یہ سوچ رہے ہیں پاگل ہو جائیں