Top 20 Couplets on Ada

is sādgī pe kaun na mar jaa.e ai ḳhudā

laḌte haiñ aur haath meñ talvār bhī nahīñ

is sadgi pe kaun na mar jae ai KHuda

laDte hain aur hath mein talwar bhi nahin

hayā se sar jhukā lenā adā se muskurā denā

hasīnoñ ko bhī kitnā sahl hai bijlī girā denā

haya se sar jhuka lena ada se muskura dena

hasinon ko bhi kitna sahl hai bijli gira dena

andāz apnā dekhte haiñ aa.ine meñ vo

aur ye bhī dekhte haiñ koī dekhtā na ho

andaz apna dekhte hain aaine mein wo

aur ye bhi dekhte hain koi dekhta na ho

pūchhā jo un se chāñd nikaltā hai kis tarah

zulfoñ ko ruḳh pe Daal ke jhaTkā diyā ki yuuñ

puchha jo un se chand nikalta hai kis tarah

zulfon ko ruKH pe Dal ke jhaTka diya ki yun

ye jo sar nīche kiye baiThe haiñ

jaan kitnoñ kī liye baiThe haiñ

ye jo sar niche kiye baiThe hain

jaan kitnon ki liye baiThe hain

jaan lenī thī saaf kah dete

kyā zarūrat thī muskurāne kī

jaan leni thi saf kah dete

kya zarurat thi muskurane ki

pahle is meñ ik adā thī naaz thā andāz thā

rūThnā ab to tirī aadat meñ shāmil ho gayā

pahle is mein ek ada thi naz tha andaz tha

ruThna ab to teri aadat mein shamil ho gaya

aap ne tasvīr bhejī maiñ ne dekhī ġhaur se

har adā achchhī ḳhamoshī kī adā achchhī nahīñ

aap ne taswir bheji main ne dekhi ghaur se

har ada achchhi KHamoshi ki ada achchhi nahin

aafat to hai vo naaz bhī andāz bhī lekin

martā huuñ maiñ jis par vo adā aur hī kuchh hai

aafat to hai wo naz bhi andaz bhi lekin

marta hun main jis par wo ada aur hi kuchh hai

nigāheñ is qadar qātil ki uff uff

adā.eñ is qadar pyārī ki tauba

nigahen is qadar qatil ki uff uff

adaen is qadar pyari ki tauba

añgḌā.ī bhī vo lene na paa.e uThā ke haath

dekhā jo mujh ko chhoḌ diye muskurā ke haath

angDai bhi wo lene na pae uTha ke hath

dekha jo mujh ko chhoD diye muskura ke hath

adā se dekh lo jaatā rahe gila dil kā

bas ik nigāh pe Thahrā hai faisla dil kā

ada se dekh lo jata rahe gila dil ka

bas ek nigah pe Thahra hai faisla dil ka

gul ho mahtāb ho ā.īna ho ḳhurshīd ho miir

apnā mahbūb vahī hai jo adā rakhtā ho

gul ho mahtab ho aaina ho KHurshid ho mir

apna mahbub wahi hai jo ada rakhta ho

zamāna husn nazākat balā jafā shoḳhī

simaT ke aa ga.e sab aap kī adāoñ meñ

zamana husn nazakat bala jafa shoKHi

simaT ke aa gae sab aap ki adaon mein

ḳhūb-rū haiñ saikḌoñ lekin nahīñ terā javāb

dilrubā.ī meñ adā meñ naaz meñ andāz meñ

KHub-ru hain saikDon lekin nahin tera jawab

dilrubai mein ada mein naz mein andaz mein

namāz apnī agarche kabhī qazā na huī

adā kisī kī jo dekhī to phir adā na huī

namaz apni agarche kabhi qaza na hui

ada kisi ki jo dekhi to phir ada na hui

sūrat to ibtidā se tirī lā-javāb thī

nāz-o-adā ne aur tarah-dār kar diyā

surat to ibtida se teri la-jawab thi

naz-o-ada ne aur tarah-dar kar diya

naaz hai gul ko nazākat pe chaman meñ ai 'zauq'

us ne dekhe hī nahīñ nāz-o-nazākat vaale

naz hai gul ko nazakat pe chaman mein ai 'zauq'

us ne dekhe hi nahin naz-o-nazakat wale

tujh ko dekhā na tire nāz-o-adā ko dekhā

terī har tarz meñ ik shān-e-ḳhudā ko dekhā

tujh ko dekha na tere naz-o-ada ko dekha

teri har tarz mein ek shan-e-KHuda ko dekha

dushman ke ghar se chal ke dikhā do judā judā

ye bāñkpan kī chaal ye nāz-o-adā kī hai

dushman ke ghar se chal ke dikha do juda juda

ye bankpan ki chaal ye naz-o-ada ki hai