Sher on Kiss

ek bose ke talabgār haiñ ham

aur māñgeñ to gunahgār haiñ ham

ek bose ke talabgar hain hum

aur mangen to gunahgar hain hum

dhamkā ke bose lūñgā ruḳh-e-rashk-e-māh kā

chandā vasūl hotā hai sāhab dabāv se

dhamka ke bose lunga ruKH-e-rashk-e-mah ka

chanda wasul hota hai sahab dabaw se

be-ḳhudī meñ le liyā bosa ḳhatā kiije muaaf

ye dil-e-betāb kī saarī ḳhatā thī maiñ na thā

be-KHudi mein le liya bosa KHata kije muaf

ye dil-e-betab ki sari KHata thi main na tha

mil ga.e the ek baar us ke jo mere lab se lab

'umr bhar hoñToñ pe apne maiñ zabāñ pherā kiyā

mil gae the ek bar us ke jo mere lab se lab

'umr bhar honTon pe apne main zaban phera kiya

bosa-e-ruḳhsār par takrār rahne dījiye

lījiye yā dījiye inkār rahne dījiye

bosa-e-ruKHsar par takrar rahne dijiye

lijiye ya dijiye inkar rahne dijiye

bosa dete nahīñ aur dil pe hai har lahza nigāh

jī meñ kahte haiñ ki muft aa.e to maal achchhā hai

bosa dete nahin aur dil pe hai har lahza nigah

ji mein kahte hain ki muft aae to mal achchha hai

bosa jo ruḳh kā dete nahīñ lab kā dījiye

ye hai masal ki phuul nahīñ pañkhuḌī sahī

bosa jo ruKH ka dete nahin lab ka dijiye

ye hai masal ki phul nahin pankhuDi sahi

dikhā ke jumbish-e-lab hī tamām kar ham ko

na de jo bosa to muñh se kahīñ javāb to de

dikha ke jumbish-e-lab hi tamam kar hum ko

na de jo bosa to munh se kahin jawab to de

ek bosa hoñT par phailā tabassum ban gayā

jo harārat thī mirī us ke badan meñ aa ga.ī

ek bosa honT par phaila tabassum ban gaya

jo hararat thi meri us ke badan mein aa gai

bose apne āriz-e-gulfām ke

lā mujhe de de tire kis kaam ke

bose apne aariz-e-gulfam ke

la mujhe de de tere kis kaam ke

badan kā saarā lahū khiñch ke aa gayā ruḳh par

vo ek bosa hameñ de ke surḳh-rū hai bahut

badan ka sara lahu khinch ke aa gaya ruKH par

wo ek bosa hamein de ke surKH-ru hai bahut

bosa jo talab maiñ ne kiyā hañs ke vo bole

ye husn kī daulat hai luTā.ī nahīñ jaatī

bosa jo talab main ne kiya hans ke wo bole

ye husn ki daulat hai luTai nahin jati

lajā kar sharm khā kar muskurā kar

diyā bosa magar muñh ko banā kar

laja kar sharm kha kar muskura kar

diya bosa magar munh ko bana kar

be-gintī bose leñge ruḳh-e-dil-pasand ke

āshiq tire paḌhe nahīñ ilm-e-hisāb ko

be-ginti bose lenge ruKH-e-dil-pasand ke

aashiq tere paDhe nahin ilm-e-hisab ko

bosa liyā jo us lab-e-shīrīñ kā mar ga.e

dī jaan ham ne chashma-e-āb-e-hayāt par

bosa liya jo us lab-e-shirin ka mar gae

di jaan hum ne chashma-e-ab-e-hayat par

bose biivī ke hañsī bachchoñ kī āñkheñ maañ kī

qaid-ḳhāne meñ giraftār samajhiye ham ko

bose biwi ke hansi bachchon ki aankhen man ki

qaid-KHane mein giraftar samajhiye hum ko

mohabbat ek pākīza amal hai is liye shāyad

simaT kar sharm saarī ek bose meñ chalī aa.ī

mohabbat ek pakiza amal hai is liye shayad

simaT kar sharm sari ek bose mein chali aai

kyā qayāmat hai ki aariz un ke niile paḌ ga.e

ham ne to bosa liyā thā ḳhvāb meñ tasvīr kā

kya qayamat hai ki aariz un ke nile paD gae

hum ne to bosa liya tha KHwab mein taswir ka

aatā hai jī meñ sāqi-e-mah-vash pe baar baar

lab chuum luuñ tirā lab-e-paimāna chhoḌ kar

aata hai ji mein saqi-e-mah-wash pe bar bar

lab chum lun tera lab-e-paimana chhoD kar

le lo bosa apnā vāpas kis liye takrār kī

kyā koī jāgīr ham ne chhīn lī sarkār kī

le lo bosa apna wapas kis liye takrar ki

kya koi jagir hum ne chhin li sarkar ki

bosa hoñToñ kā mil gayā kis ko

dil meñ kuchh aaj dard mīThā hai

bosa honTon ka mil gaya kis ko

dil mein kuchh aaj dard miTha hai

lab-e-nāzuk ke bose luuñ to missī muñh banātī hai

kaf-e-pā ko agar chūmūñ to mehñdī rañg laatī hai

lab-e-nazuk ke bose lun to missi munh banati hai

kaf-e-pa ko agar chumun to mehndi rang lati hai

kyā ḳhuub tum ne ġhair ko bosa nahīñ diyā

bas chup raho hamāre bhī muñh meñ zabān hai

kya KHub tum ne ghair ko bosa nahin diya

bas chup raho hamare bhi munh mein zaban hai

jis lab ke ġhair bose leñ us lab se 'sheftā'

kambaḳht gāliyāñ bhī nahīñ mere vāste

jis lab ke ghair bose len us lab se 'shefta'

kambaKHt galiyan bhi nahin mere waste

na ho barham jo bosa be-ijāzat le liyā maiñ ne

chalo jaane do betābī meñ aisā ho hī jaatā hai

na ho barham jo bosa be-ijazat le liya main ne

chalo jaane do betabi mein aisa ho hi jata hai

bosa to us lab-e-shīrīñ se kahāñ miltā hai

gāliyāñ bhī milīñ ham ko to milīñ thoḌī sī

bosa to us lab-e-shirin se kahan milta hai

galiyan bhi milin hum ko to milin thoDi si

bujhe laboñ pe hai bosoñ kī raakh bikhrī huī

maiñ is bahār meñ ye raakh bhī uḌā dūñgā

bujhe labon pe hai boson ki rakh bikhri hui

main is bahaar mein ye rakh bhi uDa dunga

maiñ aa rahā huuñ abhī chuum kar badan us kā

sunā thā aag pe bosa raqam nahīñ hotā

main aa raha hun abhi chum kar badan us ka

suna tha aag pe bosa raqam nahin hota

kyā taab kyā majāl hamārī ki bosa leñ

lab ko tumhāre lab se milā kar kahe baġhair

kya tab kya majal hamari ki bosa len

lab ko tumhaare lab se mila kar kahe baghair

ham ko gaalī ke liye bhī lab hilā sakte nahīñ

ġhair ko bosa diyā to muñh se dikhlā kar diyā

hum ko gali ke liye bhi lab hila sakte nahin

ghair ko bosa diya to munh se dikhla kar diya

us lab se mil hī jā.egā bosa kabhī to haañ

shauq-e-fuzūl o jur.at-e-rindāna chāhiye

us lab se mil hi jaega bosa kabhi to han

shauq-e-fuzul o jurat-e-rindana chahiye

lab-e-ḳhayāl se us lab kā jo liyā bosa

to muñh hī muñh meñ ajab tarah kā mazā aayā

lab-e-KHayal se us lab ka jo liya bosa

to munh hi munh mein ajab tarah ka maza aaya

sabhī in.aam nit paate haiñ ai shīrīñ-dahan tujh se

kabhū tū ek bose se hamārā muñh bhī mīThā kar

sabhi inam nit pate hain ai shirin-dahan tujh se

kabhu tu ek bose se hamara munh bhi miTha kar

bosāñ labāñ siiñ dene kahā kah ke phir gayā

pyāla bharā sharāb kā afsos gir gayā

bosan laban sin dene kaha kah ke phir gaya

pyala bhara sharab ka afsos gir gaya

dil-lagī meñ hasrat-e-dil kuchh nikal jaatī to hai

bose le lete haiñ ham do-chār hañste bolte

dil-lagi mein hasrat-e-dil kuchh nikal jati to hai

bose le lete hain hum do-chaar hanste bolte

bosa āñkhoñ kā jo māñgā to vo hañs kar bole

dekh lo duur se khāne ke ye bādām nahīñ

bosa aankhon ka jo manga to wo hans kar bole

dekh lo dur se khane ke ye baadam nahin

ruḳhsār par hai rañg-e-hayā kā faroġh aaj

bose kā naam maiñ ne liyā vo nikhar ga.e

ruKHsar par hai rang-e-haya ka farogh aaj

bose ka nam main ne liya wo nikhar gae

sādgī dekh ki bose kī tama.a rakhtā huuñ

jin laboñ se ki mayassar nahīñ dushnām mujhe

sadgi dekh ki bose ki tama rakhta hun

jin labon se ki mayassar nahin dushnam mujhe

jo un ko lipTā ke gaal chūmā hayā se aane lagā pasīna

huī hai bosoñ kī garm bhaTTī khiñche na kyūñkar sharāb-e-āriz

jo un ko lipTa ke gal chuma haya se aane laga pasina

hui hai boson ki garm bhaTTi khinche na kyunkar sharab-e-ariz

jī uThūñ phir kar agar tū ek bosa de mujhe

chūsnā lab kā tire hai mujh ko juuñ āb-e-hayāt

ji uThun phir kar agar tu ek bosa de mujhe

chusna lab ka tere hai mujh ko jun aab-e-hayat

bosa kaisā yahī ġhanīmat hai

ki na samjhe vo lazzat-e-dushnām

bosa kaisa yahi ghanimat hai

ki na samjhe wo lazzat-e-dushnam

ham to kyūñkar kaheñ ki bosa do

gar ināyat karo ināyat hai

hum to kyunkar kahen ki bosa do

gar inayat karo inayat hai

namkīñ goyā kabāb haiñ phīke sharāb ke

bosā hai tujh labāñ kā maze-dār chaTpaTā

namkin goya kabab hain phike sharab ke

bosa hai tujh laban ka maze-dar chaTpaTa

luTāte haiñ vo daulat husn kī bāvar nahīñ aatā

hameñ to ek bosa bhī baḌī mushkil se miltā hai

luTate hain wo daulat husn ki bawar nahin aata

hamein to ek bosa bhi baDi mushkil se milta hai

guḌ siiñ mīThā hai bosa tujh lab kā

is jalebī meñ qand o shakkar hai

guD sin miTha hai bosa tujh lab ka

is jalebi mein qand o shakkar hai

bole vo bosa-hā-e-paiham par

are kam-baḳht kuchh hisāb bhī hai

bole wo bosa-ha-e-paiham par

are kam-baKHt kuchh hisab bhi hai

rakhe hai lazzat-e-bosa se mujh ko gar mahrūm

to apne tū bhī na hoñToñ talak zabāñ pahuñchā

rakhe hai lazzat-e-bosa se mujh ko gar mahrum

to apne tu bhi na honTon talak zaban pahuncha

jī meñ hai itne bose liije ki aaj

mahr us ke vahāñ se uTh jaave

ji mein hai itne bose lije ki aaj

mahr us ke wahan se uTh jawe

bose meñ hoñT ulTā āshiq kā kaaT khāyā

terā dahan maze siiñ pur hai pe hai kaTorā

bose mein honT ulTa aashiq ka kaT khaya

tera dahan maze sin pur hai pe hai kaTora

us vaqt dil pe kyūñke kahūñ kyā guzar gayā

bosa lete liyā to sahī lek mar gayā

us waqt dil pe kyunke kahun kya guzar gaya

bosa lete liya to sahi lek mar gaya