Sher on Deedar

dekhne ke liye saarā aalam bhī kam

chāhne ke liye ek chehrā bahut

dekhne ke liye sara aalam bhi kam

chahne ke liye ek chehra bahut

kuchh nazar aatā nahīñ us ke tasavvur ke sivā

hasrat-e-dīdār ne āñkhoñ ko andhā kar diyā

kuchh nazar aata nahin us ke tasawwur ke siwa

hasrat-e-didar ne aankhon ko andha kar diya

ab vahī karne lage dīdār se aage kī baat

jo kabhī kahte the bas dīdār honā chāhiye

ab wahi karne lage didar se aage ki baat

jo kabhi kahte the bas didar hona chahiye

merī āñkheñ aur dīdār aap kā

yā qayāmat aa ga.ī yā ḳhvāb hai

meri aankhen aur didar aap ka

ya qayamat aa gai ya KHwab hai

kahte haiñ eid hai aaj apnī bhī eid hotī

ham ko agar mayassar jānāñ kī diid hotī

kahte hain eid hai aaj apni bhi eid hoti

hum ko agar mayassar jaanan ki did hoti

janāb ke ruḳh-e-raushan kī diid ho jaatī

to ham siyāh-nasīboñ kī iid ho jaatī

janab ke ruKH-e-raushan ki did ho jati

to hum siyah-nasibon ki id ho jati

dekhā nahīñ vo chāñd sā chehrā ka.ī din se

tārīk nazar aatī hai duniyā ka.ī din se

dekha nahin wo chand sa chehra kai din se

tarik nazar aati hai duniya kai din se

tum apne chāñd taare kahkashāñ chāhe jise denā

mirī āñkhoñ pe apnī diid kī ik shaam likh denā

tum apne chand tare kahkashan chahe jise dena

meri aankhon pe apni did ki ek sham likh dena

zāhir kī aañkh se na tamāshā kare koī

ho dekhnā to dīda-e-dil vā kare koī

zahir ki aankh se na tamasha kare koi

ho dekhna to dida-e-dil wa kare koi

tū sāmne hai to phir kyuuñ yaqīñ nahīñ aatā

ye baar baar jo āñkhoñ ko mal ke dekhte haiñ

tu samne hai to phir kyun yaqin nahin aata

ye bar bar jo aankhon ko mal ke dekhte hain

sunā hai hashr meñ har aañkh use be-parda dekhegī

mujhe Dar hai na tauhīn-e-jamāl-e-yār ho jaa.e

suna hai hashr mein har aankh use be-parda dekhegi

mujhe Dar hai na tauhin-e-jamal-e-yar ho jae

haTāo aa.ina ummīd-vār ham bhī haiñ

tumhāre dekhne vāloñ meñ yaar ham bhī haiñ

haTao aaina ummid-war hum bhi hain

tumhaare dekhne walon mein yar hum bhi hain

dīdār kī talab ke tarīqoñ se be-ḳhabar

dīdār kī talab hai to pahle nigāh maañg

didar ki talab ke tariqon se be-KHabar

didar ki talab hai to pahle nigah mang

na vo sūrat dikhāte haiñ na milte haiñ gale aa kar

na āñkheñ shaad hotīñ haiñ na dil masrūr hotā hai

na wo surat dikhate hain na milte hain gale aa kar

na aankhen shad hotin hain na dil masrur hota hai

kyuuñ jal gayā na tāb-e-ruḳh-e-yār dekh kar

jaltā huuñ apnī tāqat-e-dīdār dekh kar

kyun jal gaya na tab-e-ruKH-e-yar dekh kar

jalta hun apni taqat-e-didar dekh kar

vo dushmanī se dekhte haiñ dekhte to haiñ

maiñ shaad huuñ ki huuñ to kisī kī nigāh meñ

wo dushmani se dekhte hain dekhte to hain

main shad hun ki hun to kisi ki nigah mein

ab aur der na kar hashr barpā karne meñ

mirī nazar tire dīdār ko tarastī hai

ab aur der na kar hashr barpa karne mein

meri nazar tere didar ko tarasti hai

jo aur kuchh ho tirī diid ke sivā manzūr

to mujh pe ḳhvāhish-e-jannat harām ho jaa.e

jo aur kuchh ho teri did ke siwa manzur

to mujh pe KHwahish-e-jannat haram ho jae

aap idhar aa.e udhar diin aur īmān ga.e

iid kā chāñd nazar aayā to ramzān ga.e

aap idhar aae udhar din aur iman gae

id ka chand nazar aaya to ramzan gae

tirā dīdār ho hasrat bahut hai

chalo ki niiñd bhī aane lagī hai

tera didar ho hasrat bahut hai

chalo ki nind bhi aane lagi hai

mirā jī to āñkhoñ meñ aayā ye sunte

ki dīdār bhī ek din aam hogā

mera ji to aankhon mein aaya ye sunte

ki didar bhi ek din aam hoga

hāsil us mah-laqā kī diid nahīñ

eid hai aur ham ko eid nahīñ

hasil us mah-laqa ki did nahin

eid hai aur hum ko eid nahin

kāsa-e-chashm le ke juuñ nargis

ham ne dīdār kī gadā.ī kī

kasa-e-chashm le ke jun nargis

hum ne didar ki gadai ki

us ko dekhā to ye mahsūs huā

ham bahut duur the ḳhud se pahle

us ko dekha to ye mahsus hua

hum bahut dur the KHud se pahle

is qamar ko kabhī to dekheñge

tiis din hote haiñ mahīne ke

is qamar ko kabhi to dekhenge

tis din hote hain mahine ke

uTh ai naqāb-e-yār ki baiThe haiñ der se

kitne ġharīb dīda-e-pur-nam liye hue

uTh ai naqab-e-yar ki baiThe hain der se

kitne gharib dida-e-pur-nam liye hue

ā.īna kabhī qābil-e-dīdār na hove

gar ḳhaak ke saath us ko sarokār na hove

aaina kabhi qabil-e-didar na howe

gar KHak ke sath us ko sarokar na howe

jaise jaise dar-e-dildār qarīb aatā hai

dil ye kahtā hai ki pahuñchūñ maiñ nazar se pahle

jaise jaise dar-e-dildar qarib aata hai

dil ye kahta hai ki pahunchun main nazar se pahle

aañkh uThā kar use dekhūñ huuñ to nazroñ meñ mujhe

yuuñ jatātā hai ki kyā tujh ko nahīñ Dar merā

aankh uTha kar use dekhun hun to nazron mein mujhe

yun jatata hai ki kya tujh ko nahin Dar mera

'dard' ke milne se ai yaar burā kyuuñ maanā

us ko kuchh aur sivā diid ke manzūr na thā

'dard' ke milne se ai yar bura kyun mana

us ko kuchh aur siwa did ke manzur na tha

ilāhī kyā khule dīdār kī raah

udhar darvāze band āñkheñ idhar band

ilahi kya khule didar ki rah

udhar darwaze band aankhen idhar band

āfrīñ tujh ko hasrat-e-dīdār

chashm-e-tar se zabāñ kā kaam liyā

aafrin tujh ko hasrat-e-didar

chashm-e-tar se zaban ka kaam liya

tirī pahlī diid ke saath hī vo fusūñ bhī thā

tujhe dekh kar tujhe dekhnā mujhe aa gayā

teri pahli did ke sath hi wo fusun bhi tha

tujhe dekh kar tujhe dekhna mujhe aa gaya

dekhnā hasrat-e-dīdār ise kahte haiñ

phir gayā muñh tirī jānib dam-e-murdan apnā

dekhna hasrat-e-didar ise kahte hain

phir gaya munh teri jaanib dam-e-murdan apna

TūTeñ vo sar jis meñ terī zulf kā saudā nahīñ

phūTeñ vo āñkheñ ki jin ko diid kā lapkā nahīñ

TuTen wo sar jis mein teri zulf ka sauda nahin

phuTen wo aankhen ki jin ko did ka lapka nahin

maiñ kāmyāb-e-dīd bhī mahrūm-e-dīd bhī

jalvoñ ke izhdihām ne hairāñ banā diyā

main kaamyab-e-did bhi mahrum-e-did bhi

jalwon ke izhdiham ne hairan bana diya