Sher on Sukoon

baḌe sukūn se afsurdagī meñ rahtā huuñ

maiñ apne sāmne vaalī galī meñ rahtā huuñ

baDe sukun se afsurdagi mein rahta hun

main apne samne wali gali mein rahta hun

ġham hai to koī lutf nahīñ bistar-e-gul par

jī ḳhush hai to kāñToñ pe bhī ārām bahut hai

gham hai to koi lutf nahin bistar-e-gul par

ji KHush hai to kanTon pe bhi aaram bahut hai

aur bhī dukh haiñ zamāne meñ mohabbat ke sivā

rāhateñ aur bhī haiñ vasl kī rāhat ke sivā

aur bhi dukh hain zamane mein mohabbat ke siwa

rahaten aur bhi hain wasl ki rahat ke siwa

maut kī god meñ jab tak nahīñ tū so jaatā

tū 'sadā' chain se hargiz nahīñ sone vaalā

maut ki god mein jab tak nahin tu so jata

tu 'sada' chain se hargiz nahin sone wala

qarār dil ko sadā jis ke naam se aayā

vo aayā bhī to kisī aur kaam se aayā

qarar dil ko sada jis ke nam se aaya

wo aaya bhi to kisi aur kaam se aaya

sukūn de na sakīñ rāhateñ zamāne kī

jo niiñd aa.ī tire ġham kī chhāñv meñ aa.ī

sukun de na sakin rahaten zamane ki

jo nind aai tere gham ki chhanw mein aai

kis ne paayā sukūn duniyā meñ

zindagānī kā sāmnā kar ke

kis ne paya sukun duniya mein

zindagani ka samna kar ke

sukūn-e-dil ke liye ishq to bahāna thā

vagarna thak ke kahīñ to Thahar hī jaanā thā

sukun-e-dil ke liye ishq to bahana tha

wagarna thak ke kahin to Thahar hi jaana tha

ham ko na mil sakā to faqat ik sukūn-e-dil

ai zindagī vagarna zamāne meñ kyā na thā

hum ko na mil saka to faqat ek sukun-e-dil

ai zindagi wagarna zamane mein kya na tha

ye kis azaab meñ chhoḌā hai tū ne is dil ko

sukūn yaad meñ terī na bhūlne meñ qarār

ye kis azab mein chhoDa hai tu ne is dil ko

sukun yaad mein teri na bhulne mein qarar

na jaane ruuTh ke baiThā hai dil kā chain kahāñ

mile to us ko hamārā koī salām kahe

na jaane ruTh ke baiTha hai dil ka chain kahan

mile to us ko hamara koi salam kahe

naam hoñToñ pe tirā aa.e to rāhat sī mile

tū tasallī hai dilāsa hai duā hai kyā hai

nam honTon pe tera aae to rahat si mile

tu tasalli hai dilasa hai dua hai kya hai

dil kī zid is liye rakh lī thī ki aa jaa.e qarār

kal ye kuchh aur kahegā mujhe ma.alūm na thā

dil ki zid is liye rakh li thi ki aa jae qarar

kal ye kuchh aur kahega mujhe malum na tha

mai-kada hai yahāñ sukūñ se baiTh

koī aafat idhar nahīñ aatī

mai-kada hai yahan sukun se baiTh

koi aafat idhar nahin aati

manzil pe bhī pahuñch ke mayassar nahīñ sakūñ

majbūr is qadar haiñ shu.ūr-e-safar se ham

manzil pe bhi pahunch ke mayassar nahin sakun

majbur is qadar hain shuur-e-safar se hum

milā na ghar se nikal kar bhī chain ai 'zāhid'

khulī fazā meñ vahī zahr thā jo ghar meñ thā

mila na ghar se nikal kar bhi chain ai 'zahid'

khuli faza mein wahi zahr tha jo ghar mein tha

kise ḳhabar ki ahl-e-ġham sukūn kī talāsh meñ

sharāb kī taraf ga.e sharāb ke liye nahīñ

kise KHabar ki ahl-e-gham sukun ki talash mein

sharab ki taraf gae sharab ke liye nahin

sukūn-e-dil jahān-e-besh-o-kam meñ DhūñDne vaale

yahāñ har chiiz miltī hai sukūn-e-dil nahīñ miltā

sukun-e-dil jahan-e-besh-o-kam mein DhunDne wale

yahan har chiz milti hai sukun-e-dil nahin milta