Sher on Muskurahat

hamārī muskurāhaT par na jaanā

diyā to qabr par bhī jal rahā hai

hamari muskurahaT par na jaana

diya to qabr par bhi jal raha hai

ai ġham-e-zindagī na ho nārāz

mujh ko aadat hai muskurāne kī

ai gham-e-zindagi na ho naraaz

mujh ko aadat hai muskurane ki

tum hañso to din nikle chup raho to rāteñ haiñ

kis kā ġham kahāñ kā ġham sab fuzūl bāteñ haiñ

tum hanso to din nikle chup raho to raaten hain

kis ka gham kahan ka gham sab fuzul baaten hain

muskurāhaT hai husn kā zevar

muskurānā na bhuul jaayā karo

muskurahaT hai husn ka zewar

muskurana na bhul jaya karo

dil meñ tūfān ho gayā barpā

tum ne jab muskurā ke dekh liyā

dil mein tufan ho gaya barpa

tum ne jab muskura ke dekh liya

dhuup niklī hai bārishoñ ke ba.ad

vo abhī ro ke muskurā.e haiñ

dhup nikli hai barishon ke baad

wo abhi ro ke muskurae hain

ek aisā bhī vaqt hotā hai

muskurāhaT bhī aah hotī hai

ek aisa bhi waqt hota hai

muskurahaT bhi aah hoti hai

bujh ga.ī sham.a kī lau tere dupaTTe se to kyā

apnī muskān se mahfil ko munavvar kar de

bujh gai shama ki lau tere dupaTTe se to kya

apni muskan se mahfil ko munawwar kar de

aur bhī kitne tarīqe haiñ bayān-e-ġham ke

muskurātī huī āñkhoñ ko to pur-nam na karo

aur bhi kitne tariqe hain bayan-e-gham ke

muskuraati hui aankhon ko to pur-nam na karo

muskurā kar dekh lete ho mujhe

is tarah kyā haq adā ho jā.egā

muskura kar dekh lete ho mujhe

is tarah kya haq ada ho jaega

yuuñ muskurā.e jaan sī kaliyoñ meñ paḌ ga.ī

yuuñ lab-kushā hue ki gulistāñ banā diyā

yun muskurae jaan si kaliyon mein paD gai

yun lab-kusha hue ki gulistan bana diya

ab aur is ke sivā chāhte ho kyā 'mullā'

ye kam hai us ne tumheñ muskurā ke dekh liyā

ab aur is ke siwa chahte ho kya 'mulla'

ye kam hai us ne tumhein muskura ke dekh liya

mere hoñToñ pe muskurāhaT hai

garche siine meñ daaġh rakhtā huuñ

mere honTon pe muskurahaT hai

garche sine mein dagh rakhta hun

muskurānā kabhī na raas aayā

har hañsī ek vārdāt banī

muskurana kabhi na ras aaya

har hansi ek wardat bani

nahīñ itāb-e-zamāna ḳhitāb ke qābil

tirā javāb yahī hai ki muskurā.e jā

nahin itab-e-zamana KHitab ke qabil

tera jawab yahi hai ki muskurae ja

mire habīb mirī muskurāhaToñ pe na jā

ḳhudā-gavāh mujhe aaj bhī tirā ġham hai

mere habib meri muskurahaTon pe na ja

KHuda-gawah mujhe aaj bhi tera gham hai

mahfil meñ log chauñk paḌe mere naam par

tum muskurā diye mirī qīmat yahī to hai

mahfil mein log chaunk paDe mere nam par

tum muskura diye meri qimat yahi to hai

jaise pau phaT rahī ho jañgal meñ

yuuñ koī muskurā.e jaatā hai

jaise pau phaT rahi ho jangal mein

yun koi muskurae jata hai

shāmil nahīñ haiñ jis meñ terī muskurāhaTeñ

vo zindagī kisī bhī jahannam se kam nahīñ

shamil nahin hain jis mein teri muskurahaTen

wo zindagi kisi bhi jahannam se kam nahin

vahāñ salām ko aatī hai nañge paañv bahār

khile the phuul jahāñ tere muskurāne se

wahan salam ko aati hai nange panw bahaar

khile the phul jahan tere muskurane se

itnā royā huuñ ġham-e-dost zarā sā hañs kar

muskurāte hue lamhāt se jī Dartā hai

itna roya hun gham-e-dost zara sa hans kar

muskuraate hue lamhat se ji Darta hai

muskurāne kā yahī andāz thā

jab kalī chaTkī to vo yaad aa gayā

muskurane ka yahi andaz tha

jab kali chaTki to wo yaad aa gaya

muskurāne kī kyā zarūrat hai

aap yuuñ bhī udaas lagte haiñ

muskurane ki kya zarurat hai

aap yun bhi udas lagte hain

jiine marne kā ek hī sāmān

us kī muskān ho ga.ī hogī

jine marne ka ek hi saman

us ki muskan ho gai hogi

vo muskurā ke koī baat kar rahā thā 'shumār'

aur us ke lafz bhī the chāñdnī meñ bikhre hue

wo muskura ke koi baat kar raha tha 'shumar'

aur us ke lafz bhi the chandni mein bikhre hue

guzar rahā hai idhar se to muskurātā jā

charāġh-e-majlis-e-rūhāniyāñ jalātā jā

guzar raha hai idhar se to muskuraata ja

charagh-e-majlis-e-ruhaniyan jalata ja

'nazīr' log to chehre badalte rahte haiñ

tū itnā saada na ban muskurāhaTeñ pahchān

'nazir' log to chehre badalte rahte hain

tu itna sada na ban muskurahaTen pahchan

diloñ ko tere tabassum kī yaad yuuñ aa.ī

ki jagmagā uTheñ jis tarah mandiroñ meñ charāġh

dilon ko tere tabassum ki yaad yun aai

ki jagmaga uThen jis tarah mandiron mein charagh

hamāre ghar se jaanā muskurā kar phir ye farmānā

tumheñ merī qasam dekho mirī raftār kaisī hai

hamare ghar se jaana muskura kar phir ye farmana

tumhein meri qasam dekho meri raftar kaisi hai

zindagī bas muskurā ke rah ga.ī

kyoñ hameñ nāhaq rijhā ke rah ga.ī

zindagi bas muskura ke rah gai

kyon hamein nahaq rijha ke rah gai

uThāo camera tasvīr khīñch lo in kī

udaas log kahāñ roz muskurāte haiñ

uThao camera taswir khinch lo in ki

udas log kahan roz muskuraate hain