فضا مغموم ہے ساقی اٹھا چھلکائیں پیمانہ

اندھیرا بڑھ چلا ہے لا ذرا قندیل مے خانہ

عیش کے یار تو اغیار بھی بن جاتے ہیں

دوست وہ ہیں جو برے وقت میں کام آتے ہیں

ذرا سی بات تھی عرض تمنا پر بگڑ بیٹھے

وہ میری عمر بھر کی داستان درد کیا سنتے

شعر اچھا برا نہیں ہوتا

یا تو ہوتا ہے یا نہیں ہوتا

جوکھم اے مردم دیدہ ہے سمجھ کے رونا

ڈوب بھی جاتے ہیں دریا میں نہانے والے

ناتوانی کا بھی احساں ہے مری گردن پر

کہ ترے پاؤں سے سر مجھ کو اٹھانے نہ دیا

اغیار بھی ہیں اس کی گلی میں تو کیا گلہ

وہ گلستاں ہی کیا ہے جہاں خار و خس نہیں

ڈبو کے سارے سفینے قریب ساحل کے

ہے ان کو پھر بھی یہ دعویٰ کہ نا خدا ہم ہیں

یا رب پڑی رہے میری میت اسی طرح

بیٹھے رہیں وہ بال پریشاں کیے ہوئے

وہ عیادت کے لئے آئے ہیں لو اور سہی

آج ہی خوبیٔ تقدیر سے حال اچھا ہے

کیا ملا تم کو مرے عشق کا چرچا کر کے

تم بھی رسوا ہوئے آخر مجھے رسوا کر کے

لوگ کانٹوں سے بچ کے چلتے ہیں

میں نے پھولوں سے زخم کھائے ہیں

سنا ہے تیری محفل میں سکون دل بھی ملتا ہے

مگر ہم جب تری محفل سے آئے بے قرار آئے

تم سمندر کی بات کرتے ہو

لوگ آنکھوں میں ڈوب جاتے ہیں

تو دل پہ بوجھ لے کے ملاقات کو نہ آ

ملنا ہے اس طرح تو بچھڑنا قبول ہے

یہ فقط آپ کی عنایت ہے

ورنہ میں کیا مری حقیقت کیا

کیا ہے قطع رشتہ سبحہ و زنار کا ہم نے

کہ شیخ اپنا مخالف ہے تو دشمن برہمن اپنا

غیر کو آنے نہ دوں تم کو کہیں جانے نہ دوں

کاش مل جائے تمہارے گھر کی دربانی مجھے

تیرے نثار ساقیا جتنی پیوں پلائے جا

مست نظر کا واسطہ مست مجھے بنائے جا

شک ان کو تھا کہ رات میں بوسہ نہ لے کوئی

گالوں پہ رکھ کے سوئے کلائی تمام رات

کیونکر نہ لطف بادہ کشی کا ہو آب میں

بارش میں جو حروف ہیں وہ ہیں شراب میں

لڑنے کو اس سے رات میں غصہ میں لڑ لیا

پر جب وہ اٹھ چلا تو کلیجہ پکڑ لیا

وہ کہہ کے چلے اتنی ملاقات بہت ہے

میں نے کہا رک جاؤ ابھی رات بہت ہے

مستوں پہ انگلیاں نہ اٹھاؤ بہار میں

دیکھو تو ہوش ہے بھی کسی ہوشیار میں

اگر فردوس بر روئے زمیں است

ہمیں است و ہمیں است و ہمیں است

بارش ہوئی تو گھر کے دریچے سے لگ کے ہم

چپ چاپ سوگوار تمہیں سوچتے رہے

ضدوں میں ترک تعلق تو کر لیا لیکن

سکون ان کو نہیں بے قرار ہم بھی ہیں

ہے دل ترا ہے جاں تری ایمان ہے ترا

تو کیسے مانوں تیرا مقدر نہیں ہوں میں

خدا کرے نہ ڈھلے دھوپ تیرے چہرہ کی

تمام عمر تری زندگی کی شام نہ ہو

جینے کی آرزو میں جو مرتے ہیں ساری عمر

شاید حیات نام اسی مرحلے کا ہے

کئی جوابوں سے اچھی ہے خامشی میری

نہ جانے کتنے سوالوں کی آبرو رکھے

رہ گئے سبحہ و زنار کے جھگڑے باقی

دھرم ہندو میں نہیں دین مسلماں میں نہیں

کھلونوں کی دکانو راستا دو

مرے بچے گزرنا چاہتے ہیں

یہ کہہ کے دیا اس نے درد محبت

جہاں ہم رہیں گے یہ ساماں رہے گا

نکل کے خلد سے ان کو ملی خلافت ارض

نکالے جانے کی تہمت ہمارے سر آئی

جانتے ہیں ہم محبت آزمائی ہو چکی

آؤ لگ جاؤ گلے بس اب لڑائی ہو چکی

نہ خدا ہی ملا نہ وصال صنم نہ ادھر کے ہوئے نہ ادھر کے ہوئے

رہے دل میں ہمارے یہ رنج و الم نہ ادھر کے ہوئے نہ ادھر کے ہوئے

اس مرض سے کوئی بچا بھی ہے

چارہ گر عشق کی دوا بھی ہے

کمسنی کا حسن تھا وہ یہ جوانی کی بہار

تھا یہی تل پہلے بھی رخ پر مگر قاتل نہ تھا

دستور ہے دنیا کا مگر یہ تو بتاؤ

ہم کس سے ملیں کس سے کہیں عید مبارک

دل یہی کہتا چلا ہے کوئے جاناں کی طرف

اور تھوڑی دور چلئے اور تھوڑی دور ہے

رکھ کے منہ سو گئے ہم آتشیں رخساروں پر

دل کو تھا چین تو نیند آ گئی انگاروں پر

جلوہ مچل پڑے تو سحر کا گماں ہوا

زلفیں بکھر گئیں تو سیاہ رات ہو گئی

وصل کو موقوف کرنا پڑ گیا ہے چند روز

اب مجھے ملنے نہ آنا اب کوئی شکوہ نہیں

در پہ شاہوں کے نہیں جاتے فقیر اللہ کے

سر جہاں رکھتے ہیں سب ہم واں قدم رکھتے نہیں

پلکوں کی حد کو توڑ کے دامن پہ آ گرا

اک اشک میرے صبر کی توہین کر گیا

غیر کو درد سنانے کی ضرورت کیا ہے

اپنے جھگڑے میں زمانے کی ضرورت کیا ہے

تماشا دیکھ رہے تھے جو ڈوبنے کا مرے

مری تلاش میں نکلے ہیں کشتیاں لے کر

گلشن سے کوئی پھول میسر نہ جب ہوا

تتلی نے راکھی باندھ دی کانٹے کی نوک پر

اب میں سمجھا ترے رخسار پہ تل کا مطلب

دولت حسن پہ دربان بٹھا رکھا ہے