Sher on Pyas

kamāl-e-tishnagī hī se bujhā lete haiñ pyaas apnī

isī tapte hue sahrā ko ham dariyā samajhte haiñ

kamal-e-tishnagi hi se bujha lete hain pyas apni

isi tapte hue sahra ko hum dariya samajhte hain

aaj pī kar bhī vahī tishna-labī hai saaqī

lutf meñ tere kahīñ koī kamī hai saaqī

aaj pi kar bhi wahi tishna-labi hai saqi

lutf mein tere kahin koi kami hai saqi

vo majbūrī maut hai jis meñ kaase ko buniyād mile

pyaas kī shiddat jab baḌhtī hai Dar lagtā hai paanī se

wo majburi maut hai jis mein kase ko buniyaad mile

pyas ki shiddat jab baDhti hai Dar lagta hai pani se

kitne dinoñ ke pyāse hoñge yaaro socho to

shabnam kā qatra bhī jin ko dariyā lagtā hai

kitne dinon ke pyase honge yaro socho to

shabnam ka qatra bhi jin ko dariya lagta hai

do dariyā bhī jab aapas meñ milte haiñ

donoñ apnī apnī pyaas bujhāte haiñ

do dariya bhi jab aapas mein milte hain

donon apni apni pyas bujhate hain

tum us ke paas ho jis ko tumhārī chaah na thī

kahāñ pe pyaas thī dariyā kahāñ banāyā gayā

tum us ke pas ho jis ko tumhaari chah na thi

kahan pe pyas thi dariya kahan banaya gaya

saaqī mire bhī dil kī taraf Tuk nigāh kar

lab-tishna terī bazm meñ ye jaam rah gayā

saqi mere bhi dil ki taraf Tuk nigah kar

lab-tishna teri bazm mein ye jam rah gaya

piitā huuñ jitnī utnī hī baḌhtī hai tishnagī

saaqī ne jaise pyaas milā dī sharāb meñ

pita hun jitni utni hi baDhti hai tishnagi

saqi ne jaise pyas mila di sharab mein

aisī pyaas aur aisā sabr

dariyā paanī paanī hai

aisi pyas aur aisa sabr

dariya pani pani hai

saaqī mujhe ḳhumār satā.e hai lā sharāb

martā huuñ tishnagī se ai zālim pilā sharāb

saqi mujhe KHumar satae hai la sharab

marta hun tishnagi se ai zalim pila sharab

harf apne hī ma.ānī kī tarah hotā hai

pyaas kā zā.iqa paanī kī tarah hotā hai

harf apne hi maani ki tarah hota hai

pyas ka zaiqa pani ki tarah hota hai

thā zahr ko hoñToñ se lagānā hī munāsib

varna ye mirī tishna-labī kam nahīñ hotī

tha zahr ko honTon se lagana hi munasib

warna ye meri tishna-labi kam nahin hoti

vo sāmne haiñ magar tishnagī nahīñ jaatī

ye kyā sitam hai ki dariyā sarāb jaisā hai

wo samne hain magar tishnagi nahin jati

ye kya sitam hai ki dariya sarab jaisa hai

sāhil tamām ashk-e-nadāmat se aT gayā

dariyā se koī shaḳhs to pyāsā palaT gayā

sahil tamam ashk-e-nadamat se aT gaya

dariya se koi shaKHs to pyasa palaT gaya

tishna-lab aisā ki hoñToñ pe paḌe haiñ chhāle

mutma.in aisā huuñ dariyā ko bhī hairānī hai

tishna-lab aisa ki honTon pe paDe hain chhaale

mutmain aisa hun dariya ko bhi hairani hai

ruuh kis mast kī pyāsī ga.ī mai-ḳhāne se

mai uḌī jaatī hai saaqī tire paimāne se

ruh kis mast ki pyasi gai mai-KHane se

mai uDi jati hai saqi tere paimane se

pyaas kī saltanat nahīñ miTtī

laakh dajle banā furāt banā

pyas ki saltanat nahin miTti

lakh dajle bana furaat bana

pyaas baḌhtī jā rahī hai bahtā dariyā dekh kar

bhāgtī jaatī haiñ lahreñ ye tamāshā dekh kar

pyas baDhti ja rahi hai bahta dariya dekh kar

bhagti jati hain lahren ye tamasha dekh kar

jise bhī pyaas bujhānī ho mere paas rahe

kabhī bhī apne laboñ se chhalakne lagtā huuñ

jise bhi pyas bujhani ho mere pas rahe

kabhi bhi apne labon se chhalakne lagta hun

phir is ke baad hameñ tishnagī rahe na rahe

kuchh aur der muravvat se kaam le saaqī

phir is ke baad hamein tishnagi rahe na rahe

kuchh aur der murawwat se kaam le saqi

vo jo pyāsā lagtā thā sailāb-zada thā

paanī paanī kahte kahte Duub gayā hai

wo jo pyasa lagta tha sailab-zada tha

pani pani kahte kahte Dub gaya hai

sāqiyā tishnagī kī taab nahīñ

zahr de de agar sharāb nahīñ

saqiya tishnagi ki tab nahin

zahr de de agar sharab nahin

ab to utnī bhī mayassar nahīñ mai-ḳhāne meñ

jitnī ham chhoḌ diyā karte the paimāne meñ

ab to utni bhi mayassar nahin mai-KHane mein

jitni hum chhoD diya karte the paimane mein

bahut ġhurūr hai dariyā ko apne hone par

jo merī pyaas se uljhe to dhajjiyāñ uḌ jaa.eñ

bahut ghurur hai dariya ko apne hone par

jo meri pyas se uljhe to dhajjiyan uD jaen