تجھ سے بچھڑوں تو کوئی پھول نہ مہکے مجھ میں

دیکھ کیا کرب ہے کیا ذات کی سچائی ہے

یہ راہ تمنا ہے یہاں دیکھ کے چلنا

اس راہ میں سر ملتے ہیں پتھر نہیں ملتا

اسی نے مجھ پہ اٹھائے ہیں سنگ جس کے لیے

میں پاش پاش ہوا گھر نگار خانہ ہوا

قربتیں ریت کی دیوار ہیں گر سکتی ہیں

مجھ کو خود اپنے ہی سائے میں ٹھہر جانا تھا

کہنے کو غم ہجر بڑا دشمن جاں ہے

پر دوست بھی اس دوست سے بہتر نہیں ملتا

ملنے کی طرح مجھ سے وہ پل بھر نہیں ملتا

دل اس سے ملا جس سے مقدر نہیں ملتا

بچھڑتے وقت ان آنکھوں میں تھی ہماری غزل

غزل بھی وہ جو کسی کو ابھی سنائی نہ تھی

یہ ہوا سارے چراغوں کو اڑا لے جائے گی

رات ڈھلنے تک یہاں سب کچھ دھواں ہو جائے گا

تجھے کیا خبر مرے بے خبر مرا سلسلہ کوئی اور ہے

جو مجھی کو مجھ سے بہم کرے وہ گریز پا کوئی اور ہے

عداوتیں تھیں، تغافل تھا، رنجشیں تھیں بہت

بچھڑنے والے میں سب کچھ تھا، بے وفائی نہ تھی

یہ روح رقص چراغاں ہے اپنے حلقے میں

یہ جسم سایہ ہے اور سایہ ڈھل رہا ہے میاں

شاید یہ انتظار کی لو فیصلہ کرے

میں اپنے ساتھ ہوں کہ دریچوں کے ساتھ ہوں

اس کڑی دھوپ میں سایہ کر کے

تو کہاں ہے مجھے تنہا کر کے

کچھ روز نصیر آؤ چلو گھر میں رہا جائے

لوگوں کو یہ شکوہ ہے کہ گھر پر نہیں ملتا

مدتوں بعد اگر سامنے آئے ہم تم

دھندلے دھندلے سے ملیں گے خد و خال ایسے میں

خود اپنے ہجر کی خواہش مجھے عزیز رہی

یہ تیرے وصل کا قصہ تو اک بہانہ ہوا

میں اک شجر کی طرح رہگزر میں ٹھہرا ہوں

تھکن اتار کے تو کس طرف روانہ ہوا

آج کی رات اجالے مرے ہمسایہ ہیں

آج کی رات جو سو لوں تو نیا ہو جاؤں

شہر میں کس سے سخن رکھیے کدھر کو چلیے

اتنی تنہائی تو گھر میں بھی ہے گھر کو چلیے

وہ ہم سفر تھا مگر اس سے ہم نوائی نہ تھی

کہ دھوپ چھاؤں کا عالم رہا جدائی نہ تھی