آئنہ آئنہ تیرتا کوئی عکس

اور ہر خواب میں دوسرا خواب ہے

ذرا سے رزق میں برکت بھی کتنی ہوتی تھی

اور اک چراغ سے کتنے چراغ جلتے تھے

کچھ بدن کی زبان کہتی تھی

آنسوؤں کی زبان میں تھا کچھ

ریل کی پٹری نے اس کے ٹکڑے ٹکڑے کر دیئے

آپ اپنی ذات سے اس کو بہت انکار تھا

وہ رات نیند کی دہلیز پر تمام ہوئی

ابھی تو خواب پہ اک اور خواب دھرنا تھا

مجھ میں خود میری عدم موجودگی شامل رہی

ورنہ اس ماحول میں جینا بڑا دشوار تھا

کس کے پیروں کے نقش ہیں مجھ میں

میرے اندر یہ کون چلتا ہے

اس گلی سے اس گلی تک دوڑتا رہتا ہوں میں

رات اتنی ہی میسر ہے سفر اتنا ہی ہے

ہر منظر کے اندر بھی اک منظر ہے

دیکھنے والا بھی تو ہو تیار مجھے

لمس کی شدتیں محفوظ کہاں رہتی ہیں

جب وہ آتا ہے کئی فاصلے کر جاتا ہے

فضا میں ہاتھ تو اٹھے تھے ایک ساتھ کئی

کسی کے واسطے کوئی دعا نہ کرتا تھا

کہاں پہنچ کے حدیں سب تمام ہوتی ہیں

اس آسمان سے نیچے اتر کے دیکھا جائے

کسی اک زخم کے لب کھل گئے تھے

میں اتنی زور سے چیخا نہیں تھا

تم نے تو فقط اس کی روایت ہی سنی ہے

ہم نے وہ زمانہ بھی گزرتے ہوئے دیکھا

اپنے سوکھے ہوئے گلدان کا غم ہے مجھ کو

آنکھ میں اشک کا قطرہ بھی نہیں ہے کوئی

ہم زمیں کی طرف جب آئے تھے

آسمانوں میں رہ گیا تھا کچھ

یہ دیکھا جائے وہ کتنے قریب آتا ہے

پھر اس کے بعد ہی انکار کر کے دیکھا جائے

پانی تھا مگر اپنے ہی دریا سے جدا تھا

چڑھتے ہوئے دیکھا نہ اترتے ہوئے دیکھا

کوئی شب ڈھونڈتی تھی مجھ کو اور میں

تری نیندوں میں جا کر سو گیا تھا

وہ بات تھی تو کئی دوسرے سبب بھی تھے

یہ بات ہے تو سبب دوسرا نہیں ہوگا

خوابوں کی کرچیاں مری مٹھی میں بھر نہ جائے

آئندہ لمحہ اب کے بھی یوں ہی گزر نہ جائے

بڑی چیز ہے یہ سپردگی کا مہین پل

نہ سمجھ سکو تو مجھے گنوا کے بھی دیکھنا

دن کے ہنگامے جلا دیتے ہیں مجھ کو ورنہ

صبح سے پہلے کئی مرتبہ مر جاتا ہوں

یہ راہ طلب یارو گمراہ بھی کرتی ہے

سامان اسی کا تھا جو بے سر و ساماں تھا

ابھی تو کانٹوں بھری جھاڑیوں میں اٹکا ہے

کبھی دکھائی دیا تھا ہرا بھرا وہ بھی

ترے فلک ہی سے ٹوٹنے والی روشنی کے ہیں عکس سارے

کہیں کہیں جو چمک رہے ہیں حروف میری عبارتوں میں

سفر گرفتہ رہے کشتگان نان و نمک

ہمارے حق میں کوئی فیصلہ نہ کرتا تھا

کچھ اور دن ابھی اس جا قیام کرنا تھا

یہاں چراغ وہاں پر ستارہ دھرنا تھا