ہم آپ قیامت سے گزر کیوں نہیں جاتے

جینے کی شکایت ہے تو مر کیوں نہیں جاتے

ایک محبت کافی ہے

باقی عمر اضافی ہے

تمہیں خیال نہیں کس طرح بتائیں تمہیں

کہ سانس چلتی ہے لیکن اداس چلتی ہے

مری نگاہ میں کچھ اور ڈھونڈنے والے

تری نگاہ میں کچھ اور ڈھونڈتا ہوں میں

دیکھو دنیا ہے دل ہے

اپنی اپنی منزل ہے

دیکھتے ہیں بے نیازانہ گزر سکتے نہیں

کتنے جیتے اس لیے ہوں گے کہ مر سکتے نہیں

بات یہ ہے کہ آدمی شاعر

یا تو ہوتا ہے یا نہیں ہوتا

کسے خبر کہ اہل غم سکون کی تلاش میں

شراب کی طرف گئے شراب کے لیے نہیں

کتراتے ہیں بل کھاتے ہیں گھبراتے ہیں کیوں لوگ

سردی ہے تو پانی میں اتر کیوں نہیں جاتے

اب یاد کبھی آئے تو آئینے سے پوچھو

محبوبؔ خزاں شام کو گھر کیوں نہیں جاتے

چاہی تھی دل نے تجھ سے وفا کم بہت ہی کم

شاید اسی لیے ہے گلا کم بہت ہی کم

الجھتے رہنے میں کچھ بھی نہیں تھکن کے سوا

بہت حقیر ہیں ہم تم بڑی ہے یہ دنیا

تمہارے واسطے سب کچھ ہے میرے بندہ نواز

مگر یہ شرط کہ پہلے پسند آؤ مجھے

کوئی رستہ کہیں جائے تو جانیں

بدلنے کے لیے رستے بہت ہیں

گھبرا نہ ستم سے نہ کرم سے نہ ادا سے

ہر موڑ یہاں راہ دکھانے کے لیے ہے

یہ کیا کہوں کہ مجھ کو کچھ گناہ بھی عزیز ہیں

یہ کیوں کہوں کہ زندگی ثواب کے لیے نہیں

زخم بگڑے تو بدن کاٹ کے پھینک

ورنہ کانٹا بھی محبت سے نکال

ہوا چلی تو پھر آنکھوں میں آ گئے سب رنگ

مگر وہ سات برس لوٹ کر نہیں آئے

یہ دل نواز اداسی بھری بھری پلکیں

ارے ان آنکھوں میں کیا ہے سنو دکھاؤ مجھے

اخبار میں روزانہ وہی شور ہے یعنی

اپنے سے یہ حالات سنور کیوں نہیں جاتے

پلٹ گئیں جو نگاہیں انہیں سے شکوہ تھا

سو آج بھی ہے مگر دیر ہو گئی شاید

خزاںؔ کبھی تو کہو ایک اس طرح کی غزل

کہ جیسے راہ میں بچے خوشی سے کھیلتے ہیں

یہ لوگ سانس بھی لیتے ہیں زندہ بھی ہیں مگر

ہر آن جیسے انہیں روکتی ہے یہ دنیا

یہ سرد مہر اجالا یہ جیتی جاگتی رات

ترے خیال سے تصویر ماہ جلتی ہے

ہائے پھر فصل بہار آئی خزاںؔ

کبھی مرنا کبھی جینا ہے محال