کیا کہوں اس سے کہ جو بات سمجھتا ہی نہیں

وہ تو ملنے کو ملاقات سمجھتا ہی نہیں

سکون دل کے لیے عشق تو بہانہ تھا

وگرنہ تھک کے کہیں تو ٹھہر ہی جانا تھا

خوابوں پر اختیار نہ یادوں پہ زور ہے

کب زندگی گزاری ہے اپنے حساب میں

میں نے ماں کا لباس جب پہنا

مجھ کو تتلی نے اپنے رنگ دیے

الجھ کے رہ گئے چہرے مری نگاہوں میں

کچھ اتنی تیزی سے بدلے تھے ان کی بات کے رنگ

آنکھوں میں نہ زلفوں میں نہ رخسار میں دیکھیں

مجھ کو مری دانش مرے افکار میں دیکھیں

کتنے اچھے لوگ تھے کیا رونقیں تھیں ان کے ساتھ

جن کی رخصت نے ہمارا شہر سونا کر دیا

دکھائی دیتا ہے جو کچھ کہیں وہ خواب نہ ہو

جو سن رہی ہوں وہ دھوکا نہ ہو سماعت کا

بچھڑ رہا تھا مگر مڑ کے دیکھتا بھی رہا

میں مسکراتی رہی میں نے بھی کمال کیا

بہت گہری ہے اس کی خامشی بھی

میں اپنے قد کو چھوٹا پا رہی ہوں

اس کے پیالے میں زہر ہے کہ شراب

کیسے معلوم ہو بغیر پیے

سنتی رہی میں سب کے دکھ خاموشی سے

کس کا دکھ تھا میرے جیسا بھول گئی

پوری نہ ادھوری ہوں نہ کم تر ہوں نہ برتر

انسان ہوں انسان کے معیار میں دیکھیں

اور کوئی نہیں ہے اس کے سوا

سکھ دیے دکھ دیے اسی نے دیے

کوئی نہیں ہے میرے جیسا چاروں اور

اپنے گرد اک بھیڑ سجا کر تنہا ہوں

ادھورے لفظ تھے آواز غیر واضح تھی

دعا کو پھر بھی نہیں دیر کچھ اثر میں لگی

رات دریچے تک آ کر رک جاتی ہے

بند آنکھوں میں اس کا چہرہ رہتا ہے

مکاں بناتے ہوئے چھت بہت ضروری ہے

بچا کے صحن میں لیکن شجر بھی رکھنا ہے

ہماری نسل سنورتی ہے دیکھ کر ہم کو

سو اپنے آپ کو شفاف تر بھی رکھنا ہے

کب اس کی فتح کی خواہش کو جیت سکتی تھی

میں وہ فریق ہوں جس کو کہ ہار جانا تھا

بھول گئی ہوں کس سے میرا ناطہ تھا

اور یہ ناطہ کیسے ٹوٹا بھول گئی

میں نے پہنچایا اسے جیت کے ہر خانے میں

میری بازی تھی مری مات سمجھتا ہی نہیں

پہچان جن سے تھی وہ حوالے مٹا دیے

اس نے کتاب ذات کا صفحہ بدل دیا

ٹھیس کچھ ایسی لگی ہے کہ بکھرنا ہے اسے

دل میں دھڑکن کی جگہ درد ہے اور جان نہیں

سن رہے ہیں کان جو کہتے ہیں سب

لوگ لیکن سوچتے کچھ اور ہیں

اور کیا شکل بے مکانی کی

جب سفر میں ہی زندگانی کی