زخم پر اشعار

سنا ہے شہر میں زخمی دلوں کا میلہ ہے

چلیں گے ہم بھی مگر پیرہن رفو کر کے

خاموشی کے ناخن سے چھل جایا کرتے ہیں

کوئی پھر ان زخموں پر آوازیں ملتا ہے

اس طرف سے گزرے تھے قافلے بہاروں کے

آج تک سلگتے ہیں زخم رہ گزاروں کے

میں تیرے ہدیۂ فرقت پہ کیسے نازاں ہوں

مری جبیں پہ ترا زخم تک حسین نہیں

شاخ مژگاں پہ مہکنے لگے زخموں کے گلاب

پچھلے موسم کی ملاقات کی بو زندہ ہے

یہ آس بہت ہے کہ ترے دست ستم سے

جتنے بھی ملے گھاؤ ہیں بھر جائیں گے اک دن

تڑپ رہا ہے جو بیتاب ہو کے زخموں سے

یہ راستے میں مرے دل کے ہو بہو کیا ہے

کھل رہے ہیں گلاب زخموں کے

شکریہ آپ کی نوازش کا

نئے زخم لاتی ہے باد صبا

چمن میں ہر اک پھول بیمار ہے

آج کس کی جان سے کھیلو گے اے چارہ گرو

آج پہلو میں مرے زخم جگر کوئی نہیں

جب اس نے ہار کے خنجر زمیں پہ پھینک دیا

تمام زخم جگر مسکرائے ہیں کیا کیا

کسی کے ہاتھ ہی راضی نہ تھے رفو کے لئے

وگرنہ زخم حد اندمال تک آئے

درد کی چاہ میں پہلے تو کریدوں شب بھر

پھر اسی زخم کو سینے کا مزا لیتا ہوں

چارہ گر مرہم بھرے گا تو کہاں

روح تک ہیں زخم کی گہرائیاں

تا عمر ترا نقش فروزاں رہے مجھ میں

اک زخم کی صورت مرے ماتھے پہ ابھر جا