Sher of Anjum Saleemi
maañ kī duā na baap kī shafqat kā saayā hai
aaj apne saath apnā janam din manāyā hai
man ki dua na bap ki shafqat ka saya hai
aaj apne sath apna janam din manaya hai
saath bārish meñ liye phirte ho us ko 'anjum'
tum ne is shahr meñ kyā aag lagānī hai koī
sath barish mein liye phirte ho us ko 'anjum'
tum ne is shahr mein kya aag lagani hai koi
tum akele meñ mile hī nahīñ varna tum ko
aur hī tarah ke ik shaḳhs se milvātā maiñ
tum akele mein mile hi nahin warna tum ko
aur hi tarah ke ek shaKHs se milwata main
itnā be-tāb na ho mujh se bichhaḌne ke liye
tujh ko ā.ankhoñ se nahīñ dil se judā karnā hai
itna be-tab na ho mujh se bichhaDne ke liye
tujh ko aaankhon se nahin dil se juda karna hai
raushnī bhī nahīñ havā bhī nahīñ
maañ kā nemul-badal ḳhudā bhī nahīñ
raushni bhi nahin hawa bhi nahin
man ka nemul-badal KHuda bhi nahin
mujhe pata hai ki barbād ho chukā huuñ maiñ
tū merā sog manā mujh ko sogvār na kar
mujhe pata hai ki barbaad ho chuka hun main
tu mera sog mana mujh ko sogwar na kar
-
Share this
- See Ghazal
- Critique
- Comments
- Download
chal to saktā thā maiñ bhī paanī par
maiñ ne dariyā kā ehtirām kiyā
chal to sakta tha main bhi pani par
main ne dariya ka ehtiram kiya
kis shafqat meñ guñdhe hue maulā maañ baap diye
kaisī pyārī rūhoñ ko merī aulād kiyā
kis shafqat mein gundhe hue maula man bap diye
kaisi pyari ruhon ko meri aulad kiya
-
Tag : Mother
-
Share this
- See Ghazal
- Critique
- Comments
- Download
tū mire sabr kā andāza lagā saktā hai
terī sohbat meñ tirā hijr guzārā hai miyāñ
tu mere sabr ka andaza laga sakta hai
teri sohbat mein tera hijr guzara hai miyan
ek be-nām udāsī se bharā baiThā huuñ
aaj dil khol ke rone kī zarūrat hai mujhe
ek be-nam udasi se bhara baiTha hun
aaj dil khol ke rone ki zarurat hai mujhe
-
Share this
- See Ghazal
- Critique
- Comments
- Download
mujh se ḳhālī hai merā ā.īna
āñ.suoñ se bharā huā huuñ maiñ
mujh se KHali hai mera aaina
aansuon se bhara hua hun main
uThā.e phirtā rahā maiñ bahut mohabbat ko
phir ek din yūñhī sochā ye kyā musībat hai
uThae phirta raha main bahut mohabbat ko
phir ek din yunhi socha ye kya musibat hai
maiñ chīḳhtā rahā kuchh aur bhī hai merā ilaaj
magar ye log tumhārā hī naam lete rahe
main chiKHta raha kuchh aur bhi hai mera ilaj
magar ye log tumhaara hi nam lete rahe
bas andhere ne rañg badlā hai
din nahīñ hai safed raat hai ye
bas andhere ne rang badla hai
din nahin hai safed raat hai ye
kis ne ābād kiyā hai mirī vīrānī ko
ishq ne? ishq to bīmār paḌā hai mujh meñ
kis ne aabaad kiya hai meri virani ko
ishq ne? ishq to bimar paDa hai mujh mein
us ḳhudā kī talāsh hai 'anjum'
jo ḳhudā ho ke aadmī sā lage
us KHuda ki talash hai 'anjum'
jo KHuda ho ke aadmi sa lage
ek din merī ḳhāmushī ne mujhe
lafz kī oT se ishāra kiyā
ek din meri KHamushi ne mujhe
lafz ki oT se ishaara kiya
itnā tarsāyā gayā mujh ko mohabbat se ki ab
ik mohabbat pe qanā.at nahīñ kar saktā maiñ
itna tarsaya gaya mujh ko mohabbat se ki ab
ek mohabbat pe qanaat nahin kar sakta main
-
Share this
- See Ghazal
- Critique
- Comments
- Download
vo ik din jaane kis ko yaad kar ke
mire siine se lag ke ro paḌā thā
wo ek din jaane kis ko yaad kar ke
mere sine se lag ke ro paDa tha
-
Tag : Yaad
-
Share this
- See Ghazal
- Critique
- Comments
- Download
kar rahā huuñ tujhe ḳhushī se basar
zindagī tujh se daad chāhtā huuñ
kar raha hun tujhe KHushi se basar
zindagi tujh se dad chahta hun
udāsī khīñch laa.ī hai yahāñ tak
maiñ aañsū thā samundar meñ paḌā huuñ
udasi khinch lai hai yahan tak
main aansu tha samundar mein paDa hun
-
Tag : Aab Deedah
maiñ andhere meñ huuñ magar mujh meñ
raushnī ne jagah banā lī hai
main andhere mein hun magar mujh mein
raushni ne jagah bana li hai
haañ zamāne kī nahīñ apnī to sun saktā thā
kaash ḳhud ko hī kabhī baiTh ke samjhātā maiñ
han zamane ki nahin apni to sun sakta tha
kash KHud ko hi kabhi baiTh ke samjhata main
maiñ jis charāġh se baiThā thā lau lagā.e hue
pata chalā vo andhere meñ rakh rahā thā mujhe
main jis charagh se baiTha tha lau lagae hue
pata chala wo andhere mein rakh raha tha mujhe
sabhī darvāze khule haiñ mirī tanhā.ī ke
saarī duniyā ko mayassar hai rifāqat merī
sabhi darwaze khule hain meri tanhai ke
sari duniya ko mayassar hai rifaqat meri
merī miTTī se bahut ḳhush haiñ mire kūza-gar
vaisā ban jaatā huuñ maiñ jaisā banāte haiñ mujhe
meri miTTi se bahut KHush hain mere kuza-gar
waisa ban jata hun main jaisa banate hain mujhe
kaisī hotī haiñ udāsī kī jaḌeñ
aa dikhā.ūñ tujhe dil ke reshe
kaisi hoti hain udasi ki jaDen
aa dikhaun tujhe dil ke reshe
maiñ ek ek tamannā se pūchh baiThā huuñ
mujhe yaqīñ nahīñ aatā ki merā sab hai tū
main ek ek tamanna se puchh baiTha hun
mujhe yaqin nahin aata ki mera sab hai tu
patthar meñ kaun joñk lagā.egā mere dost
dil hai to mubtalā bhī kahīñ honā chāhiye
patthar mein kaun jonk lagaega mere dost
dil hai to mubtala bhi kahin hona chahiye
aisī kyā biit ga.ī mujh pe ki jis ke baa.is
āb-dīda haiñ mire hañsne hañsāne vaale
aisi kya bit gai mujh pe ki jis ke bais
aab-dida hain mere hansne hansane wale
-
Tag : Aab Deedah
ek ta.abīr kī sūrat nazar aa.ī hai idhar
so uThā laayā huuñ sab ḳhvāb purāne vaale
ek tabir ki surat nazar aai hai idhar
so uTha laya hun sab KHwab purane wale
tere andar kī udāsī ke mushābah huuñ maiñ
ḳhāl-o-ḳhad se nahīñ āvāz se pahchān mujhe
tere andar ki udasi ke mushabah hun main
KHal-o-KHad se nahin aawaz se pahchan mujhe
-
Share this
- See Ghazal
- Critique
- Comments
- Download
maiñ ḳhud se mil ke kabhī saaf saaf kah dūñgā
mujhe pasand nahīñ hai mudāḳhalat apnī
main KHud se mil ke kabhi saf saf kah dunga
mujhe pasand nahin hai mudaKHalat apni
-
Share this
- See Ghazal
- Critique
- Comments
- Download
kaho havā se ki itnī charāġh-pā na phire
maiñ ḳhud hī apne diye ko bujhāne vaalā huuñ
kaho hawa se ki itni charagh-pa na phire
main KHud hi apne diye ko bujhane wala hun
tujh se ye kaisā ta.alluq hai jise jab chāhūñ
ḳhatm kar detā huuñ āġhāz bhī kar letā huuñ
tujh se ye kaisa talluq hai jise jab chahun
KHatm kar deta hun aaghaz bhi kar leta hun
-
Share this
- See Ghazal
- Critique
- Comments
- Download
ḳhvāb sharminda-e-visāl huā
hijr meñ niiñd aa ga.ī thī mujhe
KHwab sharminda-e-visal hua
hijr mein nind aa gai thi mujhe
purānā zahr na.e naam se milā hai mujhe
vo āstīn nahīñ keñchulī badal rahā thā
purana zahr nae nam se mila hai mujhe
wo aastin nahin kenchuli badal raha tha
apnī tasdīq mujhe terī gavāhī se huī
tū kahāñ se mire hone kī ḳhabar laayā hai
apni tasdiq mujhe teri gawahi se hui
tu kahan se mere hone ki KHabar laya hai
jab ḳhudā bhī nahīñ thā saath mare
mujh pe biitī hai aisī tanhā.ī
jab KHuda bhi nahin tha sath mare
mujh pe biti hai aisi tanhai
-
Share this
- See Ghazal
- Critique
- Comments
- Download
kahne sunñe ke liye aur bachā hī kyā hai
so mire dost ijāzat mujhe ruḳhsat kiyā jaa.e
kahne sunne ke liye aur bacha hi kya hai
so mere dost ijazat mujhe ruKHsat kiya jae
khulī huī hai jo koī āsān raah mujh par
maiñ us se haT ke ik aur rasta banā rahā huuñ
khuli hui hai jo koi aasan rah mujh par
main us se haT ke ek aur rasta bana raha hun
-
Share this
- See Ghazal
- Critique
- Comments
- Download
ishq farmā liyā to sochtā huuñ
kyā musībat paḌī huī thī mujhe
ishq farma liya to sochta hun
kya musibat paDi hui thi mujhe
Thiik se yaad bhī nahīñ ab to
ishq ne mujh meñ kab qayām kiyā
Thik se yaad bhi nahin ab to
ishq ne mujh mein kab qayam kiya
barham haiñ mujh pe is liye donoñ taraf ke log
dīvār uTh ga.ī thī to dar kyuuñ banāyā hai
barham hain mujh pe is liye donon taraf ke log
diwar uTh gai thi to dar kyun banaya hai
bujhne de sab diye mujhe tanhā.ī chāhiye
kuchh der ke liye mujhe tanhā.ī chāhiye
bujhne de sab diye mujhe tanhai chahiye
kuchh der ke liye mujhe tanhai chahiye
-
Share this
- See Ghazal
- Critique
- Comments
- Download
kisī tarah se nazar mutma.in nahīñ hotī
har ek shai ko dobāra badal ke dekhtā huuñ
kisi tarah se nazar mutmain nahin hoti
har ek shai ko dobara badal ke dekhta hun
maiñ aaj ḳhud se mulāqāt karne vaalā huuñ
jahāñ meñ koī bhī mere sivā na rah jaa.e
main aaj KHud se mulaqat karne wala hun
jahan mein koi bhi mere siwa na rah jae
dosto mere liye koī bhī afsurda na ho
ḳhush-dilī se dam-e-ruḳhsat mujhe ruḳhsat kiyā jaa.e
dosto mere liye koi bhi afsurda na ho
KHush-dili se dam-e-ruKHsat mujhe ruKHsat kiya jae
aage bichhī paḌī rahīñ us ke badan kī nemateñ
us ne bahut kahā magar maiñ ne use chakhā nahīñ
aage bichhi paDi rahin us ke badan ki nematen
us ne bahut kaha magar main ne use chakha nahin
dard se bhartā rahā zaat ke ḳhālī-pan ko
thoḌā thoḌā yūñhī bharpūr kiyā maiñ ne mujhe
dard se bharta raha zat ke KHali-pan ko
thoDa thoDa yunhi bharpur kiya main ne mujhe