دل دبا جاتا ہے کتنا آج غم کے بار سے

کیسی تنہائی ٹپکتی ہے در و دیوار سے

لبوں پر تبسم تو آنکھوں میں آنسو تھی دھوپ ایک پل میں تو اک پل میں بارش

ہمیں یاد ہے باتوں باتوں میں ان کا ہنسانا رلانا رلانا ہنسانا

آنکھ میں آنسو کا اور دل میں لہو کا کال ہے

ہے تمنا کا وہی جو زندگی کا حال ہے

مشکل ہی سے کر لیتی ہے دنیا اسے قبول

ایسی حقیقت جس میں فسانہ کم کم ہوتا ہے

رت بدلی تو زمیں کے چہرے کا غازہ بھی بدلا

رنگ مگر خود آسمان نے بدلے کیسے کیسے

چراغ راہ گزر لاکھ تابناک سہی

جلا کے اپنا دیا روشنی مکان میں لا

مری شکست بھی تھی میری ذات سے منسوب

کہ میری فکر کا ہر فیصلہ شعوری تھا

برے بھلے میں فرق ہے یہ جانتے ہیں سب مگر

ہے کون نیک کون بد نظر نظر کی بات ہے

پہنچ کے جو سر منزل بچھڑ گیا مجھ سے

وہ ہم سفر تھا مگر ہم نظر نہ تھا میرا

مبہم تھے سب نقوش نقابوں کی دھند میں

چہرہ اک اور بھی پس چہرہ ضرور تھا

ہر دکاں اپنی جگہ حیرت نظارہ ہے

فکر انساں کے سجائے ہوئے بازار تو دیکھ

مسافرت کا ولولہ سیاحتوں کا مشغلہ

جو تم میں کچھ زیادہ ہے سفر کرو سفر کرو

خود پرستی خدا نہ بن جائے

احتیاطاً گناہ کرتا ہوں

بے سال و سن زمانوں میں پھیلے ہوئے ہیں ہم

بے رنگ و نسل نام میں تو بھی ہے میں بھی ہوں

آنکھوں کو دیکھنے کا سلیقہ جب آ گیا

کتنے نقاب چہرۂ اسرار سے اٹھے

وہ پاس ہو کے دور ہے تو دور ہو کے پاس

فراق اور وصال ہیں عجیب عجیب سے

یہی سوچ کر اکتفا چار پر کر گئے شیخ جی

ملیں گی وہاں ان کو حور اور پریاں وغیرہ وغیرہ

ہمت والے پل میں بدل دیتے ہیں دنیا کو

سوچنے والا دل تو بیٹھا سوچا کرتا ہے

چھوڑ کے مال و دولت ساری دنیا میں اپنی

خالی ہاتھ گزر جاتے ہیں کیسے کیسے لوگ

رستے ہی میں ہو جاتی ہیں باتیں بس دو چار

اب تو ان کے گھر بھی جانا کم کم ہوتا ہے

نہ جانے کتنی بستیاں اجڑ کے رہ گئیں

ملے ہیں راستے میں کچھ مکاں جلے جلے