گئے زمانے کی چاپ جن کو سمجھ رہے ہو

وہ آنے والے اداس لمحوں کی سسکیاں ہیں

اک کرب مسلسل کی سزا دیں تو کسے دیں

مقتل میں ہیں جینے کی دعا دیں تو کسے دیں

اندر کی دنیا سے ربط بڑھاؤ آنسؔ

باہر کھلنے والی کھڑکی بند پڑی ہے

اتارا دل کے ورق پر تو کتنا پچھتایا

وہ انتساب جو پہلے بس اک کتاب پہ تھا

تمہارے نام کے نیچے کھنچی ہوئی ہے لکیر

کتاب زیست ہے سادہ اس اندراج کے بعد

گونجتا ہے بدن میں سناٹا

کوئی خالی مکان ہو جیسے

درکار تحفظ ہے پہ سانس بھی لینا ہے

دیوار بناؤ تو دیوار میں در رکھنا

یاد ہے آنسؔ پہلے تم خود بکھرے تھے

آئینے نے تم سے بکھرنا سیکھا تھا

انجام کو پہنچوں گا میں انجام سے پہلے

خود میری کہانی بھی سنائے گا کوئی اور

کیوں کھل گئے لوگوں پہ مری ذات کے اسرار

اے کاش کہ ہوتی مری گہرائی ذرا اور

عجب انداز سے یہ گھر گرا ہے

مرا ملبہ مرے اوپر گرا ہے

نہ جانے باہر بھی کتنے آسیب منتظر ہوں

ابھی میں اندر کے آدمی سے ڈرا ہوا ہوں

تھا انتظار منائیں گے مل کے دیوالی

نہ تم ہی لوٹ کے آئے نہ وقت شام ہوا

نہ تھی زمین میں وسعت مری نظر جیسی

بدن تھکا بھی نہیں اور سفر تمام ہوا

حیرت سے جو یوں میری طرف دیکھ رہے ہو

لگتا ہے کبھی تم نے سمندر نہیں دیکھا

یہ اور بات کہ رنگ بہار کم ہوگا

نئی رتوں میں درختوں کا بار کم ہوگا

ہماری مسکراہٹ پر نہ جانا

دیا تو قبر پر بھی جل رہا ہے

بکھر کے پھول فضاؤں میں باس چھوڑ گیا

تمام رنگ یہیں آس پاس چھوڑ گیا

کب بار تبسم مرے ہونٹوں سے اٹھے گا

یہ بوجھ بھی لگتا ہے اٹھائے گا کوئی اور

وہ جو پیاسا لگتا تھا سیلاب زدہ تھا

پانی پانی کہتے کہتے ڈوب گیا ہے

میں اپنی ذات کی تنہائی میں مقید تھا

پھر اس چٹان میں اک پھول نے شگاف کیا

یہ انتظار سحر کا تھا یا تمہارا تھا

دیا جلایا بھی میں نے دیا بجھایا بھی

آج ذرا سی دیر کو اپنے اندر جھانک کر دیکھا تھا

آج مرا اور اک وحشی کا ساتھ رہا پل دو پل کا

میرے اپنے اندر ایک بھنور تھا جس میں

میرا سب کچھ ساتھ ہی میرے ڈوب گیا ہے

گیا تھا مانگنے خوشبو میں پھول سے لیکن

پھٹے لباس میں وہ بھی گدا لگا مجھ کو

ہزاروں قمقموں سے جگمگاتا ہے یہ گھر لیکن

جو من میں جھانک کے دیکھوں تو اب بھی روشنی کم ہے

گہری سوچیں لمبے دن اور چھوٹی راتیں

وقت سے پہلے دھوپ سروں پہ آ پہنچی

ممکن ہے کہ صدیوں بھی نظر آئے نہ سورج

اس بار اندھیرا مرے اندر سے اٹھا ہے

اک ڈوبتی دھڑکن کی صدا لوگ نہ سن لیں

کچھ دیر کو بجنے دو یہ شہنائی ذرا اور

بدن کی اندھی گلی تو جائے امان ٹھہری

میں اپنے اندر کی روشنی سے ڈرا ہوا ہوں

آخر کو روح توڑ ہی دے گی حصار جسم

کب تک اسیر خوشبو رہے گی گلاب میں