عاشق کی دعا ترا بدن ہے

عاشق کی دعا ترا بدن ہے

تصویر وفا ترا بدن ہے

کر دے جو فرشتوں کو بھی انساں

کتنا اچھا ترا بدن ہے

عالم عالم جمال تیرا

دنیا دنیا ترا بدن ہے

آ جائے خدا کو پیار جس پر

پیارے ایسا ترا بدن ہے

ہر عضو ترنم مجسم

اک بزم غنا ترا بدن ہے

کیا کیا آتا ہے میرے جی میں

کیسا کیسا ترا بدن ہے

صحرا صحرا مری محبت

دریا دریا ترا بدن ہے

جیسے پردے میں راگنی ہو

یوں زیر قبا ترا بدن ہے

میں نیند میں ہوں کہ جاگتا ہوں

اک خواب ہے یا ترا بدن ہے

ہر عضو ہے اعتراف صنعت

تعریف و ثنا ترا بدن ہے

جس کی فطرت کو تھی تمنا

وہ نشو و نما ترا بدن ہے

نکلی تھی جو رحمتوں کے دل سے

پیارے وہ دعا ترا بدن ہے

جو خود کو چرا رہا ہو ہر دم

وہ دزد حیا ترا بدن ہے

امڑا ہوا سیل رنگ و نکہت

کیا موج نما ترا بدن ہے

گونجے ہوئے ناشنیدہ نغمے

اک ساز حیا ترا بدن ہے

چھائی کیفتیوں کی مانند

گھنگھور گھٹا ترا بدن ہے

جیسے کوندا لپکنے کے قبل

ٹھہرا ٹھہرا ترا بدن ہے

جیسے کوئی خواب گیت بن جائے

شاعر کی نوا ترا بدن ہے

شاید ہی زبان دے سکے ساتھ

ہم کیا کہیں کیا ترا بدن ہے

صف اندر صف ہیں استعارے

پیارے کیا کیا ترا بدن ہے

گم صم ہے فراقؔ محو دیدار

حیرت کی سرا ترا بدن ہے