aashiq ki dua tera badan hai

'āshiq kī du'ā tirā badan hai

tasvīr-e-vafā tirā badan hai

kar de jo farishtoñ ko bhī insāñ

kitnā achchhā tirā badan hai

'ālam 'ālam jamāl terā

duniyā duniyā tirā badan hai

aa jaa.e ḳhudā ko pyaar jis par

pyāre aisā tirā badan hai

har 'uzv tarannum-e-mujassam

ik bazm-e-ġhinā tirā badan hai

kyā kyā aatā hai mere jī meñ

kaisā kaisā tirā badan hai

sahrā sahrā mirī mohabbat

dariyā dariyā tirā badan hai

jaise parde meñ rāgnī ho

yuuñ zer-e-qabā tirā badan hai

maiñ niiñd meñ huuñ ki jāgtā huuñ

ik ḳhvāb hai yā tirā badan hai

har 'uzv hai e'tirāf-e-san'at

tā'rīf-o-sanā tirā badan hai

jis kī fitrat ko thī tamannā

vo nashv-o-numā tirā badan hai

niklī thī jo rahmatoñ ke dil se

pyāre vo du'ā tirā badan hai

jo ḳhud ko churā rahā ho har-dam

vo duzd-e-hayā tirā badan hai

umḌā huā sail-e-rang-o-nik.hat

kyā mauj-numā tirā badan hai

gūñje hue nā-shunīda naġhme

ik sāz-e-hayā tirā badan hai

chhā.ī kaifiyyatoñ kī mānind

ghanghor ghaTā tirā badan hai

jaise kauñdā lapakne ke qabl

Thahrā Thahrā tirā badan hai

jaise koī ḳhvāb giit ban jaa.e

shā'ir kī navā tirā badan hai

shāyad hī zabān de sake saath

ham kyā kaheñ kyā tirā badan hai

saf andar saf haiñ isti'āre

pyāre kyā kyā tirā badan hai

gum-sum hai 'firāq' mahv-e-dīdār

hairat kī sarā tirā badan hai

'ashiq ki du'a tera badan hai

taswir-e-wafa tera badan hai

kar de jo farishton ko bhi insan

kitna achchha tera badan hai

'alam 'alam jamal tera

duniya duniya tera badan hai

aa jae KHuda ko pyar jis par

pyare aisa tera badan hai

har 'uzw tarannum-e-mujassam

ek bazm-e-ghina tera badan hai

kya kya aata hai mere ji mein

kaisa kaisa tera badan hai

sahra sahra meri mohabbat

dariya dariya tera badan hai

jaise parde mein ragni ho

yun zer-e-qaba tera badan hai

main nind mein hun ki jagta hun

ek KHwab hai ya tera badan hai

har 'uzw hai e'tiraf-e-san'at

ta'rif-o-sana tera badan hai

jis ki fitrat ko thi tamanna

wo nashw-o-numa tera badan hai

nikli thi jo rahmaton ke dil se

pyare wo du'a tera badan hai

jo KHud ko chura raha ho har-dam

wo duzd-e-haya tera badan hai

umDa hua sail-e-rang-o-nikhat

kya mauj-numa tera badan hai

gunje hue na-shunida naghme

ek saz-e-haya tera badan hai

chhai kaifiyyaton ki manind

ghanghor ghaTa tera badan hai

jaise kaunda lapakne ke qabl

Thahra Thahra tera badan hai

jaise koi KHwab git ban jae

sha'ir ki nawa tera badan hai

shayad hi zaban de sake sath

hum kya kahen kya tera badan hai

saf andar saf hain isti'are

pyare kya kya tera badan hai

gum-sum hai 'firaq' mahw-e-didar

hairat ki sara tera badan hai