Sher on Ilm

maz.habī bahs maiñ ne kī hī nahīñ

fāltū aql mujh meñ thī hī nahīñ

mazhabi bahs main ne ki hi nahin

faltu aql mujh mein thi hi nahin

ye ilm kā saudā ye risāle ye kitābeñ

ik shaḳhs kī yādoñ ko bhulāne ke liye haiñ

ye ilm ka sauda ye risale ye kitaben

ek shaKHs ki yaadon ko bhulane ke liye hain

ilm meñ bhī surūr hai lekin

ye vo jannat hai jis meñ huur nahīñ

ilm mein bhi surur hai lekin

ye wo jannat hai jis mein hur nahin

ilm kī ibtidā hai hañgāma

ilm kī intihā hai ḳhāmoshī

ilm ki ibtida hai hangama

ilm ki intiha hai KHamoshi

aql ko tanqīd se fursat nahīñ

ishq par a.amāl kī buniyād rakh

aql ko tanqid se fursat nahin

ishq par aamal ki buniyaad rakh

had se baḌhe jo ilm to hai jahl dosto

sab kuchh jo jānte haiñ vo kuchh jānte nahīñ

had se baDhe jo ilm to hai jahl dosto

sab kuchh jo jaante hain wo kuchh jaante nahin

yahī jaanā ki kuchh na jaanā haa.e

so bhī ik umr meñ huā ma.alūm

yahi jaana ki kuchh na jaana hae

so bhi ek umr mein hua malum

aql kahtī hai dobāra āzmānā jahl hai

dil ye kahtā hai fareb-e-dost khāte jā.iye

aql kahti hai dobara aazmana jahl hai

dil ye kahta hai fareb-e-dost khate jaiye

lafz o manzar meñ ma.ānī ko TaTolā na karo

hosh vaale ho to har baat ko samjhā na karo

lafz o manzar mein maani ko TaTola na karo

hosh wale ho to har baat ko samjha na karo

thoḌī sī aql laa.e the ham bhī magar 'adam'

duniyā ke hādsāt ne dīvāna kar diyā

thoDi si aql lae the hum bhi magar 'adam'

duniya ke hadsat ne diwana kar diya

adab ta.alīm kā jauhar hai zevar hai javānī kā

vahī shāgird haiñ jo ḳhidmat-e-ustād karte haiñ

adab talim ka jauhar hai zewar hai jawani ka

wahi shagird hain jo KHidmat-e-ustad karte hain

ādamiyyat aur shai hai ilm hai kuchh aur shai

kitnā tote ko paḌhāyā par vo haivāñ hī rahā

aadamiyyat aur shai hai ilm hai kuchh aur shai

kitna tote ko paDhaya par wo haiwan hi raha

ibtidā ye thī ki maiñ thā aur da.avā ilm kā

intihā ye hai ki is da.ave pe sharmāyā bahut

ibtida ye thi ki main tha aur dawa ilm ka

intiha ye hai ki is dawe pe sharmaya bahut

aql meñ jo ghir gayā lā-intihā kyūñkar huā

jo samā meñ aa gayā phir vo ḳhudā kyūñkar huā

aql mein jo ghir gaya la-intiha kyunkar hua

jo sama mein aa gaya phir wo KHuda kyunkar hua

mire qabīle meñ ta.alīm kā rivāj na thā

mire buzurg magar taḳhtiyāñ banāte the

mere qabile mein talim ka riwaj na tha

mere buzurg magar taKHtiyan banate the

junūñ ko hosh kahāñ ehtimām-e-ġhārat kā

fasād jo bhī jahāñ meñ huā ḳhirad se huā

junun ko hosh kahan ehtimam-e-ghaarat ka

fasad jo bhi jahan mein hua KHirad se hua

vo khaḌā hai ek bāb-e-ilm kī dahlīz par

maiñ ye kahtā huuñ use is ḳhauf meñ dāḳhil na ho

wo khaDa hai ek bab-e-ilm ki dahliz par

main ye kahta hun use is KHauf mein daKHil na ho

jaan kā sarfa ho to ho lekin

sarf karne se ilm baḌhtā hai

jaan ka sarfa ho to ho lekin

sarf karne se ilm baDhta hai

ujālā 'ilm kā phailā to hai chāroñ taraf yaaro

basīrat aadmī kī kuchh magar kam hotī jaatī hai

ujala 'ilm ka phaila to hai chaaron taraf yaro

basirat aadmi ki kuchh magar kam hoti jati hai