دیوانگی پر اشعار

خدارا اک نگاہ ناز ہی سے دیکھ لو ہم کو

گریباں پھاڑنے کو آج ہم تیار بیٹھے ہیں

چپ چپ مکان راستے گم سم نڈھال وقت

اس شہر کے لیے کوئی دیوانا چاہئے

ناصح کی نصیحت سے ہے ضد اور بھی دل کو

سنتا نہیں ہوشیار کی دیوانہ ہمارا

گھورنے سے کیا تمہاری آنکھوں کے ہم ڈر گئے

وے اگر ہیں مست اے پیارے تو دیوانے ہیں ہم

گزر گئے ہیں وہ لمحے بھی عشق میں اے دوست

ترے بغیر بھی جب خوش رہے ہیں دیوانے

وحشت کا عنوان ہماری ان میں سے جو نار بنی

دیکھیں گے تو لوگ کہیں گے انشاؔ جی دیوانے تھے

آج پھر ٹوٹیں گی تیرے گھر کی نازک کھڑکیاں

آج پھر دیکھا گیا دیوانہ تیرے شہر میں

اٹھا کے سر مجھے اتنا تو دیکھ لینے دے

کہ قتل گاہ میں دیوانے آئے ہیں کیا کیا

تیرے شیدا بھی ہوئے عشق تماشا بھی ہوئے

تیرے دیوانے ترے شہر میں رسوا بھی ہوئے