jalāne vaale jalāte hī haiñ charāġh āḳhir

ye kyā kahā ki havā tez hai zamāne kī

jalane wale jalate hi hain charagh aaKHir

ye kya kaha ki hawa tez hai zamane ki

ham mohabbat kā sabaq bhuul ga.e

terī āñkhoñ ne paḌhāyā kyā hai

hum mohabbat ka sabaq bhul gae

teri aankhon ne paDhaya kya hai

hone do charāġhāñ mahloñ meñ kyā ham ko agar dīvālī hai

mazdūr haiñ ham mazdūr haiñ ham mazdūr kī duniyā kaalī hai

hone do charaghan mahlon mein kya hum ko agar diwali hai

mazdur hain hum mazdur hain hum mazdur ki duniya kali hai

ba-qadr-e-paimāna-e-taḳhayyul surūr har dil meñ hai ḳhudī kā

agar na ho ye fareb-e-paiham to dam nikal jaa.e aadmī kā

ba-qadr-e-paimana-e-taKHayyul surur har dil mein hai KHudi ka

agar na ho ye fareb-e-paiham to dam nikal jae aadmi ka

aayā ye kaun sāya-e-zulf-e-darāz meñ

peshāni-e-sahar kā ujālā liye hue

aaya ye kaun saya-e-zulf-e-daraaz mein

peshani-e-sahar ka ujala liye hue

inhī hairat-zada āñkhoñ se dekhe haiñ vo aañsū bhī

jo aksar dhuup meñ mehnat kī peshānī se Dhalte haiñ

inhi hairat-zada aankhon se dekhe hain wo aansu bhi

jo aksar dhup mein mehnat ki peshani se Dhalte hain

kise ḳhabar thī ki le kar charāġh-e-mustafavī

jahāñ meñ aag lagātī phiregī bū-lahabī

kise KHabar thi ki le kar charagh-e-mustafawi

jahan mein aag lagati phiregi bu-lahabi

butoñ ko toḌ ke aisā ḳhudā banānā kyā

butoñ kī tarah jo ham-shakl aadmī kā ho

buton ko toD ke aisa KHuda banana kya

buton ki tarah jo ham-shakl aadmi ka ho

ai sajda-farosh-e-kū-e-butāñ har sar ke liye ik chaukhaT hai

ye bhī koī shān-e-ishq huī jis dar pe ga.e sar phoḌ liyā

ai sajda-farosh-e-ku-e-butan har sar ke liye ek chaukhaT hai

ye bhi koi shan-e-ishq hui jis dar pe gae sar phoD liya

nahīñ afsūñ hī ko afsāne kī manzil ma.alūm

ġhalat āġhāz kā hotā hī hai anjām ġhalat

nahin afsun hi ko afsane ki manzil malum

ghalat aaghaz ka hota hi hai anjam ghalat

hastī hai judā.ī se us kī jab vasl huā to kuchh bhī nahīñ

dariyā meñ na thā to qatra thā dariyā meñ milā to kuchh bhī nahīñ

hasti hai judai se us ki jab wasl hua to kuchh bhi nahin

dariya mein na tha to qatra tha dariya mein mila to kuchh bhi nahin