ishq kī choT kā kuchh dil pe asar ho to sahī

dard kam ho yā ziyāda ho magar ho to sahī

ishq ki choT ka kuchh dil pe asar ho to sahi

dard kam ho ya ziyaada ho magar ho to sahi

shab ko mai ḳhuub sī pī sub.h ko tauba kar lī

riñd ke riñd rahe haath se jannat na ga.ī

shab ko mai KHub si pi subh ko tauba kar li

rind ke rind rahe hath se jannat na gai

maiñ ne pūchhā ki hai kyā shaġhl to hañs kar bole

aaj kal ham tere marne kī duā karte haiñ

main ne puchha ki hai kya shaghl to hans kar bole

aaj kal hum tere marne ki dua karte hain

ik raat dil-jaloñ ko ye aish-e-visāl de

phir chāhe āsmān jahannam meñ Daal de

ek raat dil-jalon ko ye aish-e-visal de

phir chahe aasman jahannam mein Dal de

jis ne kuchh ehsāñ kiyā ik bojh sar par rakh diyā

sar se tinkā kyā utārā sar pe chhappar rakh diyā

jis ne kuchh ehsan kiya ek bojh sar par rakh diya

sar se tinka kya utara sar pe chhappar rakh diya

na ho barham jo bosa be-ijāzat le liyā maiñ ne

chalo jaane do betābī meñ aisā ho hī jaatā hai

na ho barham jo bosa be-ijazat le liya main ne

chalo jaane do betabi mein aisa ho hi jata hai

'jalāl' ahd-e-javānī hai doge dil sau baar

abhī kī tauba nahīñ e'tibār ke qābil

'jalal' ahd-e-jawani hai doge dil sau bar

abhi ki tauba nahin e'tibar ke qabil

ga.ī thī kah ke maiñ laatī huuñ zulf-e-yār kī bū

phirī to bād-e-sabā kā dimāġh bhī na milā

gai thi kah ke main lati hun zulf-e-yar ki bu

phiri to baad-e-saba ka dimagh bhi na mila

va.ada kyuuñ baar baar karte ho

ḳhud ko be-e'tibār karte ho

wada kyun bar bar karte ho

KHud ko be-e'tibar karte ho

na ḳhauf-e-āh butoñ ko na Dar hai nāloñ kā

baḌā kaleja hai in dil dukhāne vāloñ kā

na KHauf-e-ah buton ko na Dar hai nalon ka

baDa kaleja hai in dil dukhane walon ka

maiñ jo aayā ġhair se hans kar kahā us ne 'jalāl'

ḳhatm hai jis par sharāfat vo kamīna aa gayā

main jo aaya ghair se hans kar kaha us ne 'jalal'

KHatm hai jis par sharafat wo kamina aa gaya

pahuñche na vahāñ tak ye duā maañg rahā huuñ

qāsid ko udhar bhej ke dhyān aa.e hai kyā kyā

pahunche na wahan tak ye dua mang raha hun

qasid ko udhar bhej ke dhyan aae hai kya kya