jab tak māthā chuum ke ruḳhsat karne vaalī zinda thī

darvāze ke bāhar tak bhī muñh meñ luqma hotā thā

jab tak matha chum ke ruKHsat karne wali zinda thi

darwaze ke bahar tak bhi munh mein luqma hota tha

daftar se mil nahīñ rahī chhuTTī vagarna maiñ

bārish kī ek buuñd na be-kār jaane duuñ

daftar se mil nahin rahi chhuTTi wagarna main

barish ki ek bund na be-kar jaane dun

dīvāreñ chhoTī hotī thiiñ lekin parda hotā thā

tāloñ kī ījād se pahle sirf bharosa hotā thā

diwaren chhoTi hoti thin lekin parda hota tha

talon ki ijad se pahle sirf bharosa hota tha

terī shartoñ pe hī karnā hai agar tujh ko qubūl

ye suhulat to mujhe saarā jahāñ detā hai

teri sharton pe hi karna hai agar tujh ko qubul

ye suhulat to mujhe sara jahan deta hai

ḳhatoñ ko kholtī dīmak kā shukriya varna

taḌap rahī thī lifāfoñ meñ be-zabānī paḌī

KHaton ko kholti dimak ka shukriya warna

taDap rahi thi lifafon mein be-zabani paDi

ye nahīñ dekhte kitnī hai riyāzat kis kī

log āsān samajh lete haiñ āsānī ko

ye nahin dekhte kitni hai riyazat kis ki

log aasan samajh lete hain aasani ko

maiñ jāntā huuñ mujhe mujh se māñgne vaale

parā.ī chiiz kā jo log haal karte haiñ

main jaanta hun mujhe mujh se mangne wale

parai chiz ka jo log haal karte hain

batā rahā hai jhaTaknā tirī kalā.ī kā

zarā bhī rañj nahīñ hai tujhe judā.ī kā

bata raha hai jhaTakna teri kalai ka

zara bhi ranj nahin hai tujhe judai ka

us se ham pūchh thoḌī sakte haiñ

us kī marzī jahāñ rakhe jis ko

us se hum puchh thoDi sakte hain

us ki marzi jahan rakhe jis ko

achchhe-ḳhāse logoñ par bhī vaqt ik aisā aa jaatā hai

aur kisī par hañste hañste ḳhud par ronā aa jaatā hai

achchhe-KHase logon par bhi waqt ek aisa aa jata hai

aur kisi par hanste hanste KHud par rona aa jata hai

merī numū hai tere taġhāful se vābasta

kam bārish bhī mujh ko kaafī ho saktī hai

meri numu hai tere taghaful se wabasta

kam barish bhi mujh ko kafi ho sakti hai

izāla ho gayā tāḳhīr se nikalne kā

guzar ga.ī hai safar meñ mire qayām kī shaam

izala ho gaya taKHir se nikalne ka

guzar gai hai safar mein mere qayam ki sham

use kaho jo bulātā hai gahre paanī meñ

kināre se bañdhī kashtī kā mas.ala samjhe

use kaho jo bulata hai gahre pani mein

kinare se bandhi kashti ka masala samjhe

mil gayā tū mujhe merā nahīñ rahne degā

vo samundar mujhe qatra nahīñ rahne degā

mil gaya tu mujhe mera nahin rahne dega

wo samundar mujhe qatra nahin rahne dega

hamāre zāhirī ahvāl par na jā ham log

qayām apne ḳhad-o-ḳhāl meñ nahīñ karte

hamare zahiri ahwal par na ja hum log

qayam apne KHad-o-KHal mein nahin karte

aañkh khulte hī jabīñ chūmne aa jaate haiñ

ham agar ḳhvāb meñ bhī tum se laḌe hote haiñ

aankh khulte hi jabin chumne aa jate hain

hum agar KHwab mein bhi tum se laDe hote hain

aisī ġhurbat ko ḳhudā ġhārat kare

phuul bhejvāne kī gunjā.ish na ho

aisi ghurbat ko KHuda ghaarat kare

phul bhejwane ki gunjaish na ho

vo dastiyāb hameñ is liye nahīñ hotā

ham istifāda nahīñ dekh-bhāl karte haiñ

wo dastiyab hamein is liye nahin hota

hum istifada nahin dekh-bhaal karte hain

ye e'timād bhī merā diyā huā hai tumheñ

jo mere mashvare be-kār jaane lag ga.e haiñ

ye e'timad bhi mera diya hua hai tumhein

jo mere mashware be-kar jaane lag gae hain

kisī badan kī sayāhat niDhāl kartī hai

kisī ke haath kā takiya thakān khīñchtā hai

kisi badan ki sayahat niDhaal karti hai

kisi ke hath ka takiya thakan khinchta hai

tujh se kuchh aur ta'alluq bhī zarūrī hai mirā

ye mohabbat to kisī vaqt bhī mar saktī hai

tujh se kuchh aur ta'alluq bhi zaruri hai mera

ye mohabbat to kisi waqt bhi mar sakti hai

badal ke dekh chukī hai re.āyā sāhib-e-taḳht

jo sar qalam nahīñ kartā zabān khīñchtā hai

badal ke dekh chuki hai reaya sahib-e-taKHt

jo sar qalam nahin karta zaban khinchta hai

kuchh nahīñ de rahā sujhā.ī hameñ

is qadar raushnī kā kyā kiije

kuchh nahin de raha sujhai hamein

is qadar raushni ka kya kije

tez āñdhī meñ ye bhī kaafī hai

peḌ tasvīr meñ bachā liyā jaa.e

tez aandhi mein ye bhi kafi hai

peD taswir mein bacha liya jae

haa.e vo bhīgā reshmī paikar

tauliyā khurdurā lage jis ko

hae wo bhiga reshmi paikar

tauliya khurdura lage jis ko

ye ḳhamoshī mirī ḳhamoshī hai

is kā matlab mukālima liyā jaa.e

ye KHamoshi meri KHamoshi hai

is ka matlab mukalima liya jae

maiñ ye chāhtā huuñ ki umr-bhar rahe tishnagī mire ishq meñ

koī justujū rahe darmiyāñ tire saath bhī tire ba.ad bhī

main ye chahta hun ki umr-bhar rahe tishnagi mere ishq mein

koi justuju rahe darmiyan tere sath bhi tere baad bhi

Thaharnā bhī mirā jaanā shumār hone lagā

paḌe paḌe maiñ purānā shumār hone lagā

Thaharna bhi mera jaana shumar hone laga

paDe paDe main purana shumar hone laga

ye kachche seb chabāne meñ itne sahal nahīñ

hamārā sabr na karnā bhī ek himmat hai

ye kachche seb chabane mein itne sahal nahin

hamara sabr na karna bhi ek himmat hai

bahut se saañp the is ġhaar ke dahāne par

dil is liye bhī ḳhazāna shumār hone lagā

bahut se sanp the is ghaar ke dahane par

dil is liye bhi KHazana shumar hone laga

bahut ġhanīmat haiñ ham se milne kabhī kabhī ke ye aane vaale

vagarna apnā to shahr bhar meñ makān taale se jaanā jaa.e

bahut ghanimat hain hum se milne kabhi kabhi ke ye aane wale

wagarna apna to shahr bhar mein makan tale se jaana jae

hamārī ma.azarat ai ġham ki muskurā rahe haiñ

ham apnā haath tirī pusht se haTā rahe haiñ

hamari mazarat ai gham ki muskura rahe hain

hum apna hath teri pusht se haTa rahe hain

ham apnī nekī samajhte to haiñ tujhe lekin

shumār nāma-e-a.amāl meñ nahīñ karte

hum apni neki samajhte to hain tujhe lekin

shumar nama-e-amal mein nahin karte

ek hī vaqt meñ pyāse bhī haiñ sairāb bhī haiñ

ham jo sahrāoñ kī miTTī ke ghaḌe hote haiñ

ek hi waqt mein pyase bhi hain sairab bhi hain

hum jo sahraon ki miTTi ke ghaDe hote hain

ḳhud par harām samjhā samar ke husūl ko

jab tak shajar ko chhāñv ke qābil nahīñ kiyā

KHud par haram samjha samar ke husul ko

jab tak shajar ko chhanw ke qabil nahin kiya

mahsūs kar liyā thā bhañvar kī thakān ko

yūñhī to ḳhud ko raqs pe maa.il nahīñ kiyā

mahsus kar liya tha bhanwar ki thakan ko

yunhi to KHud ko raqs pe mail nahin kiya

vasl ke ek hī jhoñke meñ

kaan se baale utar ga.e

wasl ke ek hi jhonke mein

kan se baale utar gae

vaise to īmān hai merā un bāñhoñ kī gunjā.ish par

dekhnā ye hai us kashtī meñ kitnā dariyā aa jaatā hai

waise to iman hai mera un banhon ki gunjaish par

dekhna ye hai us kashti mein kitna dariya aa jata hai

ye jo rahte haiñ bahut mauj meñ shab bhar ham log

sub.h hote hī kināre pe paḌe hote haiñ

ye jo rahte hain bahut mauj mein shab bhar hum log

subh hote hi kinare pe paDe hote hain

ek hone kī qasmeñ khaa.ī jaa.eñ

aur āḳhir meñ kuchh diyā liyā jaa.e

ek hone ki qasmen khai jaen

aur aaKHir mein kuchh diya liya jae

nikal gayā thā vo hasīn apnī zulf bāñdh kar

havā kī bāqiyāt ko sameTte rahe haiñ ham

nikal gaya tha wo hasin apni zulf bandh kar

hawa ki baqiyat ko sameTte rahe hain hum

merā ishq to ḳhair mirī mahrūmī kā parvarda thā

kyā mālūm thā vo bhī degā merā itnā TuuT ke saath

mera ishq to KHair meri mahrumi ka parwarda tha

kya malum tha wo bhi dega mera itna TuT ke sath

giile bāloñ ko sambhāl aur nikal jañgal se

is se pahle ki tire paañv ye jharnā paḌ jaa.e

gile baalon ko sambhaal aur nikal jangal se

is se pahle ki tere panw ye jharna paD jae

girte peḌoñ kī zad meñ haiñ ham log

kyā ḳhabar rāsta khule kab tak

girte peDon ki zad mein hain hum log

kya KHabar rasta khule kab tak

ye log jā ke kaTī bogiyoñ meñ baiTh ga.e

samay ko rail kī paTrī ke saath chalne diyā

ye log ja ke kaTi bogiyon mein baiTh gae

samay ko rail ki paTri ke sath chalne diya

bhañvar se ye jo mujhe bādbān khīñchtā hai

zarūr koī havāoñ ke kaan khīñchtā hai

bhanwar se ye jo mujhe baadban khinchta hai

zarur koi hawaon ke kan khinchta hai

dalīl us ke darīche kī pesh kī maiñ ne

kisī ko patlī galī se nahīñ nikalne diyā

dalil us ke dariche ki pesh ki main ne

kisi ko patli gali se nahin nikalne diya

manzar-e-shām-e-ġharībāñ hai dam-e-ruḳhsat-e-ḳhvāb

ta.aziye kī tarah uTThā hai koī bistar se

manzar-e-sham-e-ghariban hai dam-e-ruKHsat-e-KHwab

taziye ki tarah uTTha hai koi bistar se