ترجمانی

ہم اب آزاد رہنا چاہتے ہیں

دوستوں کے مشوروں سے

کتابوں میں لکھی باتوں سے اور ان کے نتائج سے

عقائد سے

ہمیں معلوم ہے

ان کی نصیحت زندگی کو ٹھیک رستوں سے گزارے گی

مگر ہم سوچتے ہیں

ان کی باتوں سے نکلتے سب نتائج

ان کے ہوں گے

ہماری شخصیت کا رنگ ان میں سطحی سا ہوگا

یا بالکل بھی نہیں

ہم اپنے مختصر سے وقت کو ان کی روش پر کیوں ابھاریں

ہماری بو ہماری خو کیوں اس کا پیش خیمہ بن نہیں سکتی

ہمیں ادراک ہے کہ اس طرح سے

کامیابی کم ملے شاید

مگر اتنا تو ہوگا

زندگی کے باب کا جب آخری رقعہ الٹنے کی گھڑی ہوگی

تو اس کا انتساب اور حرف آغاز

صرف اپنی خوش نگاہی کا نمائندہ بنے گا

اور اس پشتے پہ جو بھی نام کندہ ہوگا وہ حتماً

ہمارے ہونے کی خوشبو کا اک پیغام ہوگا

ہمارا نام ہوگا

ہمیں یہ دوسروں اور تیسروں کی کامیابی سے

خود اپنے آپ میں مست و مگن

ہر رائیگانی اچھی لگتی ہے

بھلے اس میں کئی ناکامیوں کا ذکر شامل ہو

ہمیں ہونے کی ذاتی ترجمانی اچھی لگتی ہے