tarjumani

ham ab āzād rahnā chāhte haiñ

dostoñ ke mashvaroñ se

kitāboñ meñ likhī bātoñ se aur un ke natā.ej se

'aqā.ed se

hameñ mā'lūm hai

un kī nasīhat zindagī ko Thiik rastoñ se guzāregī

magar ham sochte haiñ

un kī bātoñ se nikalte sab natā.ej

un ke hoñge

hamārī shaḳhsiyat kā rang un meñ sat.hī sā hogā

yā bilkul bhī nahīñ

ham apne muḳhtasar se vaqt ko un kī ravish par kyoñ ubhāreñ

hamārī bū hamārī ḳhū kyoñ us kā pesh-ḳhema ban nahīñ saktī

hameñ idrāk hai ki is tarah se

kāmyābī kam mile shāyad

magar itnā to hogā

zindagī ke baab kā jab āḳhrī ruq’a ulaTne kī ghaḌī hogī

to us kā intisāb aur harf-e-āġhāz

sirf apnī ḳhush-nigāhī kā numā.inda banegā

aur us pushte pe jo bhī naam kanda hogā vo hatman

hamāre hone kī ḳhushbū kā ik paiġhām hogā

hamārā naam hogā

hameñ ye dūsroñ aur tīsroñ kī kāmyābī se

ḳhud apne aap meñ mast-o-magan

har rā.egānī achchhī lagtī hai

bhale is meñ ka.ī nākāmiyoñ kā zikr shāmil ho

hameñ hone kī zātī-tarjumānī achchhī lagtī hai

hum ab aazad rahna chahte hain

doston ke mashwaron se

kitabon mein likhi baaton se aur un ke nataej se

'aqaed se

hamein ma'lum hai

un ki nasihat zindagi ko Thik raston se guzaregi

magar hum sochte hain

un ki baaton se nikalte sab nataej

un ke honge

hamari shaKHsiyat ka rang un mein sathi sa hoga

ya bilkul bhi nahin

hum apne muKHtasar se waqt ko un ki rawish par kyon ubhaaren

hamari bu hamari KHu kyon us ka pesh-KHema ban nahin sakti

hamein idrak hai ki is tarah se

kaamyabi kam mile shayad

magar itna to hoga

zindagi ke bab ka jab aaKHri ruq’a ulaTne ki ghaDi hogi

to us ka intisab aur harf-e-aghaz

sirf apni KHush-nigahi ka numainda banega

aur us pushte pe jo bhi nam kanda hoga wo hatman

hamare hone ki KHushbu ka ek paigham hoga

hamara nam hoga

hamein ye dusron aur tisron ki kaamyabi se

KHud apne aap mein mast-o-magan

har raegani achchhi lagti hai

bhale is mein kai nakaamiyon ka zikr shamil ho

hamein hone ki zati-tarjumani achchhi lagti hai