عشق کو باعث تسکین دل و جاں سمجھا
عشق کو باعث تسکین دل و جاں سمجھا
یہ نئی بات ہے میں درد کو درماں سمجھا
اک زمانہ جسے غارت گر ایماں سمجھا
ہائے میں اس بت کافر کو مسلماں سمجھا
منزل عشق کو دل پہلے تو آساں سمجھا
ٹھوکریں کھائیں تو یہ طفل دبستاں سمجھا
نہ فلک تیری حقیقت سے خبردار ہوئے
نہ تری راز کی باتوں کو یہ انساں سمجھا
اور بڑھ جائے نہ آشفتہ سری عاشق کی
اپنے دیوانوں کو او زلف پریشاں سمجھا
اسی رفتار سے ہوتی ہے قیامت برپا
میں تری چال کو اے فتنۂ دوراں سمجھا
کعبۂ دل کو جب اللہ کا گھر مان لیا
اس کے مہمان کو اللہ کا مہماں سمجھا
پھول برسیں گے شہیدان وفا پر محسنؔ
ان کا جانا طرف گنج شہیداں سمجھا
Additional information available
Click on the INTERESTING button to view additional information associated with this sher.
About this sher
rare Unpublished content
This ghazal contains ashaar not published in the public domain. These are marked by a red line on the left.
