ishq ko bais-e-taskin-e-dil-o-jaan samjha

'ishq ko bā'is-e-taskīn-e-dil-o-jāñ samjhā

ye na.ī baat hai maiñ dard ko darmāñ samjhā

ik zamāna jise ġhārat-gar-e-īmāñ samjhā

haa.e maiñ us but-e-kāfir ko musalmāñ samjhā

manzil-e-'ishq ko dil pahle to āsāñ samjhā

Thokareñ khā.īñ to ye tifl-e-dabistāñ samjhā

na falak terī haqīqat se ḳhabar-dār hue

na tirī raaz kī bātoñ ko ye insāñ samjhā

aur baḌh jaa.e na āshufta-sarī 'āshiq kī

apne dīvānoñ ko o zulf-e-pareshāñ samjhā

isī raftār se hotī hai qayāmat barpā

maiñ tirī chaal ko ai fitna-e-daurāñ samjhā

kā'ba-e-dil ko jab allāh kā ghar maan liyā

is ke mehmān ko allāh kā mehmāñ samjhā

phuul barseñge shahīdān-e-vafā par 'mohsin'

un kā jaanā taraf-e-ganj-e-shahīdāñ samjhā

'ishq ko ba'is-e-taskin-e-dil-o-jaan samjha

ye nai baat hai main dard ko darman samjha

ek zamana jise ghaarat-gar-e-iman samjha

hae main us but-e-kafir ko musalman samjha

manzil-e-'ishq ko dil pahle to aasan samjha

Thokaren khain to ye tifl-e-dabistan samjha

na falak teri haqiqat se KHabar-dar hue

na teri raaz ki baaton ko ye insan samjha

aur baDh jae na aashufta-sari 'ashiq ki

apne diwanon ko o zulf-e-pareshan samjha

isi raftar se hoti hai qayamat barpa

main teri chaal ko ai fitna-e-dauran samjha

ka'ba-e-dil ko jab allah ka ghar man liya

is ke mehman ko allah ka mehman samjha

phul barsenge shahidan-e-wafa par 'mohsin'

un ka jaana taraf-e-ganj-e-shahidan samjha