سینے میں دبی رہ گئی گویائی ہماری

سینے میں دبی رہ گئی گویائی ہماری

برسوں پہ ہے پھیلی ہوئی تنہائی ہماری

بکھرے ہوئے زخموں کا فقط ایک ہی حل ہے

اس آنکھ سے ہو سکتی ہے ترپائی ہماری

تا حد نظر آنکھ میں موجود خلا دیکھ

مٹی تجھے لگتی نہیں صحرائی ہماری

ہر موڑ پہ عجلت تھی سو ناکام ہی ٹھہرے

کام اس لیے آئی نہیں دانائی ہماری

ہم موج میں آنے سے گریزاں ہیں وگرنہ

تو ڈھونڈتا رہ جائے گا پرچھائی ہماری

انداز جدا اس لئے جامیؔ ہے کہ ہر شب

سنتے ہیں غزل بیدمؔ و مینائیؔ ہماری